Siarhiej Łaŭroŭ upieršyniu paśla pačatku vajny pryjechaŭ u Jeŭrasajuz. Sustreli jaho nie haścinna
Ministr zamiežnych spraŭ Rasii Siarhiej Łaŭroŭ upieršyniu pryjechaŭ u krainu Jeŭrasajuza paśla lutaha 2022 hoda. Jon biare ŭdzieł u štohadovym pasiadžeńni ministraŭ zamiežnych spraŭ ABSIE, jakoje prachodzić na Malcie 5-6 śniežnia. Ale, viadoma, pajezdka hetaja bolš demanstratyŭnaja — i suprać jaho tam robiać demaršy, i jon robić demaršy.
Ukrainski ministr zamiežnych spraŭ Andrej Sybiha skazaŭ padčas sustrečy, što jahonaja kraina praciahvaje zmahacca za svajo prava na isnavańnie, i spraviadlivaść pieramoža.
«Rasija sama pa sabie źjaŭlajecca samaj vialikaj prablemaj dla biaśpieki ŭsiaho śvietu. Kali jany kažuć, što chočuć miru, jany chłusiać. Hladzicie na ich dziejańni, a nie na słovy», — zajaviŭ ukrainski ministr.
Pry hetym Sybiha publična nazvaŭ Łaŭrova vajennym złačyncam, paviedamlaje Reuters.
U tym ža samym tonie vykazaŭsia i ministr zamiežnych spraŭ Polščy Radasłaŭ Sikorski:
«Majo pasłańnie rasijskaj delehacyi palahaje ŭ tym, što my nie viadziemsia na vašu chłuśniu. My viedajem, što vy robicie. Vy sprabujecie adnavić Rasijskuju Impieryju, i my vam hetaha nie dazvolim».
Kali pavinien byŭ pačacca vystup Łaŭrova, Sybiha, Sikorski i šerah inšych udzielnikaŭ pasiadžeńnia ŭ znak pratestu pakinuli zału. Siarod tych, chto vyjšaŭ, byŭ i ministr zamiežnych spraŭ Čechii Jan Lipaŭski, a voś
pres-sakratar češskaha MZS Daniel Drakie zastaŭsia, ale vykazaŭ svajo staŭleńnie bolš kreatyŭnym čynam. Padčas vystupu Łaŭrova Drakie demanstratyŭna čytaŭ knihu pra toje, jak budzie vyhladać budučy sud dla Pucina.
Sam ža Siarhiej Łaŭroŭ demanstratyŭna adsutničaŭ, kali vystupaŭ dziaržsakratar ZŠA Entani Blinkien, tamu nie pačuŭ vostrych słoŭ, jakija toj skazaŭ na jahony adras. Pavodle słoŭ Blinkiena:
«Naš rasijski kaleha vielmi ŭmieły ŭ tym, kab utapić słuchačoŭ u cunami dezynfarmacyi. […] Ale davajcie nie budziem padmanvać siabie i nie dazvolim ni jamu, ni kamu-niebudź jašče padmanuć nas. Havorka nie idzie i nikoli nie išła pra biaśpieku Rasii. Havorka idzie pra impierski prajekt Pucina dla ścirańnia Ukrainy z karty śvietu».
Na mierapryjemstva razam ź Siarhiejem Łaŭrovym chacieła prylacieć taksama sumnaviadomaja pres-sakratarka rasijskaha MZS Maryja Zacharava, ale joj u apošni momant jak padsankcyjnaj asobie anulavali ŭžo dadzienuju vizu.
Maryi Zacharavaj pierad vyletam na mierapryjemstva ABSIE anulavali maltyjskuju vizu
«Šuhanuć Bierlin dy inšych jeŭrapiejcaŭ». Pucinski «Arešnik» moža być tolki zrežysiravanym šou
Siarhieju Łaŭrovu na samicie BRIKS nastupili na nahu VIDEA
Łaŭroŭ u Breście raskazaŭ moładzi, što «ad Ukrainy zastaniecca niejkaja častka»
Ciapier čytajuć
«Da akcyi dałučylisia tolki marhinały». Što pisaŭ u čatach paśla svajho vykryćcia kadebešnik, adkazny za biełaruskuju emihracyju1
Kamientary