«U spravie dźvie pasyłki — Źmitru Daškieviču i Śviatasłavu Udodu» — žančyna, jakaja źjechała ź Biełarusi
Žycharka Minska Hanna Aŭčyńnikava, jakaja źjaŭlałasia padazravanaj pa kryminalnaj spravy za sadziejničańnie ekstremisckaj dziejnaści, zmahła źjechać ź Biełarusi. Jašče ŭ 2020 hodzie jana pačała dapamahać tym, chto vychodziŭ z akreścinskich izalataraŭ, pisała listy palitviaźniam, pieradavała im pasyłki. Mienavita za dźvie ź ich — palitviaźniu Źmitru Daškieviču i miedyku z Harodni Śviatasłavu Udodu — jaje i zatrymali. Jana pahadziłasia raspavieści «Viaśnie» pra svaje ŭražańni ad stasunkaŭ z supracoŭnikami KDB i RUUS, śledčymi i nahladčykami ŭ IČU.
Hanna Aŭčyńnikava skončyła Minski muzyčny kaledž imia Hlinki i Univiersitet kultury, atrymała śpiecyjalnaść: «kampjutarnaja muzyka». U apošni čas pracavała hukarežysioram, razam z mužam vychoŭvała jaho syna.
Śledčuju cikavili suviazi z «Viasnoj», «Dissidentby« i «Aj nid chełp»
Hannu zatrymali 23 studzienia 2024 hoda pa padazreńni ŭ ździajśnieńni złačynstva za pieradaču pasyłak palitviaźniam. Zatrymańnie adbyłosia kala stancyi mietro «Praletarskaja» ŭ Miensku. Kali jana z mužam išła da svajoj mašyny, z «Džyli», jakaja stajała pobač, vybiehli troje nieviadomych u cyvilnym adzieńni, jak paźniej vystvietliłasia — supracoŭniki KDB. Jany tak śpiašalisia, što začapili žančynu dźviarami aŭtamabila, kali ich adčyniali. Jany pakazali paśviedčańni i pradstavilisia.
«Adzin z supracoŭnikaŭ zadavaŭ pytańni pra syna ad pieršaha šlubu i prasiŭ jahony telefon. Paśla hetaha nas z mužam pavieźli dadomu ŭ Sokał dla pieratrusu: praviarali źmieściva kamputaraŭ, afarmlali papiery na ahlad pamiaškańnia, padpisku ab niavyjeździe, nakłali aryšt na chaładzilnik i televizar. Moj telefon i pašpart supracoŭniki zabrali jak rečavyja dokazy. Tady ja daviedałasia, što ŭ spravie fihuravali pasyłki dla Daškieviča i Udoda. Pieratrus doŭžyŭsia kala 2,5 hadzin, — raspaviadaje Hanna. — Dziŭna, ale kali ja paprasiła ich źniać u pakoi abutak, to jany spačatku razhubilisia, ale potym užo chadzili ŭ škarpetkach. Uvohule, staralisia pavodzić siabie karektna».
Paśla pieratrusu Aŭčyńnikavu advieźli ŭ Śledčy kamitet Zavodskaha rajona.Tam bolš za paŭtary hadziny jana siadzieła ŭ kalidory, čakała, kali vyzvalicca śledčaja. Da jaje pieryjadyčna padychodziŭ adzin z supracoŭnikaŭ i zadavaŭ roznyja pytańni.
Zatym Hannu śledčaja aznajomiła z materyjałami spravy pa častcy 2 artykuła 361-4 Kryminalnaha kodeksa («sadziejničańnie ekstremisckaj dziejnaści»), pa jakoj jana prachodziła padazravanaj. Śledčaja raspytvała, navošta jana adpraŭlała pasyłki. Žančyna adkazvała, što dapamahała siabram siamji. Dziažurny advakat, ad jakoha nielha było admovicca, kazaŭ, što pasyłki — heta dapamoha ekstremisckim farmavańniam.
Śledčaja pytałasia, kamu jana adpraŭlała pasyłki, ci adpraŭlała listy ŭ turmy i kałonii, chto finansavaŭ pasyłki, adkul Hanna daviedvałasia paštovyja adrasy, ci maje suviaź z «Viasnoj» i «Dysident Baj», raspytvała pra «Aj nid chełp».
