«Usio ŭ našych rukach». Kamandzir kalinoŭcaŭ Pavieł Šurmiej sustreŭsia ź biełarusami Vilni
23 listapada ŭ Vilni vystupiŭ kamandzir pałka Kalinoŭskaha Pavieł Šurmiej. Abmierkavali aryšt Vieramiejčyka, reformy ŭ pałku i rekrutynh dziaŭčat.
Dla sustrečy z Šurmiejem znajšłosia nievialičkaje pamiaškańnie ŭ prastory «Zamak», para dziasiatkaŭ čałaviek zapoŭniła jaho całkam. Mužčyny ŭ ciomnym, niekalki žančyn, maskirovačnaja sietka, ściahi pałka, Litvy i Ukrainy — u takim asiarodździ i vystupali kalinoŭcy.
Akramia Paŭła Šurmieja, z naviedvalnikami hutaryli kiraŭnik pres-słužby PKK Ernest i były dobraachvotnik Alaksandr Kłačko. Pačali z chviliny maŭčańnia, kab ušanavać pamiać zahinułych abaroncaŭ Ukrainy. A potym raskazali pra metu sustrečy — davieści infarmacyju pra pieramieny i reformy ŭ pałku. Paśla vilenskaj sustrečy ŭ kalinoŭcaŭ zapłanavana jašče niekalki sustreč ź biełarusami ŭ Polščy.
Pytańnie reformaŭ, raskazvaje Ernest, naśpiavała daŭno. Heta tyčyłasia i finansavaj, i infarmacyjnaj palityki pałka:
«Połk išoŭ da stahnacyi, da taho, što peŭnyja ludzi chacieli pieratvaryć jaho ŭ svaju pryvatnuju vajskovuju kampaniju. Bolšaść ludziej z hetym nie pahadziłasia, bo ludzi pryjazdžali da nas z metaj vyzvaleńnia Biełarusi».
Sutnaść reformaŭ padsumavaŭ Šurmiej: pazbavicca ad ludziej, dla jakich vyzvaleńnie Biełarusi — heta biznes. Ciapier u pałku, raskazvajuć kalinoŭcy, isnuje adnosna dobra vypracavanaja ijerarchija i razumieńnie aŭtarytetaŭ, niama raskołaŭ ni ŭ samim pałku, ni ŭ jaho pres-słužbie.
Šurmiej taksama vykazaŭsia datyčna byłoha raskołu ŭ pres-słužbie pałka:
«Tak stałasia, što ŭsie klučy ad našych telehram-kanałaŭ u hramadzianki Ukrainy, žonki [vajara] Vaniša (Vaniš — kalinoviec, adzin z asnoŭnych fihurantaŭ kanfliktaŭ 2022 hoda ŭ Pałku Kalinoŭskaha — NN). Jana vałodaje hetymi klučami, i my razumiejem, što zakonnym šlacham ich nie atrymajem nazad. Samaje hałoŭnaje — na žal, jutub-kanałam ciapier vałodaje žonka Vaniša, a tam materyjały, źniatyja našymi chłopcami na bajavych zadańniach».
Kiraŭnik pres-słužby pałka Ernest raskazaŭ, čym ciapier zajmajecca eks-kiraŭnik pałka Dzianis «Kit» Procharaŭ.
Pavodle Ernesta, «Kit» ciapier kiruje fondam pałka, to-bok jaho finansami:
«Dzianis «Kit» sam pieradaŭ svaje paŭnamoctvy Paŭłu Šurmieju i ciapier kiruje fondam Kastusia Kalinoŭskaha».
Pavodle słovaŭ Ernesta, Procharaŭ pracuje nad vyśviatleńniem złoŭžyvańniaŭ, jakija raniej adbyvalisia ŭ pałku. Ciapier idzie poŭnaja pravierka fondu i praca nad tym, kab palepšyć finansavuju prazrystaść u im.
Pavieł Šurmiej raskazaŭ padrabiaźniej, jak Dzianis Procharaŭ uznačaliŭ fond:
«Tak stałasia, što Dzianis Procharaŭ — hramadzianin Ukrainy. Tamu ŭ pačatku 2022-ha jaho i zrabili zasnavalnikam fondu, jon im i zastavaŭsia. Ale ŭ fondu byŭ i dyrektar, jaki zajmaŭsia ŭsimi spravami. Heta byŭ Vaniš.
