«Heta kardynalna mianiaje ŭvieś raskład u viadzieńni bajavych dziejańniaŭ». Što Z-błohiery dumajuć pra ŭdary ATACMS pa Rasii?
Z-błohiery panikujuć z nahody mahčymaści vykarystańnia Ukrainaj dalnabojnych rakiet.
Navina ab dazvole z boku sajuźnikaŭ Ukrainie vykarystoŭvać rakietu vialikaj dalnaści vyklikała burnuju reakcyju siarod Z-błohieraŭ.
«RSZA HIMARS ź jaje štatnymi bojeprypasami nie adnosiacca da apieratyŭna-taktyčnaha ŭzbrajeńnia. Jana zdolnaja traplać u celi na taktyčnaj adlehłaści, heta značyć, u frantavoj i pryfrantavoj zonie.
Usio mianiajecca, kali ŭstanoŭka M142 HIMARS zaradžajecca balistyčnymi rakietami ATACMS. U hetym varyjancie jana stanovicca ATRK — apieratyŭna-taktyčnym rakietnym kompleksam, jaki zdolny nanosić paražeńnie pa hłybokim tyle. A heta ŭžo nie prosta abstreł prymiežnaj vioski ŭ Biełharadskaj vobłaści.
Heta kardynalna mianiaje ŭvieś raskład u viadzieńni bajavych dziejańniaŭ. Heta adrazu aznačaje, što pad pahrozaj buduć znachodzicca stratehičnyja abjekty, naprykład takija jak atamnyja stancyi, mietałurhičnyja pradpryjemstvy i inšyja važnyja abjekty, jakija ŭpłyvajuć jak na ekanomiku Rasii, tak i na vajenna-pramysłovy kompleks krainy. Adčuvajecie roźnicu?», — tłumačyć kanał ZAPISKI VJeTJeRANA i zaklikaje:
«Udary ŭhłyb terytoryi Rasii apieratyŭna-taktyčnymi kompleksami — heta pierachod vajny na zusim novy ŭzrovień. Heta surjoznaje pavyšeńnie stavak. Adkaz z našaha boku pavinien być suraźmierany pahrozam. Až da prymianieńnia taktyčnaj jadziernaj zbroi».
Błohier Rybaŕ udakładniaje, što samym niebiaśpiečnym pry vykarystańni ATR ATACMS źjaŭlajecca chutkaść ich palotu:
«Na adlehłaść 120 km ATR dalacić za 1 chvilinu 20 siekund, a na maksimalnuju [adlehłaść] 300 km — za 3 chviliny 20 siekund».
Rybaŕ prahnazuje, što USU pry naniasieńni ŭdaraŭ nie abmiažujecca Kurskaj vobłaściu. Pad ataku moža patrapić «luby abjekt u lubym rehijonie». Hałoŭnymi siarod ich źjaŭlajucca aeradromy taktyčnaj i armiejskaj avijacyi.
Udarym pa amierykanskich spadarožnikach
«U vypadku realnaha ažyćciaŭleńnia ŭdaru USU amierykanskimi rakietami ATACMS pa rasijskaj terytoryi nieminuča adbudziecca imklivaje spaŭzańnie da kryzisnaj situacyi, anałahičnaj toj, jakaja skłałasia pamiž SSSR i ZŠA ŭ 1962 hodzie, i jakaja atrymała nazvu «Karybskaha kryzisu», — prahnazuje Ramzaj i prapanuje ŭ jakaści maksimalna efiektyŭnaha i demanstratyŭnaha adkazu ŭdaryć pa amierykanskaj spadarožnikavaj hrupoŭcy nad Rasijaj.
«Udar pa spadarožnikach budzie łahičny i apraŭdany, bo mienavita spadarožniki ZŠA buduć zabiaśpiečvać naniasieńnie rakietnaha ŭdaru ATACAMSami abo «Štorm Šedaŭ» i «Skalpami». Pry hetym niejak prykryć ci abaranić svaje spadarožniki amierykancy nie zmohuć. Da taho ž źniščeńnie niekalkich klučavych spadarožnikaŭ raźviedki i suviazi rezka źnizić bajavyja mahčymaści amierykancaŭ.
Znoŭ ža, taki ŭdar demanstratyŭna ihnaruje ŭsie papiaredžańni amierykancaŭ ab tym, što napad na ich spadarožniki pryraŭnoŭvajecca da napadu na ZŠA. I ŭ hetym vypadku ŭžo amierykancy akazvajucca pierad vybaram dalejšaj eskałacyi kanfliktu ci vychadu na pieramovy», — tłumačyć błohier.
Kali Maskva zastaniecca bieź śviatła, to ŭdarym pa atamnych stancyjach
Błohier Fighterbomber prapanoŭvaje prapanuje pahladzieć na toje, nakolki paśpiachova ŭkrainski bok budzie vykarystoŭvać dazvoł i jakija celi budzie atakavać. U zaležnaści ad hetaha i adkazvać.
«Dumaju, zrazumieła, što kali nam razvalać niejki čarhovy NPZ, ci most, ci dziasiatak takich, to ŭ našaj taktycy i vybary celaŭ ničoha nie źmienicca.
A voś kali Maskva zastaniecca na dzień-dva bieź śviatła, to, dumaju, nastupny ŭdar budzie ŭžo nie pa padstancyjach, a pa samich stancyjach, u tym liku atamnych.
Kali Maskva bieź śviatła pasiadzić bolš za paru dziańkoŭ, to varta čakać spačatku papieradžalnych strełaŭ jadrenbatonami, a potym užo strełki hadzińnikaŭ jadziernaha apakalipsisu ŭstanuć na nuli».
Praŭda, błohier dapuskaje, što žorstkaje rašeńnie Rasija budzie adciahvać da momantu ŭstupleńnia na pasadu Trampa, na jakoha ŭskładaje nadzieju, što «jon tam niešta parašaje».
Błohier upeŭnieny, što abjektami atak z boku USU stanuć aeradromy i apieratyŭnyja placoŭki.
«Nie ŭsia avijacyja ŭ nas vyviedziena za radyus paražeńnia rakietami, i ŭsiu jaje vyvieści niemahčyma. (…) Rakiety dalaciać chutčej za toje, jak samaloty abo viertaloty ŭźlaciać» — zaŭvažaje Fighterbomber i prapanoŭvaje:
«Što tut možna zrabić? Ruchacca. Ruch — žyćcio. Źmianiać aeradromy i stajanki, žyć u samalotach. Žorstka adkazvać niahledziačy ni na što. Na vajnie jak na vajnie. Pakul što inšych varyjantaŭ ja nie baču».
Łukašenka choča, kab kiraŭniki rajvykankamaŭ pryznačali i dyrektaraŭ pryvatnych struktur16
Kamientary