Сяргей Лаўроў упершыню пасля пачатку вайны прыехаў у Еўрасаюз. Сустрэлі яго не гасцінна
Міністр замежных спраў Расіі Сяргей Лаўроў упершыню прыехаў у краіну Еўрасаюза пасля лютага 2022 года. Ён бярэ ўдзел у штогадовым пасяджэнні міністраў замежных спраў АБСЕ, якое праходзіць на Мальце 5-6 снежня. Але, вядома, паездка гэтая больш дэманстратыўная — і супраць яго там робяць дэмаршы, і ён робіць дэмаршы.
Украінскі міністр замежных спраў Андрэй Сыбіга сказаў падчас сустрэчы, што ягоная краіна працягвае змагацца за сваё права на існаванне, і справядлівасць пераможа.
«Расія сама па сабе з'яўляецца самай вялікай праблемай для бяспекі ўсяго свету. Калі яны кажуць, што хочуць міру, яны хлусяць. Глядзіце на іх дзеянні, а не на словы», — заявіў украінскі міністр.
Пры гэтым Сыбіга публічна назваў Лаўрова ваенным злачынцам, паведамляе Reuters.
У тым жа самым тоне выказаўся і міністр замежных спраў Польшчы Радаслаў Сікорскі:
«Маё пасланне расійскай дэлегацыі палягае ў тым, што мы не вядземся на вашу хлусню. Мы ведаем, што вы робіце. Вы спрабуеце аднавіць Расійскую Імперыю, і мы вам гэтага не дазволім».
Калі павінен быў пачацца выступ Лаўрова, Сыбіга, Сікорскі і шэраг іншых удзельнікаў пасяджэння ў знак пратэсту пакінулі залу. Сярод тых, хто выйшаў, быў і міністр замежных спраў Чэхіі Ян Ліпаўскі, а вось
прэс-сакратар чэшскага МЗС Даніэль Драке застаўся, але выказаў сваё стаўленне больш крэатыўным чынам. Падчас выступу Лаўрова Драке дэманстратыўна чытаў кнігу пра тое, як будзе выглядаць будучы суд для Пуціна.
Сам жа Сяргей Лаўроў дэманстратыўна адсутнічаў, калі выступаў дзяржсакратар ЗША Энтані Блінкен, таму не пачуў вострых слоў, якія той сказаў на ягоны адрас. Паводле слоў Блінкена:
«Наш расійскі калега вельмі ўмелы ў тым, каб утапіць слухачоў у цунамі дэзынфармацыі. […] Але давайце не будзем падманваць сябе і не дазволім ні яму, ні каму-небудзь яшчэ падмануць нас. Гаворка не ідзе і ніколі не ішла пра бяспеку Расіі. Гаворка ідзе пра імперскі праект Пуціна для сцірання Украіны з карты свету».
На мерапрыемства разам з Сяргеем Лаўровым хацела прыляцець таксама сумнавядомая прэс-сакратарка расійскага МЗС Марыя Захарава, але ёй у апошні момант як падсанкцыйнай асобе анулявалі ўжо дадзеную візу.
Марыі Захаравай перад вылетам на мерапрыемства АБСЕ анулявалі мальтыйскую візу
«Шугануць Берлін ды іншых еўрапейцаў». Пуцінскі «Арэшнік» можа быць толькі зрэжысіраваным шоу
Сяргею Лаўрову на саміце БРІКС наступілі на нагу ВІДЭА
Лаўроў у Брэсце расказаў моладзі, што «ад Украіны застанецца нейкая частка»
Каментары