Paśla skandału ź Nieŭźlinym dva bujnyja kłany rasijskaj apazicyi — Navalnaha i Chadarkoŭskaha — raspačali adkrytuju vajnu na źniščeńnie, piša dla vydańnia Der Spiegel viadomy žurnalist Michaił Zyhar. Pa jahonych słovach, mnohija ŭ Rasii spadziavalisia na rasijskuju palityčnuju emihracyju i bačyli ŭ jaje lidarach alternatyvu Pucinu, ale ciapier hetyja nadziei mohuć całkam źniknuć.
Antyvajenny rasijski žurnalist i piśmieńnik Michaił Zyhar u svaim artykule dla niamieckaha vydańnia Der Spiegel kanstantavaŭ surjozny raskoł u rasijskaj apazicyi i pačatak adkrytaj vajny pamiž najbolš upłyvovymi jaje pradstaŭnikami.
Pa słovach Zyhara, ciapier z-za vajny va Ukrainie ŭźnikli adrazu dvie Rasii — unutranaja ź jaje žycharami i źniešniaja sa źjechaŭšymi ad represij i mabilizacyi rasijanami. Apošnich u śviecie, pavodle acenki žurnalista, naličvajecca ad 20 da 30 miljonaŭ čałaviek.
«U źniešniaj Rasii jość dźvie vielmi ŭpłyvovyja palityčnyja siły. Ich možna nazvać palityčnymi partyjami, choć sami jany siabie tak nie nazyvajuć. Chutčej, heta dva kłany i ŭ šyrokim sensie ich možna padzialić na kłan Michaiła Chadarkoŭskaha i kłan Alaksieja Navalnaha. Jany pracujuć jak sapraŭdnyja miedyja impieryi, aktyŭna vykarystoŭvajučy ŭsie ličbavyja płatformy i majučy ŭ svaich aktyvach mahutnyja niezaležnyja ŚMI ź vialikaj aŭdytoryjaj i šyrokaj padtrymkaj.
Hałoŭnaje adroźnieńnie Chadarkoŭskaha ad Navalnaha — heta ich metavaja aŭdytoryja i ŭsprymańnie hetych palitykaŭ znutry Rasii. Pakul pieršy siadzieŭ u turmie, a potym źjechaŭ u Łondan, druhi zastaŭsia ŭ Rasii i staŭ samym papularnym palityčnym błohieram krainy. Navalny staŭ hierojem dla miljonaŭ ludziej i pryciahnuŭ zusim novuju aŭdytoryju. Heta byli ŭžo nie libierały starejšaha pakaleńnia, jakija kaliści padtrymlivali Chadarkoŭskaha, a novaje, maładoje pakaleńnie, jakoje adkryła dla siabie Navalnaha praz YouTube.
Navalny zaniaŭsia realnaj palitykaj znutry Rasii, a Chadarkoŭski sprabavaŭ upłyvać na situacyju z emihracyi. Niahledziačy na svaju značnaść i ŭpłyŭ za miažoj, Chadarkoŭski nie moh pretendavać na vialikuju papularnaść u Rasii, pakolki bolšaść maładych rasijan pra jaho amal ničoha nie čuli.
Leanid Nieŭźlin (źleva) i Michaił Chadarkoŭski (sprava). Kadr z rasśledavańnia FBK
Z samaha pačatku vajny va Ukrainie pamiž FBK Navalnaha i hrupaj Chadarkoŭskaha išło supraćstajańnie za status lidara źniešniaj Rasii. Kamanda Chadarkoŭskaha sprabavała abjadnać apazicyju pad svaim kiravańniem, a prychilniki Navalnaha pieraškadžali hetym namahańniam, bo ličyli siabie samaj papularnaj apazicyjnaj siłaj u Rasii.
Pieršapačatkova zdavałasia, što śmierć Navalnaha prymiryć baki kanfliktu, i Chadarkoŭski navat lataŭ sustrakacca z žonkaj Navalnaha Julijaj asabista. Ale kanflikt nikudy nie źnik: FBK vypuściŭ sieryju filmaŭ «Zdradniki», dzie abvinavaciŭ aliharchaŭ 90-ych, uklučajučy Chadarkoŭskaha, u prychodzie da ŭłady Pucina, a sam Chadarkoŭski razam sa svaim blizkim siabram rasijskim aliharcham Leanidam Nieŭźlinym trapili ŭ skandał z napadam na supracoŭnika FBK Leanida Vołkava.
Paśla hetaha prymireńnie pamiž kłanami stała niemahčymym. Jany nienavidziać adzin adnaho i, jak ciapier padajecca, sprabujuć adzin adnaho zabić»,
— adznačaje Michaił Zyhar.
Na dumku Zyhara, skandał ź Nieŭźlinym moža istotna paŭpłyvać na źniešniuju Rasiju i mocna rasčaravać rasijan pa ŭsim śviecie. Žurnalist miarkuje, što rasijan, jakija biahuć ad vajny i represij, zaŭsiody abjadnoŭvali tolki apazicyjnyja ŚMI, jakija słužyli klučavymi instytutami hramadzianskaj supolnaści i dazvalali źniešniaj Rasii ŭsprymać siabie jak źjavu, a nie tolki jak asobnyja dyjaspary, raskidanyja pa płaniecie.
«Siońniašniaja vajna kłanaŭ niehatyŭna paŭpłyvaje i na žycharoŭ unutranaj Rasii. Mnohija bačyli ŭ zamiežnych palitykach alternatyvu Pucinu i spadziavalisia, što hetyja ludzi pryviaduć ich da «cudoŭnaj Rasii budučyni». Ciapier hetaja mara moža pamierci», — zajaŭlaje Zyhar.
Stała viadomaje imia mužčyny, zatrymanaha ŭ Mahilovie za nibyta napad na hubazikaŭcaŭ8
Kamientary