«Łukašenku vidavočna ciesna i niecikava ŭ Biełarusi». Ambicyjnyja prapanovy na rytualnym samicie

Samity ADKB (ci, jak heta aficyjna nazyvajecca, pasiadžeńni Rady kalektyŭnaj biaśpieki) pravodziacca raz na hod. U 2023 hodzie zasiadali ŭ Minsku, sioleta — u Astanie.

Usio adbyvałasia pavodle zvykłaha rytuału. Kiraŭniki dziaržaŭ kazali šmat ahulnych słoŭ pra ŭmacavańnie biaśpieki, źniešnija pahrozy, abjadnańnie namahańniaŭ i inšaje.

Asablivaści samitu

Byli i peŭnyja asablivaści ciapierašniaha samitu. Najpierš źviartaje ŭvahu toje, što Uładzimir Pucin sumiaściŭ pajezdku na samit ź dziaržaŭnym vizitam u Kazachstan. I tamu jahonamu pryjezdu spadarožničali pyšnyja ŭšanavańni, z usimi nieabchodnymi i navat praźmiernymi rytuałami, jak heta ŭmiejuć rabić na Uschodzie. Dla Pucina, na jakoha ciśnie vialiki ciažar mižnarodnych prablem, heta vyhladała jak suciašeńnie.

Ale bolš važny ahulny fon, na jakim adbyvaŭsia samit. Vajna Rasii suprać Ukrainy stvaraje ŭsio novyja vyprabavańni dla ADKB. Status arhanizacyi praduhledžvaje, što sajuźniki pavinny pryjści na dapamohu krainie, suprać jakoj čynicca źniešniaja ahresija. I pry vialikim žadańni nastup ukrainskaha vojska ŭ Kurskaj vobłaści možna było interpretavać jak napad na suvierennuju terytoryju adnaho ź siabroŭ vajenna-palityčnaha sajuza.

U takim vypadku chaŭruśniki pavinny pryjści na dapamohu. Možna było čakać, što budzie praviedzieny terminovy, nadzvyčajny samit ADKB, zroblenyja zachady dla padtrymki Rasii. Ci chacia b pryniataja niejkaja palityčnaja zajava salidarnaści z RF.

Adnak ničoha hetaha nie adbyłosia. «Kurskaja bitva» zastałasia niezaŭvažanaj sajuźnikami. Na dapamohu Rasii pryjšła Paŭnočnaja Kareja. U epičnaj kanfrantacyi z Zachadam, jakuju RF viadzie nibyta ad imia «suśvietnaj bolšaści», ADKB nijakaha ŭdziełu nie biare. Moŭčki naziraje ci nie zaŭvažaje. Adna tolki Biełaruś usialak padtrymlivaje Rasiju.

Armienija i kryzis u ADKB

Jašče adna prykmieta kryzisnych pracesaŭ u ADKB źviazanaja z Armienijaj. Sajuźniki nie padtrymali Jerevan u jaho vajennym kanflikcie z Baku. U vyniku Armienija ŭsio bolš addalajecca ad ADKB. Kali hod tamu Jerevan prosta bajkatavaŭ čarhovy samit u Minsku, to ciapier kraina aficyjna zamaroziła svajo siabroŭstva ŭ hetaj arhanizacyi, nie ŭdzielničaje ŭ samicie i stała bolš aktyŭna raźvivać svaje adnosiny z Zachadam.

Što da vystupaŭ na samicie, to jany prahučali pavodle zvykłaha scenaru. Faktyčna tolki Łukašenka rezka asudziŭ pazicyju Zachadu, NATA, kazaŭ pra vializnyja pahrozy z taho boku.

Biełaruski kiraŭnik čarhovy raz nazvaŭ pahrozami, ad jakich treba baranicca, novyja technałohii, ubačyŭ niebiaśpieku ŭ štučnym intelekcie.

Ambicyi Łukašenki

Jašče Łukašenka vystupiŭ z ambicyjnaj prapanovaj sabrać u Biełarusi sumiesny samit ASIEAN, ADKB, ŠAS, SND, Narady pa ŭzajemadziejańni i mierach davieru ŭ Azii, Rady supracoŭnictva krain Piersidskaha zaliva. To-bok zaprasiŭ usich kiraŭnikoŭ Azii i Blizkaha Uschodu ŭ Minsk.

Ci varta kazać pra ŭtapičnaść hetaj idei. Ale Łukašenku vidavočna ciesna i niecikava ŭ Biełarusi, jon pretenduje na suśvietnaje lidarstva. I heta ŭ situacyi, kali mnohija zamiežnyja krainy i lidary z sumnievam staviacca da suvierenitetu Biełarusi.

Pucin havaryŭ pieravažna nie pra prablemy i zadačy ADKB, a pra stan vajny z Ukrainaj. I heta vyrazna pakazvaje, što jaho pa-sapraŭdnamu turbuje.

Pa vynikach samitu pryniata i padpisana 14 dakumientaŭ. Adnoj z samych važnych nazvanaja zajava ŭ honar 80-hodździa pieramohi ŭ Vialikaj Ajčynnaj vajnie. Padzieja 80-hadovaj daŭnaści — ci nie adzinaje, što pakul zmacoŭvaje hety vajenna-palityčny sajuz.

• 1
• 3
• 22
• 5
• 2
• 0
• 1
• 0