Chalezin: My dabralisia da Chiłary Klintan i damovilisia ab sankcyjach

Pa słovach Chalezina, jon byŭ siarod tych ludziej, jakija ŭ 2011 hodzie prymali aktyŭny ŭdzieł u pracesie vypracoŭki miechanizmu mižnarodnaha cisku na režym Łukašenki. Asablivuju rolu ŭ hetym adyhrali pieramovy ŭ Vašynhtonie.

«Dziŭnaja historyja, bo, pavodle łohiki, ja nie pavinien byŭ u hetym znachodzicca. Heta adbyłosia ŭ studzieni 2011 hoda. Usie apynulisia ŭ turmie paśla vybaraŭ 2010 hoda. My źbiehli ŭ navahodniuju noč z krainy, i 3 studzienia ŭ nas pačynalisia hastroli ŭ Ńju-Jorku. (…) Pryjechali tudy, i ŭsie siabry akazalisia ŭ turmie. (…)

I pakolki my ŭ palitycy daŭno, i siabroŭ vializnaja kolkaść u roznych krainach siarod palitykaŭ, to my zrazumieli, što patrebny niejki cisk na režym, kab pačali vyzvalać palitviaźniaŭ.

My pajechali ŭ Vašynhton, pa ŭsich siabrach, i dabralisia da Chiłary Klintan, jakaja była tady kiraŭnikom Dziarždepartamienta, i damovilisia ab sankcyjach».

Jak zhadvaje Chalezin, sankcyi byli ŭviedzieny «vielmi chutka, litaralna, napeŭna, za try tydni, z pačatku pieramovaŭ» i pakazali svaju efiektyŭnaść. Łukašenka «nie ŭsich adrazu, ale pastupova pačaŭ vyzvalać. Bolšaść nie dasiadzieli svaich terminaŭ».

U 2020-m hodzie, pa słovach režysiora, jany znoŭ źviarnulisia da miechanizmu sankcyj i pačali jaho prabivać, «ale ŭžo na inšym uzroŭni»:

«My adnačasova supracoŭničali i z brytanskim MZS, i ź Dziarždepartamientam ZŠA, i z MZS roznych krain, z parłamientami i hetak dalej».

Navošta načalnika babrujskaj kałonii nie puskajuć u ES

Na pohlad Mikałaja Chalezina, časam sankcyi nosiać simvaličny charaktar, bo čałaviek, jaki pad ich patrapiŭ, nasamreč ničoha nie hublaje. Tak, naprykład, načalniku babrujskaj kałonii zabaronieny ŭjezd u ES. Ale jon i da hetaha tudy nie jeździŭ.

«Heta stereatypnaje myśleńnie jeŭrapiejskich čynoŭnikaŭ. Ja ŭvohule nie vielmi razumieju, kali sankcyi ŭvodziacca suprać sudździaŭ i inšaha. Jany nikudy nie jeździać, i jany nikudy i nie pajeduć».

Chalezin prapanuje:

«Vaźmi tady i ŭviadzi pa najmieńni prafiesii. Biełaruskija sudździ — viza ban. Usie. I tady ty razumieješ, što tak, bo jany ŭ toj sudovaj sistemie, jakaja prymaje palityčnyja rašeńni. Tamu jany ŭsie pavinny być. Siłaviki taksama ŭsie pavinny być».

Adnak, jak zaŭvažaje Chalezin, takoha niama. Jon tłumačyć heta tym, što pry vypracoŭcy sankcyj adnosna Biełarusi vykarystoŭvajecca ahulny padychod, jaki dziejničaje dla bolšaści krain, ale nie ŭličvaje śpiecyfiku aŭtarytarnych režymaŭ.

«Jany pačynajuć pracavać jak, dapuścim, pracujuć pa sankcyjach ź jakimi-niebudź krainami, dzie niama dyktatury. I voś čałavieku tam «viza ban» — realna vialikaje pakarańnie. Jon realna siabie adčuvaje ŭščemlenym. A jany biaruć hety ž miechanizm i ŭžyvajuć jaho da dyktatury, dzie ŭvohule inšaja historyja».

U vyniku ŭvodzicca šmat sankcyj, jakija nie pracujuć. Pry hetym jany jašče i sinchranizujucca ź inšymi krainami:

«Adna sprava, kali ty sinchranizuješ, dapuścim, sankcyi suprać kaliju. A inšaja sprava, kali ty sinchranizuješ, uvodziš sankcyi pa načalniku babrujskaj kałonii. Dziŭna ŭvohule. I tudy ž uvachodziać jašče Kanada i Aŭstralija! To-bok, jon nie pajedzie ŭ Aŭstraliju».

U toj ža čas Chalezin ličyć, što treba «bolš surjozna pracavać pa ekanamičnych sankcyjach». Z-za adsutnaści hłabalnaj ekśpiertyzy časam pad ich traplajuć biznesmieny, jakija nie majuć dačynieńnia da palityčnaha režymu:

«Było takoje, kali zahaniali pad sankcyi jakoha-niebudź biznesmiena. U jahonych strukturach pracuje 10 tysiač čałaviek zvyčajnych biełarusaŭ.

Jak akazałasia, jon usie svaje kantrakty atrymlivaŭ praz tendary. Voś vy jaho čaho čapajecie? Nasamreč jon prosta biznesmien.

Nu tak, jon pracuje pry dyktatury, tak byvaje. Ale ty ŭdaryŭ pa 10 tysiačam čałaviek, jakija ŭvohule nijakaha dačynieńnia nie majuć. Nu tak, jany płaciać padatki dyktatury. A što im rabić? Pamierci?»

Hladzicie całkam: 

• 3
• 2
• 1
• 1
• 0
• 0
• 0
• 0