Ekśpiert AAN: U Biełarusi, chutčej za ŭsio, niama nijakaj jadziernaj zbroi. I nie budzie
Staršy navukovy supracoŭnik Instytuta razzbrajeńnia AAN Pavieł Podźvih skieptyčna stavicca da słoŭ Łukašenki pra dziasiatki jadziernych zaradaŭ u Biełarusi.
Alaksandr Łukašenka napiaredadni ŭ čarhovy raz zajaviŭ, što na terytoryju Biełarusi viarnułasia jadziernaja zbroja. Pavodle jaho słoŭ, u krainu zavieźli nie adzin dziasiatak jadziernych zaradaŭ.
Pavieł Podźvih, jaki ŭ AAN zajmajecca prablemami jadziernaha razzbrajeńnia i kantrolu nad uzbrajeńniami, ličyć, što heta, chutčej za ŭsio, niapraŭda. U intervju The Insider jon nazvaŭ niekalki arhumientaŭ.
«Ja zastajusia pry dumcy, što, chutčej za ŭsio, u Biełarusi niama nijakich bojezaradaŭ. Sistema abychodžańnia ź jadziernymi bojezaradami ŭ Rasii pabudavanaja takim čynam, što ciažka ŭjavić, jak ich u pryncypie buduć pieravozić na terytoryju Biełarusi.
Akramia taho, zachodnija raźviedki infarmacyju pra pieramiaščeńnie jadziernych zaradaŭ abnarodujuć tak ci inakš. Razmaŭlajučy z roznymi ludźmi, jakija vałodajuć infarmacyjaj pra takija rečy, ja ni razu nie čuŭ pra toje, kab u Biełaruś pryvieźli jadziernuju zbroju. Naadvarot, usie kažuć, što nijakich śviedčańniaŭ raźmiaščeńnia zbroi tam niama», — adznačyŭ ekśpiert.
Podźvih ličyć, što ŭ Biełarusi i nie budzie nijakich jadziernych bojezaradaŭ.
«Sistema razhortvańnia takoha rodu bojezaradaŭ uładkavanaja tak, što navat kali ŭ vas budzie abstalavanaje naležnym čynam schovišča na terytoryi Biełarusi i jaho buduć achoŭvać rasijskija vajskoŭcy, to i heta jašče nie značyć, što tam jość realnyja bojezarady.
Realnyja bojezarady, chutčej za ŭsio, buduć raźmieščanyja na terytoryi tak zvanaha centralizavanaha schovišča. Najbližejšaje da Biełarusi takoje schovišča znachodzicca ŭ Bransku», — ličyć Podźvih.
Jon dadaŭ, što dla raźmiaščeńnia jadziernych zaradaŭ patrebnyja asablivyja ŭmovy: achova, bunkiery sa stalovymi dźviarami, a taksama cełaja vajskovaja čaść 12-ha Hałoŭnaha ŭpraŭleńnia Minabarony Rasii, jakoje adkazvaje za jadziernuju palityku.
«Heta davoli składany abjekt, i prosta tak pryvieści bojehałoŭki kudyści i pakłaści — tak nichto nikoli nie rabiŭ, nie robić i nie budzie rabić», — ličyć Podźvih.
Jon pryznaŭ, što na spadarožnikavych zdymkach byli bačnyja padrychtoŭčyja raboty na terytoryi Biełarusi, ale heta ni pra što nie kaža.
«Jość precedenty ŭ rasijskaj historyi, kali schovišča jość, jano pracuje, tam jość vajskovaja čaść i kazarmy, ale bojezaradaŭ tam niama. U Kalininhradzie, naprykład, schovišča doŭhi čas stajała pustym, a moža być, jano i ciapier pustoje», — raskazaŭ ekśpiert.
Łukašenka i Pucin zajaŭlali pra pieramiaščeńnie ŭ Biełaruś jadziernaj zbroi jašče viasnoj — letam 2023 hoda. Niadaŭna Rasija ŭniesła Biełaruś u svaju jadziernuju daktrynu. Dziaržsakratar biełaruskaj Rady biaśpieki Alaksandr Valfovič dniami zajaviŭ, što ŭ Łukašenki «jość svaja čyrvonaja knopka i svoj čamadančyk». Heta adkryta supiarečyć damovie ab nieraspaŭsiudžvańni jadziernaj zbroi, udzielnikami jakoj źjaŭlajucca i Maskva, i Minsk.
Dziadula ź Viciebska zapościŭ fota sa skrynkaj ad televizara i staŭ zorkaj tyktoku. A jaho siabar pieratvaryŭsia ŭ miem5
Kamientary