Pravaabaronca Sudalenka raspavioŭ u liście, što jaho asudzili pa łžepakazańniach błohiera Kakojty, jaki zakidvaje ŚMI fejkami

«Siońnia roŭna hod, jak ja zajechaŭ u homielski centrał. Hod tamu ŭ hety dzień apieratyŭniki mianie zabrali na słužbovaj «Škodzie» u 11.00 ź IČU (izalatar časovaha ŭtrymańnia, — red.) i pryvieźli ŭ abłasny SK.

Ja tady byŭ absalutna pierakanany, što kryminalnaja sprava budzie pa č. 2 art. 342 KK RB, jakaja nie daje prava na ŭtrymańnie da suda pad vartaj, i dumaŭ, što adpuściać dadomu. Mienavita pra heta ja pisaŭ u svaim adkrytym liście, jaki byŭ nadrukavany paśla majho zatrymańnia.

Hetuju ŭpeŭnienaść mnie daŭ namieśnik ministra MUS Kazakievič, jaki napiaredadni pa TB u viečarovym efiry, kamientujučy vobšuk, jaki prajšoŭ u maim ofisie, kazaŭ mienavita pra druhuju častku, jakaja praduhledžvaje maksimalna dva hady pazbaŭleńnia voli.

Ale ja pamyliŭsia, ci dakładniej, nie čakaŭ takoha biezzakońnia, kali jany mnie dadali jašče i častku pieršuju art. 342 — da 3-ch hod, što dało lehalnaje prava zakryć da suda i mianie, i Taćcianu (Łasiccu, pamočnicu Sudalenki, — red.).

Adkul mnie było viedać, što 19 studzienia, kali ja jašče znachodziŭsia ŭ IČU i nie była jašče ŭzbudžanaja sprava,

u SK suprać mianie daŭ pakazańni Kakojta [Jaŭhien Katlaroŭ], jaki hałasłoŭna abvinavaciŭ mianie ŭ arhanizacyi ŭsich pratestaŭ u Homieli. Hetyja jahonyja pakazańni čałaviek u mantyi sudździ pakłaŭ u asnovu abvinavačvańnia ŭ prysudzie, a jaho troje kaleh z apielacyjnaha suda ich zaćvierdzili. U abodvuch vypadkach słužycieli Fiemidy adchilili majo chadajnictva ab dopycie Katlarova, ale, vidać, u ich była inšaja zadača — zasudzić mianie luboj canoj.

Kala 13.00 mnie było vystaŭlenaje abvinavačańnie pa abodvuch častkach art. 342 KK.

Ad takoha biezzakońnia ŭ mianie tady padniaŭsia cisk, z nosa pajšła kroŭ, vyklikali chutkuju.

Siarhieja Krasnova maim advakatam nie dapuścili ŭ SK, pryznali jaho śviedkam. Tak źjaviłasia Hanna Paŭluk, jakaja potym pacichu «źliłasia», i žonka naniała dziažurnaha advakata Viktoryju Famienka, jakaja dajšła sa mnoj da prysudu.

Pa sutnaści, hety kłoŭn Kakojta daŭ pakazańni jašče da ŭzbudžeńnia spravy, što niezakonna, ale hetaja akaličnaść nikoha nie ździviła. Ja patrabavaŭ zavieści suprać jaho kryminalnuju spravu za iłžeśviedčańnie abłasny SK, prakuraturu i KUS. Zaniali kruhavuju abaronu — pakul jaho vyharodžvajuć.

Mienavita pa hetaj pryčynie, ja dumaju, i sud zrabili zakrytym, a nie publičnym. Tamu što, inšym razam — nie da zakonaŭ, kali treba luboj canoj.

Paśla abieda mianie hod tamu spuścili ŭ padvał, dzie ja prasiadzieŭ u kletcy da 18.00. U 19.00 prykładna mianie zavieźli siudy ŭ SIZA. Zabrali hrošy, šnurki dy inš. Dali 10 chvilin pamycca ŭ dušy i voś užo hod jak ja tut.

Uźnikaje pytańnie — našto ŭładzie ŭsie hetyja lipavyja prysudy, jakija dakładna buduć admienienyja? Bo navat u SSSR pry mocnaj KPSS palityčnych represavanych reabilitavali. Ciapier inšy čas, i dumaju heta adbudziecca chutčej.

Značyć, treba dzień prastajać, dy noč pratrymacca. Inšaha tłumačeńnia tamu, što adbyvajecca ŭ Biełarusi, kali ŭ krainie ŭžo za tysiaču palityčnych, ja nie baču.

Dumaju, projdzie jašče hetaja mituśnia vakoł Kanstytucyi, i da vosieni pytańnie palityčnych usio roŭna daviadziecca vyrašać. Tamu, dumaju, da vosieni ŭsie palityčnyja buduć doma. Heta maje prahnozy z turemnaj kamiery, dzie radyjokropka i hazieta «SB» farmujuć maju navinnuju paviestku.

Za hety čas ja daviedajusia pra žyćcio ŭ kałonii. Mianie, jak ty viedaješ, u Vićbu (PK-3) vyznačyli na pieravychavańnie. Tudy pajedu da kanca studzienia. Ale ty pišy na hety adras, listy pojduć uśled za mnoj. Kali daviedajusia novy adras, adrazu paviedamlu.

20 studzienia 2022 h. Leanid».

Nahadajem, 18 studzienia 2021 hoda kiraŭnika homielskaj filii «Viasny» Leanida Sudalenku zatrymali pa darozie ŭ ofis i abvinavacili ŭ arhanizacyi i padrychtoŭcy dziejańniaŭ, što hruba parušajuć hramadski paradak (č. 1 art. 342 KK), i navučańni i padrychtoŭcy asobaŭ dla ŭdziełu ŭ takich dziejańniach, a taksama ich finansavańni abo inšym materyjalnym zabieśpiačeńni (č. 2 art. 342 KK).

3 listapada sud Centralnaha rajona Homiela pakaraŭ pravaabaroncu tryma hadami pazbaŭleńnia voli, a 14 studzienia Homielski abłasny sud adchiliŭ jaho apielacyjnuju skarhu.

26 studzienia palitźniavolenaha Leanida Sudalenku etapavali ŭ papraŭčuju kałoniju №3 «Vićba». 

Jaŭhien ža Katlaroŭ viadomy tym, što zakidvaje niezaležnyja miedyja, u tym liku i «Našu Nivu», fejkami. Ciapier da hetaha, vidać, dadalisia danosy i paklop. 

Pravakatar z Homiela sprabuje padmanuć niezaležnyja ŚMI. Časam atrymlivajecca

Stop-fejk: praź internet sprabavali ŭkinuć dezu pra toje, što źbity Cichanoŭski trapiŭ u balnicu

• 0
• 0
• 0
• 0
• 0
• 0
• 0
• 0