«Inšyja supracoŭniki ŭ hety čas praviarali źmieściva telefona, paprasili ŭvajści ŭ «Tielehram», ale ja «zabyłasia» parol ad dvuchfaktarki. U halerei znajšli fota, dzie byŭ bačny navahodni vystup Śviatłany Cichanoŭskaj, niekalki fota ź Vilni. Jany pytalisia, ci ŭdzielničała ja ŭ pratestach, ci była pobač ź miescami pratestaŭ, čym zajmajusia pa žyćci. U hety čas śledčyja pajechali da muža, raspytvali, ci viedaŭ jon čym ja zajmajusia, jak my paznajomilisia, uziali padpisku ab nierazhałošvańni», — raspaviadaje Hanna.
«Supracoŭniki na Akreścina — prosta nieludzi»
Paśla dopytu Hannu na niejki čas u kajdankach advieźli jašče ŭ RUUS, a ŭžo potym na Akreścina. Pa pryjeździe na IČU na Akreścina aŭtamabil stajaŭ la varot kala 30 chvilin. Supracoŭniki kazali, što šmat ludziej zatrymali ŭ toj dzień. Kali Hannu zavodzili ŭnutr pamiaškańnia, joj zabaraniali hladzieć pa bakach i rezka ruchacca. Paśla ahladu ŭ žančyny zabrali šalik, kurtku i abutak, a jaje zaviali ŭ «stakan».
Jana čuła, jak inšyja zatrymanyja prasilisia ŭ prybiralniu, a supracoŭniki adkazvali admovaj i brudna łajalisia. U «stakanie» znachodzilisia čatyry čałavieki, było ciesna i zatrymanyja siadzieli pa čarzie.
«Padłoha ŭ «stakanie« była bietonnaja, usie mierźli bieź vierchniaj vopratki, tamu my stanavilisia na kopii pratakołaŭ, kab było lahčej stajać. I tak doŭžyłasia da samaj ranicy. Zatym mianie pryviali ŭ kamieru, dzie na 6 miescaŭ było 11 zatrymanych. Nie było paścielnaj bializny, a śviatło hareła pastajanna. U prybiralni ŭ kamiery drenna pracavaŭ zmyŭ i nam davodziłasia radziej karystacca im, ale ŭsio roŭna stajaŭ mocny pach. Uvohule, supracoŭniki na Akreścina — prosta nieludzi, napeŭna jany prachodziać vielmi ščylny adbor, i siarod hetych pačvaraŭ adbirajucca dla pracy najbolš strašnyja pačvary. I ničoha tut nie mianiajecca hadami», — apisvaje ŭmovy ŭtrymańnia žančyna.
Dniom Aŭčyńnikavu advieźli ŭ Zavodski RUUS, dzie jaje raźmiaścili ŭ pamiaškańni biez voknaŭ i ź bietonnymi łaŭkami — hetak zvany «akvaryum». Tam było čałaviek piać. Hannu iznoŭ dapytali apieratyŭniki i adviali na fatahrafavańnie i daktyłaskapiju. Aŭtazak na Akreścina pryjechaŭ tolki ŭ 23 hadziny, tamu jana iznoŭ zastałasia hałodnaj.
«U kamiery ja paznajomiłasia z maci Volhi Takarčuk. Ja nikoli nie zabudusia, jak jana padzialiłasia sa mnoj škarpetkami, u jakich paźniej ja biehła ź Biełarusi. Nas na Akreścina pieryjadyčna vyvodzili na kalidor, dzie my pavinny byli stać uzdoŭž ściany, pakłaŭšy na jaje ruki tylnym bokam dałoni, z nahami, rasstaŭlenymi šyroka. U adzin momant ad tryvožnych dumak i pieražyvańniaŭ ja pačała navat zadychacca», — kaža Hanna.
26 studzienia Hannu znoŭ pavieźli ŭ RUUS, dzie adbyłasia dziesiacichvilinnaja sustreča sa śledčaj i advakatam. Joj paviedamili, što jana vyzvalajecca z-pad varty, joj dali padpisku ab niavyjeździe i viarnuli rečy, jakija zabrali, akramia pašparta. Paśla vyzvaleńnia amal dva tydni Hanna sprabavała viarnuć svoj pašpart, ale jaje pasyłali z kabinieta ŭ kabiniet, byccam by jany nie viedali ŭ kaho jon znachodzicca.
U siaredzinie sakavika 2024 hoda Aŭčyńnikava pryniała rašeńnie pakinuć Biełaruś, chacia biez dakumientaŭ heta było zrabić składana. Tamu spačatku vyjechała siamja. Ciapier jana ŭ biaśpiecy razam ź siamjoj i sprabuje lehalizavacca ŭ adnoj ź jeŭrapiejskich krain.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?10
Kamientary