SK nazvaŭ imiony tych, chto skinuŭ vybuchoŭku na bazu AMAPa ŭ Minsku ŭ 2021 hodzie
Pavodle viersii śledstva, da skidvańnia vybuchoŭki na bazu AMAP va Uruččy datyčnyja były amapaviec Pavieł Kułažanka i były vajskoviec Vital Paciechin. U krainie mužčyn ciapier niama. Suprać ich zaviedziena śpiecyjalnaja vytvorčaść, rychtujecca zavočny sud.
Jak piša SK, śledstvam ustanoŭleny vykanaŭca terakta, arhanizavanaha 25 vieraśnia 2021 hoda. Pavodle ANT, heta Vital Paciechin. Pavieł Kułažanka nazvany arhanizataram.
Pa materyjałach spravy, Vital Paciechin «pry sadziejničańni niedaśviedčanych kantrabandystaŭ» pieramiaściŭ z Ukrainy dron ź vialikaj hruzapadymalnaściu i na praciahu niekalkich miesiacaŭ vučyŭsia im kiravać. Pavodle SK, u načny čas na terytoryi svajho ŭčastka ŭ Minskim rajonie jon taksama ekśpierymientavaŭ sa składam zapalnaj sumiesi.
Da vykanańnia płanu Paciechin, paviedamlaje SK, prystupiŭ u noč z 24 na 25 vieraśnia.
«Jon zahadzia padrychtavaŭ šlachi adychodu z krainy i vykarystoŭvaŭ miery kanśpiracyi, u tym liku maski i adzieńnie ciomnych koleraŭ biez admietnych prykmiet, pakinuŭ doma mabilny telefon, pryparkavaŭ aŭtamabil u zacišnym miescy, budučy ŭpeŭnienym u svajoj ananimnaści i biespakaranaści», — piša SK.
Z dapamohaj bieśpiłotnika, paviedamlaje śledstva, Paciechin skinuŭ dźvie piacilitrovyja butelki z zapalnaj sumieśsiu na bazu AMAP.
Jakich-niebudź značnych paškodžańniaŭ vybuchi bazie nie nanieśli.
Paciechin ža zdoleŭ uciačy za miažu.
Suprać Paciechina i Kułažanki zaviedzieny kryminalnyja spravy pa šmatlikich artykułach, siarod jakich — akt teraryzmu, učynieny arhanizavanaj hrupaj; zamach na akt teraryzmu, učynienaha paŭtorna, arhanizavanaj hrupaj; stvareńnie arhanizacyi dla ažyćciaŭleńnia terarystyčnaj dziejnaści, kiraŭnictva i ŭdzieł u takoj arhanizacyi; stvareńnie, kiraŭnictva i ŭdzieł u arhanizacyi, jakaja pryznana terarystyčnaj; niezakonny vyrab, zachoŭvańnie i našeńnie pradmieta, dziejańnie jakoha zasnavana na vykarystańni haručych rečyvaŭ, učynienyja paŭtorna, hrupaj asob pa papiaredniaj zmovie i h.d.
Śledstvam nakładzieny aryšt na majomaść abvinavačanych ahulnym koštam kala 240 tysiač biełaruskich rubloŭ.
Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin8
Kamientary