Lidarka litoŭskich sacyjał-demakrataŭ admoviłasia ŭznačalić urad. Pryčyna niečakanaja
Siońnia Litoŭskaja sacyjał-demakratyčnaja partyja sabrałasia na pasiadžeńnie prezidyuma, kab abmierkavać farmiravańnie kiroŭnaj kaalicyi paśla pieramohi na vybarach u Siejm. Usie dumali, što novaj premjerkaj budzie lidarka hetaj partyi Vilija Blinkiavičucie, ale jana na pasiadžeńni paviedamiła kaleham, što nie choča hetaha. Admovu ad pretenzij na pasadu jana matyvavała ŭzrostam (joj 64 hady) i stanam zdaroŭja, piša LRT.
Na miesca premjera Blinkiavičucie prapanavała raniejšaha kiraŭnika ŁSDP (u 2017-2021 hadach) 45-hadovaha Hintaŭtasa Pałuckasa, padkreśliŭšy, što ŭ jaho bolš jakaściaŭ, nieabchodnych dla kiraŭnika ŭrada, takich jak maładość i enierhija.
Blinkiavičucie adznačyła, što prezidyum adzinadušna pahadziŭsia, što najlepšym kandydatam na pasadu źjaŭlajecca Pałuckas, jakomu daviarajuć amal 60 tysiač litoŭskich vybarščykaŭ. Paśla pasiadžeńnia prezidyuma jana dadała:
«Ja pierakananaja, što dla čałavieka majho ŭzrostu, jaki ŭžo na piensii, było b składana efiektyŭna vykonvać abaviazki premjera».
Na pytańnie, čamu ž jana pierad tym dva miesiacy zajaŭlała, što budzie ŭznačalvać urad, Blinkiavičucie kankretnaha adkazu nie dała. Pierad vybarami i padčas ich rytoryka na temu roli ŭ novym uradzie źmianiałasia niekalki razoŭ. Spačatku palityk zajaŭlała, što ŭznačalić sacyjał-demakrataŭ na vybarach i voźmie na siabie adkaznaść. U pracesie kampanii jana ŭsio čaściej abmiarkoŭvała svaju rolu va ŭradzie, a taksama farmavańnie ŭrada sumiesna z prezidentam, a pierad vybarami śćviardžała, što budzie premjer-ministram.
Ciapier ža zamiest premjerstva Vilija Blinkiavičucie praciahnie pracu ŭ Jeŭraparłamiencie.
Prezident Litvy Hitanas Naŭsieda, vystupajučy na telebačańni, paćvierdziŭ, što Blinkiavičucie była ź im adkrytaj, paviedamlajučy pra pryčyny, jakija pieraškadžajuć joj zaniać pasadu. Jon adznačyŭ, što šerah faktaraŭ, jakija mahli b uskładnić pracu na hetaj pasadzie, lepš nie ahučvać publična, pakolki heta było b nieetyčna.
Kamientary
Jany padstupnyja i chitryja:
Jany na kipci klejuć kipci,
Malujuć brovy na byvach🙂