Kali pačalisia reformy ŭ pałku, «Kit» byŭ adzinym, chto jurydyčna adkazvaŭ za spravy ŭ fondzie. Vaniš nie žadaŭ dobraachvotna addać pasadu dyrektara, [tamu] heta [zvalnieńnie] było zroblena pa ŭkrainskim zakanadaŭstvie, pa statucie. My vyrašyli, što zaraz raźbiaremsia va ŭsich spravach, jakija byli ŭ fondzie za hety čas. Na žal, tam ciažka raźbiracca, bo były dyrektar i inšyja supracoŭniki nie dali dostupu ni da jakich dakumientaŭ i nie žadajuć heta rabić».
A potym pryjšoŭ čas pytańniaŭ z zały. Pradkazalna, što samaja haračaja siońniašniaja tema, datyčnaja pałka — los Vasila Vieramiejčyka, eks-kalinoŭca, jakoha aryštavali ŭ Vjetnamie i departavali ŭ Biełaruś.
Voś jak pra historyju Vieramiejčyka vykazvajecca ciapierašni kamandzir pałka Pavieł Šurmiej:
«Ad samaha pačatku robicca ŭsio mahčymaje. Kab usie zrazumieli — niekatoryja spravy treba rabić cicha. Ale kab niechta nie skazaŭ, što možna zamaŭčać prablemu».
Pavodle pradstaŭnikoŭ PKK, niama dakładnaj infarmacyi, čamu Vieramiejčyku zabaranili ŭjezd va Ukrainu, jość tolki viersii. Viersija Vasila Vieramiejčyka — što ŭ jaho byŭ kanflikt z byłym štabam PKK. Šurmiej taksama dadaŭ, što čaść, dzie słužyŭ Vieramiejčyk, dakładna nie rabiła zabarony na jaho ŭjezd va Ukrainu.
«Va Ukrainie vyśviatlajuć abstaviny, čamu ŭ Vasila była zabarona. Treba viedać, što i jak było. Kali čałaviek žadaje trapić va Ukrainu, — navat były vajar, — byvajuć vypadki, kali čałaviek niešta robić, da čaho tyja ž pamiežniki mohuć pastavicca pa-słužbovamu. Jak i litoŭskaja dziaržava, jakaja pahladzieła kiejs Vasila i pastaviła ptušačku [adnosna zabarony]. Kali b jon pajšoŭ inšym šlacham, było b pa-inšamu», — padzialiŭsia Pavieł Šurmiej.
Pavodle danych Šurmieja, Vieramiejčyk sprabavaŭ pryjechać va Ukrainu jašče ŭ 2022-m. Na dumku Paŭła, jašče krychu času — i, kali b Vasil pažadaŭ, jon zdoleŭ by trapić va Ukrainu.
Pierajšli da inšych tem. Žančyna z zała, vałanciorka, paprasiła pastavić na kantrol dapamohu vieteranam — aktualnaje na siońnia pytańnie. Abmierkavali karyść paramilitarnych kłubaŭ, dzie byłyja vajary mohuć dzialicca dośviedam.
Taksama ŭ kalinoŭcaŭ zapytali pra Maksima Ralko — inšaha źniavolenaha kalinoŭca, jakoha pakazali niadaŭna ŭ prapahandysckim filmie. Hramadskaści nieviadoma, jak i kali Ralko trapiŭ u Biełaruś. Nie viedajuć hetaha i ŭ pałku, pryznaŭsia Šurmiej:
«Na žal, jašče padčas znachodžańnia ŭ pałku Ralko pavodziŭ siabie tak, što na jaho źviartali ŭvahu. Jon zvolniŭsia niedzie ŭ studzieni 2024 hoda. I nam taksama ŭsim cikava, jak jon trapiŭ u Biełaruś.
My nie vałodajem infarmacyjaj, ale my ŭsie vielmi ździŭlenyja. Vielmi dziŭna, što ludzi trymajuć u siabie ŭ hałavie — vajavać suprać režymu i potym pajechać nazad u Biełaruś. Dyj uvohule [dziŭna] vybirać niebiaśpiečnyja krainy ŭsim tym, chto suprać režymu».
Dalej było bolš emacyjnaje pytańnie. Połk prajšoŭ praź vialiki skandał, jaki ŭ niečym papsavaŭ jaho reputacyju. Čamu ž kalinoŭcy, jakija pryjechali ŭ Vilniu, zastajucca ŭ im?
Ernest adznačyŭ, što ŭ jaho ŭsprymańni połk Kalinoŭskaha — heta pieradusim ideja:
«My pajechali [ŭ połk] dziela idei, nie dziela Mikoły ci Vaniša (kalinoŭcy, fihuranty kanfliktaŭ u pałku 2022 hoda — NN). Nas abjadnoŭvaje ideja, my ŭ jaje vierym. U peŭnym momancie my daviarali peŭnym ludziam, hetaje razumieńnie potym źmianiłasia. Ale my nie mahli stracić połk, bo heta ideja, i jana budzie zastavacca, pakul nie realizujecca ŭ čas vyzvaleńnia Biełarusi».
