«Sprava nie ŭ palitycy». Stała viadoma, čamu zakryłasia katalickaja sieminaryja ŭ Pinsku

Nasamreč navučalnaja ŭstanova była likvidavanaja ŭ červieni hetaha hoda pa rašeńni biskupskaj kamisii ŭ składzie mitrapalita Juzafa (Stanieŭskaha) i biskupaŭ Pinskaha Antonija Dziamjanki i Viciebskaha Aleha Butkieviča. Na padstavie hetaha rašeńnia Upaŭnavažany pa spravach relihii, jak rehistracyjny orhan, likvidavaŭ sieminaryju. I sprava tut zusim nie ŭ tym, što jana nie mahła prajści pierarehistracyju ci što jašče.

Da 2018 hoda ŭ Biełarusi isnavali dźvie katalickija duchoŭnyja sieminaryi — u Pinsku i Hrodnie. Pinskaja była miždyjacezijnaj — u joj vučylisia kandydaty z usioj Biełarusi. Hrodzienskaja sieminaryja, u svaju čarhu, rychtavała kadry tolki dla svajoj dyjacezii.

U 2018 hodzie Kanfierencyja katalickich biskupaŭ Biełarusi, u suviazi sa źmianšeńniem kolkaści kandydataŭ na śviataroŭ, pryniała rašeńnie zrabić Hrodzienskuju sieminaryju miždyjacezijnaj. Faktyčna biskupy pahadzilisia abjadnać dźvie sieminaryi i vučyć kandydataŭ sa svaich dyjacezij u adnym miescy.

Užo tady štohadovaja kolkaść kandydataŭ na śviataroŭ z usioj Biełarusi vahałasia vakoł kolkaści kala 10-ci čałaviek.

Razam z hetym, pavodle kananičnaha prava, kožny biskup maje prava mieć duchoŭnuju sieminaryju ŭ svajoj dyjacezii. Tamu biskup Pinski, nie pahadžajučysia z rašeńniem KKBB, skarystaŭsia z hetaha prava i nie zakryŭ svaju sieminaryju z raźlikam, što ŭ joj buduć vučycca kandydaty ź Pinskaj dyjacezii. Adnak prablema ŭ tym, što hetych kandydataŭ prosta nie było.

Z 2018 hoda Pinskaja sieminaryja faktyčna pustavała. Z parafij dyjacezii źbiralisia standartnyja abaviazkovyja zbory na jaje ŭtrymańnie, adnak usim było viadoma, što srodki byli nieabchodnyja ŭ pieršuju čarhu na budynak, a nie na ŭstanovu. Vidavočna, što pierarehistracyja relihijnych abjadnańniaŭ prosta padšturchnuła Pinskuju dyjaceziju da vyrašeńnia jurydyčnaha statusu svajoj sieminaryi, a nie stała niepasrednaj pryčynaj jaje zakryćcia.

Sieminaryju ŭ Pinsku ŭ 2001 hodzie adkryvaŭ kardynał Kazimir Śviontak. Heta byŭ akt adnaŭleńnia histaryčnaj spraviadlivaści — Pinskaja sieminaryja isnavała ŭ 1925-1939 hadach. Sam pieršy biełaruski kardynał skončyŭ mienavita jaje litaralna pierad zakryćciom savieckimi ŭładami ŭ krasaviku 1939 hoda.

A voś u XXI stahodździ Pinskuju sieminaryju daviałosia zakryvać užo samim biskupam.

• 0
• 0
• 0
• 1
• 0
• 3
• 0
• 0