Palicyja Polščy abviaściła ŭ vyšuk biełarusa Juryja Vorsu pavodle artykuła ab padrychtoŭcy dyviersij u intaresach zamiežnych dziaržaŭ, zaŭvažyła vydańnie «Ahientstvo».
U bazie vyšuku polskaj palicyi ŭ kastryčniku źjaviŭsia 32-hadovy Juryj Vorsa. Jon vyšukvajecca pa punkcie 7 artykuła 130 Kryminalnaha kodeksa krainy (ździajśnieńnie dyviersij abo teraktaŭ u intaresach zamiežnaj vyviedki). Druhi artykuł Vorsy — ab arhanizavanaj złačynnaj hrupoŭcy.
U toj ža miesiac, kali Vorsa byŭ abvieščany ŭ vyšuk, prakuratura Polščy paviedamiła pra aryšt čatyroch čałaviek i abviaščeńni ŭ vyšuk jašče dvaich pa spravie ab adpraŭcy ŭ krainy ES i Vialikabrytaniju pasyłak z vybuchoŭkaj.
Pa źviestkach viedamstva, hetyja ludzi ŭdzielničali ŭ dziejnaści mižnarodnaj dyviersijnaj hrupy, jakaja pracuje na zamiežnuju raźviedku. Aryštavanym vystavili abvinavačvańni pa punktach 7 i 8 artykuła 130 KK Polščy.
Zachodnija ŚMI traktavali pres-reliz jak paviedamleńnie ab aryšcie padazravanych pa spravie ab pažarach na składach DHL u lipieni i kastryčniku 2024 hoda ŭ brytanskim Birminhiemie i niamieckim Lejpcyhu. The Wall Street Journal pisała, što abiedźvie apieracyi byli sprobaj rasijskaj vajskovaj raźviedki pravieryć, ci možna zładzić pažary na borcie samalotaŭ, jakija nakiroŭvajucca ŭ Paŭnočnuju Amieryku.
Heta nie adzinaja sprava ab dyviersijach, u ramkach jakich ułady Polščy aryštoŭvajuć hramadzian Biełarusi. Za 2024 hod Ahienctva ŭnutranaj biaśpieki Polščy zatrymała ŭžo bolš za dziasiatak hramadzian Polščy, Ukrainy i Biełarusi pa abvinavačvańni ŭ ździajśnieńni padpałaŭ u roznych haradach Polščy ŭ intaresach zamiežnych śpiecsłužbaŭ.
Jak ustanaviła «Ahientstvo», Vorsa — hramadzianin Biełarusi. Skončyŭ PTV, pracavaŭ na miascovych zavodach, u elektrasietkavaj kampanii, sanitaram na chutkaj dapamozie, achoŭnikam u načnych ustanovach. U 2021-2022 hadach Vorsa atrymlivaŭ prybytak ad Biełaruskaj fiederacyi futboła.
Miarkujučy z uciečak z baz biełaruskich siłavikoŭ, Vorsa z 17 hadoŭ mieŭ prablemy z zakonam. Jaho rehularna štrafavali za pjanyja bojki i debošy. Dvojčy na jaho raspačynali kryminalnyja spravy za źbićcio čałavieka, ale viadoma tolki pra adzin prysud — jamu dali 200 hadzin hramadskich rabot.
U 2015 hodzie Vorsu z zmoŭščykami padazravali ŭ praniknieńni ŭ čužoje žyllo, źbićci haspadara i vykradańni rečaŭ na 600 dalaraŭ. U 2019-m Vorsu amal na hod abmiežavali vyjezd z krainy paśla čarhovaj pjanaj bojki.
Mahčyma, Vorsa byŭ taksama źviazany ź nieanacystami. Pra heta śviedčać ličby «1488»u naźvie jahonaj staronki va «VKontaktie».
U žniŭni 2020 hoda Vorsa atrymaŭ 15 sutak za ŭdzieł u pratestach. U kastryčniku jaho dadali ŭ bazu MUS «Biesparadki». Uvosień 2021-ha Vorsa ŭpieršyniu vyjechaŭ ź Biełarusi.
Dzie ciapier znachodzicca biełarus, nieviadoma, ale 12 traŭnia 2024 hoda, u razhar nastupu Rasii na Charkaŭskuju vobłaść, jon trapiŭ na zdymki Reuters u Vaŭčansku, śćviardžaje «Ahientstva». Miarkujučy pa ich, Vorsa ŭ hrupie apranutych u vajskovuju formu ludziej akazvaŭ dapamohu paranienamu sałdatu. Na adnym z fota ŭ jaho na hrudziach vidać šaŭron sa znakam 57-j asobnaj motapiachotnaj bryhady USU, jakaja ŭ toj momant znachodziłasia ŭ Vaŭčansku.
Kamientary
Pra 1488 pazbaviła - kab tolki ŭ takich nadpisach u sacsietkach była prablema (chacia i hety nadpis - zasim nie drobiaź.)