Jaho słovy dapoŭniŭ Pavieł Šurmiej. Na dumku «Dziadźki» (pazyŭny Šurmieja), nichto nie zrobić nas ščaślivym za nas, nie viernie nas u Biełaruś. Ludzi pavinny razumieć — usio ŭ našych rukach. Da kalinoŭcaŭ moža być šmat pytańniaŭ pa bajavoj pracy, ale heta tamu, što kalinoŭcaŭ pavinna być u dziasiatki razoŭ bolš:
«Treba razumieć, jaki vybar staić pierad nami. Abo my zastaniemsia ŭ Polščy, Litvie, niechta dalej, pražyviem usio žyćcio ŭ emihracyi, zvykniemsia z hetym. Ale, kali my žadajem viarnucca ŭ Biełaruś, nichto za nas nie zrobić nas ščaślivymi, nie viernie nas. Moža skłaścisia, što inšyja krainy za nas vyrašać naš los i naviažuć nam ichnija ŭmovy, tady nie treba budzie hetym umovam ździŭlacca. Voś praz heta ŭsio my ŭ pałku, niahledziačy ni na što.
Niechta moh by skazać: «Dziadźka», ty ž stasavaŭsia i ź Mikołam, i z Vanišam. Ale ŭ mianie jość meta — vyzvaleńnie Biełarusi. Połk Kalinoŭskaha — samaje vialikaje padraździaleńnie, i takoje, u jakim naładžany rekrutynh. Čuŭ, jak inšyja padraździaleńni chacieli pajści svaim šlacham. Ale rekrutynh, administratyŭka, tyłavaja praca — chto budzie hetym zajmacca?»
Zhadali kalinoŭcaŭ Siarhieja Dziohcieva i Jana Dziurbiejku, jakija ŭ 2022-m trapili ŭ rasijski pałon. Pavodle kalinoŭcaŭ, za ŭvieś hety čas pra ich nie było nijakich źviestak. Dziohcieŭ i Dziurbiejka ŭklučanyja ŭ abmiennyja śpisy.
Dalej pierajšli da losu vieteranaŭ PKK. Šurmiej parazvažaŭ, što kali vajar źjazdžaje z frontu, jon užo musić viedać, čym budzie zajmacca. U hetym vypadku dapamoha dla vieteranaŭ — prapanavać im miesca, dzie jany mahli b pracavać. Taksama patrebnaja padtrymka paranienym, tym, chto nie moža pracavać, dla hetaha treba zadziejničać fondy i reabilitacyjnyja centry. Asobnaja ŭvaha patrebnaja siemjam zahinułych vajaroŭ.
Prablemy vieteranaŭ — asobny bol dla Alaksandra Kłačko, byłoha kalinoŭca:
«Na siońnia demakratyčnyja siły vielmi aściarožna padymajuć pytańnie vieteranaŭ i ich siemjaŭ — nie kažu pra vajaroŭ — na mižnarodnym uzroŭni. Liču, što tut treba rabić bolšy akcent. Lubaja nacyja nie zasłuhoŭvaje isnavańnia, kali jana nie abaraniaje vajaroŭ — dziejnych i byłych.
Pierastańcie bajacca nazyvać rečy svaimi imionami i pačnicie padtrymlivać humanitarnyja kiejsy vieteranaŭ i ich siemjaŭ. Heta našy biełarusy, jakija śviadoma zrabili vybar baranić svaje kaštoŭnaści, našu svabodu».
Jašče adno prykładnoje pytańnie — rekrutynh. Kalinoŭcy asobna adznačyli, što hatovyja bačyć u svaich šerahach i mužčyn, i žančyn. Datyčna apošniaj katehoryi Šurmiej raskazaŭ pra adzin vypadak:
«U šerahach pałka jość i ŭkraincy, i ŭkrainki. Niadaŭna kamandzir adnaho z bajavych padraździaleńniaŭ spytaŭ, ci biarom my dziaŭčat, i skinuŭ kiejs 19-hadovaj ukrainki, jakaja choča da nas dałučycca. Kab usie razumieli, heta bajavoje padraździaleńnie. Maju nadzieju, što ŭsio atrymajecca. Jon skazaŭ: nie toje kab mužyki skončylisia, ale da mianie ciapier tolki žančyny chočuć trapić».
Na zakančeńnie kalinoŭcy pa prośbie zały paabiacali viarnucca z frontu žyvymi i zdarovymi.
«Naša Niva» — bastyjon biełaruščyny
PADTRYMAĆ
Kamientary
Adhadka: kamandzir PKK Šurmiej.