Ekanamist Lvoŭski: Nasielnictva ŭ Biełarusi ŭžo chutčej za ŭsio mienš za 9 miljonaŭ

U novym vypusku tok-šou «Žyćcio-malina» ekanamist Leŭ Lvoŭski razvažaŭ pra demahrafičnuju prablemu Biełarusi.

Pa jaho acenkach, na siońnia ŭ Biełarusi žyvie mienš za 9 miljonaŭ čałaviek (aficyjnaja statystyka daje 9 miljonaŭ 156 tysiač čałaviek na pačatak 2024 hoda). Heta jon tłumačyć emihracyjaj nasielnictva za miežy krainy. Biełaruskaja statystyčnaja słužba nie moža narmalna paličyć emihracyju z-za taho, što pry vyjedzie ludzi nie dajuć nikomu spravazdačy pra heta. Acanić pamiery vyjezdu možna tolki padčas nastupnaha pierapisu nasielnictva.

«Heta bolš, čym 8,5 i mienš, čym 9 miljonaŭ», — udakładniaje Lvoŭski.

Pačynajučy z 2020 hoda ŭ Jeŭrasajuz, adpaviedna infarmacyi ab kolkaści ŭpieršyniu vydadzienych dazvołaŭ na žycharstva, vyjechała niekalki socień tysiač biełarusaŭ. Da hetaj ličby nieabchodna dadać biełarusaŭ, jakija žyvuć u inšych krainach pa-za miežami ES, u tym liku ŭ Rasii.

Kali ličyć, što z 2020-ha vyjechała 500 tysiač biełarusaŭ, to heta bolš za 5% nasielnictva. Adnak, kali ŭličvać, što vyjechali ŭ asnoŭnym ludzi pracazdolnaha ŭzrostu (ad 18 da 60 hadoŭ), to hetyja 500 tysiač treba adymać ad trochi bolš za 4 miljony pracazdolnaha nasielnictva.

«Praporcyja vielizarnaja, i heta dastatkova rezki adtok», — zaŭvažaje Lvoŭski.

Druhim faktaram, jaki paharšaje demahrafičnuju situacyju ŭ Biełarusi, źjaŭlajecca naturalnaje źmianšeńnie nasielnictva z-za nizkaj naradžalnaści. Lvoŭski nahadvaje, što źviestki pa naradžalnaści za apošnija try hady nie publikujucca. Apošniaja ličba za 2019 hod pakazvała, što na adnu žančynu prypadała 1,48 dziciaci. Z ulikam situacyi ŭ susiednich krainach, ekanamist dapuskaje, što ciapier hety pakazčyk moža raŭniacca 1,35.

Pavialičyć

Kali biahučyja trendy zachavajucca, prahnazuje Lvoŭski, to da kanca hetaha stahodździa biełarusaŭ budzie ŭ dva razy mienš, čym siońnia:

«Demahrafičnyja madeli mohuć pradkazvać na dastatkova doŭhija haryzonty. Śmiarotnaść źmianiajecca nie tak mocna. Naradžalnaść taksama. My možam skazać, što budzie z krainaj, kali biahučyja trendy naradžalnaści, śmiarotnaści i emihracyi zastanucca, jak ciapier. U takim vypadku naša nasielnictva źmienšycca ŭ dva razy.

Ale heta jašče «nie vysiečana ŭ kamieni», jašče niešta možna zrabić. Možna pačać niejkija narmalnyja reformy, kab naradžałasia trochi bolš dziaciej. Možna niešta jašče rabić sa śmiarotnaściu, asabliva z mužčynskaj. Možna niešta rabić z emihracyjaj i imihracyjaj», — vykazvaje svajo mierkavańnie ekanamist.

Na pohlad Lvoŭskaha, pa-roznamu možna aceńvać situacyju, kali nasielnictva Biełarusi źmienšycca ŭ dva razy:

«Jość šmat krain, dzie nasielnictva paŭtara miljona, try miljony. I my nie havorym pra ich vyradžeńnie. Nichto nie havoryć pra vyradžeńnie litoŭcaŭ, hruzin. Jość krainy, dzie nasielnictva našmat mienšaje. Pytańnie ŭ tym, jak my adaptujem ekanomiku za hety čas. I hałoŭnaje — nie vyradzicca samim jak biełarusam nie ŭ płanie kolkaści ludziej, a ŭ płanie jakaści».

• 1
• 0
• 1
• 0
• 0
• 3
• 0
• 0