Pamiatajecie pravakatara i danosčyka Jaŭhiena Kakojtu? Jon ciapier taksama palitviazień
Padobna, što žychar Homiela Jaŭhien Katlaroŭ (jon ža Jaŭhien Kakojta i Mikita Kancavy) užo paŭhoda za kratami. Raniej jon padmanvaŭ niezaležnyja miedyja, žorstka prachodziŭsia pa prychilnikach źmienaŭ i pisaŭ danosy. A ciapier jamu pahražaje da čatyroch hadoŭ kałonii — abodva artykuły, jakija jamu inkryminujucca, palityčnyja.
Jaŭhienu Katlarovu 48 hadoŭ. Jon hamialčuk. Miarkujučy pa adkrytaj infarmacyi, da zatrymańnia pracavaŭ kiroŭcam.
Jaŭhien Katlaroŭ uziaŭ sabie psieŭdanim «Kakojta». Pieradusim jon viadomy pravakacyjami i sprobami ŭkinuć dezynfarmacyju ŭ niezaležnyja miedyja. Čas ad času heta ŭdavałasia — jon davaŭ fejkavyja intervju «Biełsatu» i «Zierkału», a taksama supracoŭničaŭ z błohieram Juryjem Cieracham, jaki ŭziaŭ sabie mianušku «Ludažer».
Katlaroŭ sprabavaŭ raskazvać fejkavyja historyi byccam by ŭłasnych zatrymańniaŭ, supracoŭničaŭ ź inšymi praŭładnymi pravakatarami ŭ Homieli. A ŭ 2019 pravodziŭ pikiet, kab vyśmiejać niezaležnych kandydataŭ u deputaty.
U lipieni 2020 hoda jon raspaŭsiudziŭ fejk pra toje, što Cichanoŭski trapiŭ u balnicu. Tady aburanyja padpisanty pryjechali ŭ balnicu z patrabavańniem, kab im pakazali błohiera, ale nieŭzabavie vykryłasia, što Cichanoŭski nie tam, a za kratami.
A 9 žniŭnia 2020 jon napisaŭ danos na žurnalista Andreja Tołčyna, jakoha ŭ 2023 hodzie aryštavali za pracu apierataram. «Kampanija Biełsat (žurnalist Tołčyn), nie zarehistravanaja, pravodzić apytańnie», — skazaŭ padčas zvanka ŭ milicyju Katlaroŭ.
A ŭ 2021 hodzie jon davaŭ pakazańni na pravaabaroncu Leanida Sudalenku. «U SK suprać mianie daŭ pakazańni Jaŭhien Katlaroŭ, jaki hałasłoŭna abvinavaciŭ mianie ŭ arhanizacyi ŭsich pratestaŭ u Homieli. Hetyja jahonyja pakazańni čałaviek u mantyi sudździ pakłaŭ u asnovu abvinavačvańnia ŭ prysudzie, a jaho troje kaleh z apielacyjnaha suda ich zaćvierdzili. U abodvuch vypadkach słužycieli Fiemidy adchilili majo chadajnictva ab dopycie Katlarova, ale, vidać, u ich była inšaja zadača — zasudzić mianie luboj canoj», — pisaŭ Leanid z-za krataŭ.
Ale i ŭ samoha Katlarova źjavilisia prablemy. Letaś jon raspyliŭ ślezaciečny haz i byŭ zatrymany. Za heta ŭ lipieni 2023 jaho asudzili pa administratyŭnym artykule — za «naniasieńnie cialesnych paškodžańniaŭ». A paśla — jašče dvojčy, za «drobnaje chulihanstva» i «ŭchileńnie ad jaŭki ŭ sud».
Pieryjadyčna Katlaroŭ navat krytykavaŭ ułady. Naprykład, paśla sustrečy z namieśnikam staršyni Homielskaha abłvykankama Baranoŭskim u listapadzie 2023 napisaŭ, što «zmahary mieli racyju, uładu treba dziaŭbści i dziaŭbści».
U studzieni 2024 hoda jamu dali štraf za «raspaŭsiud ekstremizmu».
U sakaviku 2024 jon napisaŭ u administracyju Łukašenki list, kab zapytacca pra toje, ci zakonna mieć tatuiroŭku z Pahoniaj — jon akurat nabiŭ sabie takuju. Paśla Katlaroŭ zajaviŭ, što ŭ jaho prablemy, im raptam zacikavilisia siłaviki, a jamu pahražaje zatrymańnie.
Apošnija publikacyi ŭ sacsietkach jon rabiŭ 21 sakavika 2024 hoda. A paśla hetaha adusiul źnik. U telehramie jon nie anłajn «vielmi daŭno».
30 vieraśnia 2024 hoda Jaŭhiena Katlarova pačnuć sudzić u Navabielickim sudzie Homiela. Katlarova abvinavačvajuć pa dvuch artykułach — «dyskredytacyja Biełarusi» (art. 369-1 KK) i «abraza pradstaŭnika ŭłady» (č. 1 art. 369 KK). Homielskamu pravakataru pahražaje da čatyroch hadoŭ kałonii sa štrafam.
Homielskija pravaabaroncy ŭžo napisali, što ŭ vypadku, kali jamu prysudziać pakarańnie, źviazanaje z pazbaŭleńniem voli, to jaho pryznajuć palitviaźniem.
«Naša Niva» — bastyjon biełaruščyny
PADTRYMAĆNa sustrečy Snapkova ź biznesam adzin z zaprošanych zaklikaŭ źniać videazvarot «Nado!» Jak adreahavali astatnija?12
Kamientary