Google stvaraje «Džarvisa» — paŭnavartasnaha ŠI-sakratara
ŠI-sakratar — nastupnaja stadyja raźvićcia štučnaha intelektu, jakaja idzie paśla zvyčajnych čat-botaŭ i praduhledžvaje pieradaču častkovaha kantrolu nad vašymi pryładami napramuju niejrasietcy. Kancepcyja pamočnika «Džarvisa», pakazanaja ŭ filmach pra «Žaleznaha čałavieka», nabyvaje formu realnaha pradukta, jaki, pavodle ŭnutranych dakumientaŭ kampanii Google, budzie chutka anansavany pad toj ža nazvaj.
Kampanija Google stvaraje štučny intelekt (ŠI) pad pracoŭnaj nazvaj Project Jarvis («Prajekt Džarvis», ci prosta «Džarvis») — paŭnavartasnaha sakratara dla palahčeńnia i paskareńnia štodzionnych zadač čałavieka.
Karystalniki zmohuć daručyć «Džarvisu» samastojna ŭvodzić tekst u pošukaviku i źbirać infarmacyju ŭ internecie, zapaŭniać roznyja formy, braniravać kvitki ci navat rabić pakupki anłajn. Ciapierašniaja viersija prajekta pakul što adaptavanaja vyklučna dla pracy z braŭzieram Chrome, paviedamlajuć niekalki krynic vydańnia The Information.
Pa infarmacyi vydańnia, «Džarvis» zasnavany na ŭžo isnujučaj madeli štučnaha intelektu Gemini, i jahony anons moža adbycca ŭ śniežni. Adnak Google płanuje pravieści abmiežavanaje testavańnie praduktu pierad aficyjnym zapuskam, kab likvidavać mahčymyja pamyłki i ryzyki.
Reč u tym, što «Džarvis» zmoža ŭzajemadziejničać z asabistymi danymi karystalnikaŭ, takimi jak elektronnaja pošta, pracoŭnyja fajły i bankaŭskaja infarmacyja. Tamu Google padkreślivaje važnaść stvareńnia miechanizmaŭ abarony, kab abmiežavać dostup ŠI da adčuvalnaj infarmacyi karystalnikaŭ, piša The Information.
Akramia taho, Google razhladaje mahčymaść pašyreńnia funkcyjanału «Džarvisa» za miežy braŭziera Chrome. U budučyni instrumient zmoža vykonvać kamandy, źviazanyja z kiravańniem usioj sistemaj kampjutara ci smartfona, naprykład, adkryvać pracoŭnyja prahramy i raźmiaščać ich na ekranie, padzialilisia krynicy ŭ kampanii.
Zhodna z danymi The Information, «Džarvis» — tolki adzin z mnohich prajektaŭ, nakiravanych na aŭtamatyzacyju zadač u braŭziery. Naprykład, Microsoft pracuje nad niejrasietkaj Copilot Vision, a Apple raspracoŭvaje sistemu, jakaja budzie raspaznavać infarmacyju na ekranie pryład i kiravać ich prahramami. Startap Anthropic, u svaju čarhu, niadaŭna pradstaviŭ novuju viersiju viadomaj niejrasietki Claude, jakaja ciapier moža vykonvać prymityŭnyja kamandy karystalnika na aŭtanomnaje kiravańnie kampjutaram.
Usio heta śviedčyć ab tym, što ŭ raźvićci štučnaha intelektu nastupaje čarhovaja revalucyja — adychod ad standartnych i pasiŭnych čat-botaŭ da inicyjatyŭnych madelaŭ niejrasietak, jakija adnačasova ź ludźmi, byccam druhi piłot, buduć zdolnyja kiravać lubymi pryładami.
Dźvie Nobieleŭskija premii pakazvajuć, jakaja rola Google u śfiery štučnaha intelektu
Openal, Microsoft i Amazon damovilisia abaraniać čałaviectva ad mahutnych ŠI-sistem
Kaho ličyć prezidentam Biełarusi i jakaja zhuščonka lepšaja? Prateściravali ChatGPT-4 Omni — našumiełuju viersiju papularnaj niejrasietki
Ciapier čytajuć
Łukašenka choča pabudavać druhuju AES na patreby Rasii i akupavanych ukrainskich terytoryj. Ale jaho čakaje siurpryz9
Kamientary