Rezident PVT uziaŭ na pracu sisadmina paśla ŭsich sumoŭjaŭ i zvolniŭ praz hadzinu

Ivan pracavaŭ u adnoj kampanii sistemnym administrataram, ale z časam prytamiŭsia ad zvykłych zadač — zachaciełasia raźvićcia. Plus na papiarednim miescy abviaścili, što zarobak u najbližejšaj budučyni stanie mienšy, bo kurs apłaty pracy «pieraličyli ŭ niavyhadny bok», — kamientuje surazmoŭca.

Ivan pačaŭ šukać novuju pracu — i ŭbačyŭ na rabota.by vakansiju (ciapier jana zakrytaja) ad kampanii-rezidenta PVT, čyja dziejnaść źviazanaja sa staŭkami na sport: im patrebny byŭ sistemny administratar Linux. 

Ivan kaža, što ŭ jaho byŭ vielmi padobny, ale nie identyčny dośvied — tamu na niejkija pytańni na techničnym sumoŭi jon nie zmoh adkazać. I tym nie mienš intervju jon prajšoŭ paśpiachova — nastupnaha ž dnia na poštu pryjšoŭ ofier. 

Ivanu spatrebiłasia try tydni, kab zaviaršyć praces zvalnieńnia ŭ papiaredniaj kampanii. Na praciahu hetaha času jon niekalki razoŭ udakładniaŭ, ci čakajuć jaho ŭ novaj. Tam zapeŭnivali: tak, viadoma. A paźniej dasłali śpis dakumientaŭ, jaki treba prynieści, kab aformicca ŭ štat (u redakcyi jość skryn pierapiski). Vakansiju na rabota.by pry hetym zakryli ŭ toj ža dzień, kali Ivan atrymaŭ ofier. 

— I voś momant praŭdy: ja prychodžu ŭ kampaniju — mianie sustrakaje ejčarka, prapanoŭvaje paznajomicca z kamandaj, skanuje ŭsie nieabchodnyja dla pracaŭładkavańnia dakumienty (važny niuans: dazvołu na apracoŭku piersanalnych danych ja nie davaŭ, choć pracadaŭca abaviazany jaho zapytać). A zatym abviaščaje: u paniadziełak pieršy pracoŭny dzień, — raskazvaje Ivan. 

Radaści majoj nie było kraju. Ale roŭna praz hadzinu zvanok: u nas kadravaja pamyłka, hetaja pazicyja ŭžo była zakrytaja, nas nie papiaredzili. Ja pytajusia: «Jak tak?! Ja dziela hetaj pazicyi zvolniŭsia ź ciapierašniaj pracy!» U adkaz tolki: «Vybačajcie!»

Ivan kaža, ejčarka nie zmahła rastłumačyć jamu, na jakim etapie ŭźnikła pamyłka. 

— Mnie skazali, što ŭ ich litaralna za tydzień usio pierajhrałasia, na dadzienuju pazicyju ludziej «dabrali» (što b heta ni značyła), ale kamanda nibyta nie papiaredziła HR-adździeł. 

Ja spytaŭ, ci jość niejkaja alternatyva, bo situacyja ŭ cełym niepryhožaja. Ejčarka prapanavała patelefanavać lidu. U razmovie ź im ja znoŭ pytaŭsia, jak tak atrymałasia i jakoje jość vyjście — ale zrazumiełych adkazaŭ nie atrymaŭ.

Vynik — siadžu biez pracy.

• 0
• 0
• 5
• 8
• 0
• 2
• 9
• 0