Vyjezd ź Biełarusi na aŭto za miažu stanie płatnym na pastajannaj asnovie
Miascovy zbor za pierasiačeńnie miažy, abo «kavidny» zbor, źjaviŭsia viasnoju 2021 hoda. Pieršapačatkova dekłaravałasia, što sabranyja srodki pojduć «na papiaredžańnie i baraćbu z karanavirusnaj infiekcyjaj». Miascovy zbor dziejničaje da 1 lutaha 2025 hoda. Ale paśla Novaha hoda vyjezd ź Biełarusi nie stanie biaspłatnym.
Niama ničoha bolš pastajannaha, čym časovaje
Rašeńni ŭvodzić zbor za pierasiačeńnie miažy farmalna prymalisia na rehijanalnym uzroŭni. Hrodzienskaja vobłaść stała pieršaj, chto ŭvioŭ hety padatak. Abłasny saviet deputataŭ pryniaŭ rašeńnie źbirać 1 bazavuju vieličyniu ź lehkavych i hruzavych aŭto ahulnaj vahoj da 5 ton z 1 maja 2021 hoda pa 1 studzienia 2023 hoda.
Krychu paźniej da Hrodzienskaj vobłaści dałučylisia Bresckaja, Viciebskaja i Homielskaja.
Pačatkova dekłaravałasia, što sabranyja srodki pojduć na baraćbu z COVID-19. Ale, niahledziačy na toje, što da kanca 2022 hoda ŭsie zabylisia na pandemiju, miascovyja deputaty vyrašyli praciahnuć dziejańnie miascovaha zboru da 1 studzienia 2025 hoda.
Dniami pieršy namieśnik ministra finansaŭ Dźmitryj Kijko paviedamiŭ, što z 1 studzienia miascovy zbor z časovaha pierafarmatujecca ŭ pastajanny i stanie zvyčajnym padatkam biez pryviazki da baraćby ź jakoj-niebudź prablemaj.
Kolki za dzień dziaržava zarablaje na vyjazdžajučych za miažu?
Navat z ulikam uviedzienych susiednimi krainami ES abmiežavańniaŭ na ŭjezd aŭto ź biełaruskimi numarami, ź Biełarusi ŭ ES za sutki vyjazdžaje kala 1300 lehkavych aŭto. Heta 52 tysiačy biełaruskich rubloŭ, što bolš za 15 tysiač dalaraŭ za sutki ci kala paŭmiljona dalaraŭ za miesiac.
I heta biez uliku małatanažnych hruzavych aŭto (da 5 ton), ličbu jakich niemahčyma vyłučyć z ahulnych danych na hruzavym kirunku.
Ale 1 b.v. (40 rubloŭ na ciapierašni momant) — heta nie adzinyja abaviazkovyja vydatki, jakija musiać płacić padarožniki. Za rehistracyju ŭ elektronnaj čarzie lehkavoha aŭto abo matacykła daviadziecca zapłacić jašče 12 rubloŭ. Za aŭtobusy i hruzaviki płaciać pa 40 rubloŭ. Płaciež abaviazkovy, navat kali čarhi zusim niama.
Na zvarotnym šlachu treba prachodzić dezinfiekcyju ŭsich transpartnych srodkaŭ, akramia matacykłaŭ. Dla lehkavikoŭ heta 2 rubli.
Takim čynam atrymlivajecca, što za toje, kab vyjechać na lehkavym aŭto ź Biełarusi ŭ ES i viarnucca, davodzicca vydatkoŭvać minimum 54 rubli (40 padatak + 12 eł. čarha + 2 dezinfiekcyja).
Pryvitańnie z 2013-ha abo 100 dalaraŭ z nosa
Nahadajem, što zrabić vyjezd za miažu płatnym — davoli daŭniaja ideja Łukašenki. Jon ahučyŭ jaje jašče ŭ 2013 hodzie, kali ŭsie miežy byli adkrytyja, a biełarusy znachodzilisia na pieršaj pazicyi ŭ śviecie pa kolkaści atrymanych šenhienskich viz. Tady palityka chvalavała, što biełarusy nadta šmat jeździać na zakupy ŭ ES.
«Našy ludzi siońnia da 3 młrd dalaraŭ u hod vyvoziać za miažu ŭ Jeŭrasajuz i ŭvoziać barachło, jakoje my taksama vypuskajem. Tak voś, ja daŭno daručyŭ: navat kali vyjazdžaješ za miežy, nie važna navošta, — zapłaci pošlinu. Heta budzie tak: my ciabie na miažy absłuhoŭvajem, płaci 100 dalaraŭ z nosa i jedź za miažu», — kazaŭ Łukašenka ŭ vieraśni 2013 hoda.
«Naša Niva» — bastyjon biełaruščyny
PADTRYMAĆ
Kamientary