Raśsielhasnahlad spyniŭ uvoz kazachstanskaj sielhaspradukcyi ŭ Rasiju. U Kazachstanie heta nazvali handlovaj vajnoj. Mahčyma, sapraŭdnaja pryčyna kanfliktu — u palitycy.
Raśsielhasnahlad źviarnuŭsia da Kazachstana z patrabavańniem ab spynieńni ekspartu ŭ Rasiju zbožža, tamataŭ, piercu i nasieńnia słaniečnika. Pryčyna — nibyta ŭ kazachstanskaj pradukcyi ŭsio čaściej vyjaŭlajuć škodnikaŭ i chvarobatvornyja mikraarhanizmy.
Pradstaŭnik Zbožžavaha sajuza Kazachstana Jaŭhien Karabanaŭ nazvaŭ situacyju blizkaj da handlovaj vajny.
«Heta mahčymaja handlovaja vajna. U našych uładaŭ jość dva šlachi: albo admianić zabaronu na ŭvoz rasijskaj pšanicy, albo ŭvieści zabaronu na muku, małočku, miasnyja pradukty i hetak dalej. Ale treba ŭličyć, što ŭ adkaz budzie zabarona na tranzit vuhalu, nafty i naftapraduktaŭ… U druhim vypadku — vychad ź JeŭrAzES budzie łahičnaj pazicyjaj. I kaniec JeŭrAzES…» — skazaŭ jon.
Karabanaŭ dadaŭ, što heta, na jaho dumku, «aficyjnaje papiaredžańnie, što RF budzie vielmi žorstka adstojvać svaje ekanamičnyja intaresy».
Raniej stała viadoma, što Kazachstan viadzie pieramovy z Kitajem pra pavieličeńnie ekspartu hazu. Takim čynam, Kazachstan kankuryruje za kitajski rynak z Rasijaj i Turkmienistanam.
Akramia taho, Kazachstan zaniaŭ padkreślena niejtralnuju pazicyju ŭ adnosinach da vajny va Ukrainie i ŭstrymlivajecca ŭ AAN pry hałasavańniach pa ŭkrainskim pytańni.
U Maskvie nie raz hučali paproki na adras stepavaha susieda za toje, što tam nibyta pryhniatajecca ruskaja mova. A niekatoryja deputaty Dziarždumy adkryta nazyvali ziemli paŭnočnaha Kazachstana histaryčna rasijskimi terytoryjami (nasamreč, u Kazachstanie isnuje realnaje dvuchmoŭje, pracujuć škoły i VNU, a taksama ŚMI na rasijskaj movie. Ničoha padobnaha niama ŭ samoj Rasii, dzie navat vyvučeńnie ŭ škołach moŭ karennych narodaŭ u bolšaści rehijonaŭ zastałosia tolki na ŭzroŭni fakultatyvaŭ).
Raniej u intervju rasijskim prapahandystam Alaksandr Łukašenka zajaviŭ, što niekatoryja krainy postsavieckaj prastory «ad Rasii chočuć niešta ŭziać, a ŭzamien ničoha nie dać», zhadaŭšy Kazachstan.
Hetaja zajava vyklikała rezkuju reakcyju Astany. Ambasadara Biełarusi zaprasili na sustreču ź ministram zamiežnych spraŭ. «U ciapierašnich hieapalityčnych umovach vypracavany kiraŭnikom dziaržavy źniešniepalityčny kurs krainy dakazaŭ svaju efiektyŭnaść. U suviazi z hetym ministr zaklikaŭ biełaruski bok da nieabchodnaści abjektyŭna aceńvać pazicyju Astany ŭ dačynieńni da pracesaŭ, jakija adbyvajucca», — pisała pres-słužba MZS Kazachstana.
Chto taja žančyna, jakuju Marzaluk u efiry BT abazvaŭ «švallu z Hrodna», i što jana piša ŭ čatach? Raskazvajem pra doktarku Stefanovič26
Kamientary
Tak i tut prymusovyja dziaržaŭnyja arbitry pieraškadžajuć ludziam handlavać.