Miedycynskuju techniku zachodniaj vytvorčaści Biełaruś zamianiaje na kitajskuju i tureckuju
Zamiest jeŭrapiejskaj i amierykanskaj miedycynskaj techniki Biełaruś pačała zakuplać anałahi ŭ Turcyi i Kitai. Heta skazana ŭ spravazdačy Ministerstva achovy zdaroŭja za 2023 hod, jakuju vydańnie «Fłahštok» atrymała ad arhanizacyi «Biełpoł».
U spravazdačy ministerstva adznačajecca, što admova zamiežnych kampanij ad pastavak u Biełaruś u suviazi z udziełam biełaruskaha režymu va ŭzbrojenaj ahresii suprać Ukrainy mieła kropkavy charaktar.
Praca pa pošuku alternatyŭnych varyjantaŭ pastavak miedycynskich vyrabaŭ, u pryvatnaści ŭ Kitai i Turcyi, pravodziłasia sumiesna z dypłamatyčnymi misijami za miažoj. Heta pryviało da pavieličeńnia ahulnaha abjomu zakupak z pamianšeńniem doli pastavak z krain Jeŭropy, ZŠA, Japonii i pavieličeńniem pastavak z Kitaja.
U pryvatnaści, dla pieraadoleńnia niedachopu sistem sterylizacyi i raschodnych materyjałaŭ da hazavych sterylizatary vytvorčaści 3m i Steris (ZŠA), była zaklučanaja damova na pastaŭku kartrydžaŭ z vytvorcam anałahičnaj pradukcyi Kordon Tip Saglik (Turcyja).
U suviazi z admovaj pracavać ź Biełaruśsiu šviedskaha vytvorcy Mölnlycke Health Care AB Ministerstva achovy zdaroŭja prapracavała mahčymaść pastaŭki pieraviazačnych srodkaŭ praz arhanizacyi AAN.
Za 2023 hod sistema achovy zdaroŭja Biełarusi častkova vyrašyła prablemy, źviazanyja z ramontam vysokatechnałahičnaha miedycynskaha abstalavańnia. Kali na pačatak hoda ŭ ramoncie mieła patrebu 25 adzinak abstalavańnia (9,4% ad ahulnaj kolkaści), to da kanca hoda zastavalisia nieadramantavanymi tolki 14 adzinak (4,8% parku).
Pra prablemy z pastaŭkaj miedycynskich preparataŭ i techniki ŭ lutym 2024 hoda paviedamlała MZS. Viadoma, što akramia vyšejnazvanych kampanij taksama admovilisia ad pastavak u Biełaruś polskaja Tarchomin Pharmaceutical Works Polfa S. A. (vytvorca preparataŭ ad epilepsii), brytanskaja Atnahs Pharma UK Limited (vytvorca preparataŭ dla lačeńnia asteaparozu), finskaja Orion Corporation (vytvorca preparataŭ, jakija ŭžyvajucca dla lačeńnia chvaroby Parkinsona i ankałohii).
U 2018 hodzie šeryja schiemy pastaŭki miedycynskaj techniki stali pryčynaj vialikaha karupcyjnaha skandału ŭ sistemie Ministerstva achovy zdaroŭja. U pryvatnaści, na terytoryi trecich krain stvaralisia padstaŭnyja firmy, jakija padavali Ministerstvu achovy zdaroŭja dla ŭdziełu ŭ zakupkach padroblenyja siertyfikaty na pradukcyju. Ašukanskaja schiema, u jakuju byli ŭciahnutyja najvyšejšyja čynoŭniki ministerstva, spraŭna pracavała šmat hadoŭ, pakul nie vyjšła najaŭ.
Kamientary