Eks-palitźniavolenaja raskazała, jak vychodziła pa pamiłavańni i pra toje, što čuvać pra Kaleśnikavu

Pamiłavańnie

Alena raskazvaje, što ŭpieršyniu pačuła pra šaniec vyjści daterminova za niekalki tydniaŭ da vyzvaleńnia. Tady ŭ kałoniju pryjechali z Hienieralnaj prakuratury:

«Mianie źniali z vytvorčaści i nakiravali pahutaryć z čałaviekam z prakuratury. Jon skazaŭ, što kali napišu zajavu na pamiłavańnie, to jość mahčymaść vyjści raniej, ale jon mnie nie davaŭ harantyj. Mnie dali papieru, ručku i pradyktavali tekst u volnaj formie — zvarot na imia Łukašenki i chadajnictva ab pamiłavańni. Ja mahła admovicca, to-bok heta nie było prymusova, jon źviartaŭsia z prapanovaj.

Išoŭ čas, ničoha nie adbyvałasia. I potym mianie vyklikała načalnica atrada, kab ja terminova padrychtavała standartnyja dakumienty, jakija patrebnyja dla pamiłavańnia — prysud i apielacyjnaje rašeńnie. Tady ja zrazumieła, što kali ŭžo kudyści adpraŭlać maje dakumienty, to jość niejki prahres».

Kab čałavieka pamiłavali, u kałonii musić prajści adpaviednaja kamisija, ale Alena tak i nie daviedałasia, kali jana adbudziecca. Žančyna miarkuje, što kamisiju, chutčej za ŭsio, praviali bieź jaje ŭdziełu. Joj nie nazyvali nijakich dat, kali jaje vyzvalać, prosta adnojčy pryjšli i skazali źbirać rečy.

Kali vyzvalalisia pamiłavanyja da 3 lipienia, ich prasili nie raskazvać susiedkam pra toje, što była prapanova napisać takoje chadajnictva. Ale pierad nastupnymi vyzvaleńniami infarmacyju pierastali chavać, i ŭ kałonii stali aktyŭna abmiarkoŭvać, kamu prapanavali napisać zajavu.

Što z Kaleśnikavaj?

Niadaŭna źjaviłasia infarmacyja, što Maryja Kaleśnikava, jakaja ciapier znachodzicca ŭ žanočaj kałonii, adčuvaje siabie vielmi drenna i važyć usiaho 45 kiłahram. Alena nie viedaje, ci heta nasamreč tak. Jana razhladaje hetyja zajavy jak kryk pa dapamohu, jaki moža mieć pad saboj surjozny padmurak.

Jana adznačaje, što źniavolenyja ŭ kałonii tolki abmieńvajucca čutkami pra Kaleśnikavu — administracyja nie kaža nikomu, dzie ciapier Maryja:

«Naprykład, dziaŭčyna trapiła ŭ ŠIZA i čuła proźvišča Kaleśnikavaj na pierakličcy. A potym niechta kazaŭ, što ŭ ŠIZA Maryi niama i, mahčyma, jaje pieraviali ŭ PKT. Niechta sutykaŭsia ź joj u miedčaści. Ale administracyja nie kaža, u jakim stanie ciapier Kaleśnikava.

Časam u kałonii abviaščajuć raptoŭnaje «vajennaje stanovišča», kali ŭsich źniavolenych začyniajuć u pamiaškańniach atradaŭ. U taki čas, naprykład, moža pryjechać pravierka ci niejki važny hość. I paru razoŭ padčas «vajennaha stanovišča» bačyli chutkuju dapamohu — jość zdahadki, što heta Maryju vazili ŭ balnicu ci da jaje pryjazdžali miedyki».

Razdrukoŭki infarmacyi pra kanflikty ŭ apazicyi

U apošnija miesiacy raspaŭsiudžvajucca źviestki, byccam u kałonijach palitviaźniam demanstravali razdrukoŭki infarmacyi pra kanflikty ŭ demakratyčnych siłach ci navat skrynšoty takich svarak. Alena kaža, što joj ničoha takoha nie pakazvali.

Jana raskazvaje, što infarmacyju pra apazicyju časam možna było ŭbačyć pa «Viektary» — unutranym telebačańni kałonii:

«Tam pakazvajuć šmat ideałahičnych siužetaŭ. U asnoŭnym ich biaruć ź dziaržaŭnych telekanałaŭ, ale heta mohuć być i ŭłasnyja siužety. Kali niechta ź dziaŭčat, jakija vyzvalilisia z kałonii, davaŭ intervju, na «Viektary» mahli pakazać abviaržeńnie — maŭlaŭ, jana kaža, što joj było drenna, ale jana chłusić».

Alena była śviedkaj taho, jak niekalki palitźniavolenych udzielničali ŭ zapisie prapahandysckich intervju dla dziaržaŭnych kanałaŭ — havorka pra Darju Łosik i jašče niekalkich žančyn.

«Byvała, što čałavieka, jakoha zdymali, vadzili pa peŭnych miescach, a inšym asudžanym nie dazvalali tudy chadzić. Naprykład, kali chočuć niešta źniać u kłubie, tam u hety momant budzie tolki zdymačnaja hrupa i čałaviek, jakoha zdymajuć. Ci kali treba było zapisać čałavieka ŭ pamiaškańni atrada, usich astatnich adtul vyvodzili.

Kali vychodzili takija videa, siarod palityčnych ničoha nie adbyvałasia. Usie ŭsio razumieli. Navat kali niechta moh paličyć hetaje videa niapravilnym, my razumieli, pad jakim ciskam jano mahło być zroblenaje. Navat kali čałaviek psichałahična złamaŭsia, nichto nikoha ni za što nie sudziŭ, videa — heta jaho ŭłasny vybar. My mahli abmiarkoŭvać tolki sam fakt taho, što siužet vyjšaŭ. Na abstanoŭku ŭ kałonii heta nie nadta ŭpłyvała».

• 8
• 0
• 2
• 0
• 1
• 22
• 2
• 2