Hłamurny kosmas. Džef Biezas adpraŭlaje siońnia ŭ kosmas svaju niaviestu i jašče piać žančyn

Biezas adpraŭlaje ŭ kosmas svaju niaviestu Łoren Sančes i jašče piać žančyn: viadučuju CBS Hiejł Kinh, byłuju rakietčycu NASA Aišu Boŭ, aktyvistku ruchu za hramadzianskija pravy Amandu Nhujen, kinarežysiorku Keryjan Flin i pop-śpiavačku Keci Piery.

Rakieta New Shepard pavinna startavać z Techasa kala 8:30 ranicy (15:30 pa Minsku) i dasiahnuć tak zvanaj «linii Karmana» — pryznanaj miažy kosmasu, jakaja znachodzicca na vyšyni kala 100 km nad pavierchniaj Ziamli. Poŭnaściu aŭtamatyzavany karabiel budzie padymacca viertykalna, paśla čaho kapsuła z ekipažam adździalicca i apuścicca na ziamlu z dapamohaj parašutaŭ i rakietnaha zapavolvalnika.

Palot praciahniecca kala 11 chvilin, i ciaham karotkaha času žančyny zmohuć adšpilić ramiani i paryć u stanie niavažkaści.

Misija NS-31 stanie 11-m palotam čałavieka ŭ kosmas dla rakiety New Shepard kampanii Blue Origin i 31-m u jaje historyi. Na dadzieny momant u ramkach prahramy ŭ kosmas adpravilisia 52 čałavieki. Kolki kaštuje adno miesca na New Shepard, kampanija nie raskryvaje.

Pierad startam žančyny, apranutyja ŭ čornaje, sfatahrafavalisia dla časopisa Elle, jaki nie bieź ironii paviedamiŭ, što heta pieršy raz, kali ludzi adpraŭlajucca ŭ kosmas z makijažam. «Kosmas narešcie stanie hłamurnym», — dadała Sančes.

Apošni čysta žanočy palot u kosmas adbyŭsia bolš za 60 hadoŭ tamu, kali saviecki kasmanaŭt Valancina Cieraškova stała pieršaj žančynaj, što ździejśniła adzinočny palot u kosmas na karabli «Uschod-6». Nie vyklučana, što novy žanočy palot u kosmas maje jašče adnu metu — padtrymać hramadskuju cikavaść da Blue Origin, pakolki kankurentnaja baraćba ŭ śfiery kaśmičnaha turyzmu nabiraje abaroty.

Hałoŭny kankurent Biezasa tut — kampanija Virgin Galactic, jakaja prapanuje anałahičnyja subarbitalnyja paloty.

U studzieni bolš mahutnaja rakieta Blue Origin pad nazvaj New Glenn paśpiachova ździejśniła svoj pieršy bieśpiłotny arbitalny palot.

U budučyni Blue Origin źbirajecca dastaŭlać kaśmičnych turystaŭ na arbitu, naŭprost kankuryrujučy sa SpaceX Iłana Maska. Uvohule ž, pa acenkach ekśpiertaŭ, mienavita pamiž Maskam i Biezasam razhorniecca asnoŭnaja baraćba za kamiercyjnyja kaśmičnyja zapuski. Pakul SpaceX značna apiaredžvaje kankurenta: rakiety siamiejstva Falcon 9 startavali ŭžo 469 razoŭ. U adroźnieńnie ad ich, Blue Origin ažyćciaviła ŭsiaho 31 paśpiachovy zapusk svajho karabla New Shepard.

Raniej u hetym hodzie Blue Origin zapuściła svaju bolš bujnuju šmatrazovuju rakietu New Glenn (nazvanuju ŭ honar Džona Hlena, pieršaha amierykanca, jaki pabyvaŭ na arbicie Ziamli) z mysa Kanavierał u Fłarydzie. Kampanija śćviardžaje, što jana pracuje jak «kamiercyjny avijałajnier (ale na bolš čystym palivie)» i zmoža dastaŭlać 13 ton karysnaj nahruzki na hieastacyjanarnuju arbitu i 45 ton — na nizkuju arbitu.

• 2
• 0
• 0
• 2
• 0
• 0
• 0
• 0