Ź jaho pačynajecca Žodzina

U dačynieńni da 22-hadovaha Paŭła Krasoŭskaha z Žodzina zaviedziena kryminalnaja sprava pavodle art.369 Kryminalnaha kodeksu - abraza pradstaŭnikoŭ ułady. Abražanyja - čynoŭniki harvykankamu. Uviečary 12 studzienia ŭ Paŭła praviali pieratrus. Pavodle zakanadaŭstva chłopcu pahražaje štraf albo abmiežavańnie voli da troch hadoŭ. Z Žodzina - Arkadź Šanski.

Paŭłu zatelefanavali pa zaviedzienaj raniej spravie: babulka aplavała ŭdzielnikaŭ padpisnoha pikietu - i spravu zaviali na jaje. Krasoŭski adkazaŭ, što jon pry incydencie nie prysutničaŭ. "Dobra, my ŭdakładnim i pieratelefanujem", - zapeŭnili jaho. Praź piać chvilinaŭ šaściora milicyjantaŭ stajali pad dźviaryma kvatery. Jany pakazali pastanovu ab raspačataj u dačynieńni da chłopca kryminalnaj spravie. U dakumencie havorycca, što Pavał "redahavaŭ publična demanstravany tvor "Naziralnik", u jakim publična abraziŭ pradstaŭnikoŭ ułady, a mienavita kiraŭnictva Žodzinskaha harvykankamu".

"Spravu zaviali z-za karykaturaŭ, što mnie dasłali elektronnaj poštaj. U ich adlustravanyja čynoŭniki harvykankamu. Ja vyrašyŭ nadrukavać karykatury. Heta prosta humar, u hołym vyhladzie čynoŭnikaŭ nichto nie pakazvaŭ, ale tam byli tvary", - tłumačyć Pavał.

Chłopiec zhadvaje, što milicyjanty mocna chvalavalisia - pieršaja takaja sprava ŭ Žodzinie. U Paŭła zachoŭvałasia 300 numaroŭ "Narodnaj Voli", adnak vydańnie milicyjantaŭ nie zacikaviła. Jany zabrali 32 asobniki samvydataŭskaha "Naziralnika". Potym ahledzieli šafy, padniali matrasy na łožku, abšukali knižnyja palicy, spadziejučysia znajści jak minimum mini-drukarniu. Ale ŭ Krasoŭskich doma niama navat kamputara. Usiaho kanfiskavali 36 pradmietaŭ. Siarod ich - nalepki z ukrainskaj revalucyi, nalepki kampanii-2001 "Naciahni jaho" ("u centry nalepki mužčynski tvar z vusami", - paznačana ŭ pratakole), nalepki "Čas prybirać" ("u centry nalepki - miatła, što vymiataje partrety dziejnaha prezydenta"), brašury. Pry pieratrusie prysutničaŭ baćka Paŭła. Jon tolki iranična zaznačyŭ, što sucharoŭ dla syna ŭžo nasušyŭ. Pahatoŭ dośvied jość: 10 sutak u mienskim SIZA Pavał užo siadzieŭ. Baćki chvalujucca za syna, ale padtrymlivajuć.

U roli paniatych vystupili susiedzi. Pavał zhadvaje, što susiedzi pačuvalisia nijakavata: "Milicyjanty nakručvali paniatych: źviarnicie ŭvahu, jak jany staviacca da prezydenta! Źviarnicie ŭvahu, jak jany staviacca da dziaržaŭnaj arhanizacyi - BRSM!"

Pieraśled Krasoŭskaha za vychad hazety "Naziralnik" pačaŭsia pry kancy hodu - kali vyjšaŭ pieršy numar. Kab addać pozvu, učastkovy adšukaŭ Paŭła ŭ teatry na spektakli. Paśla Novaha hodu jaho zaprasiŭ na razmovu zahadčyk adździełu hramadzkaj biaśpieki haradzkoj milicyi Viačasłaŭ Illič. Jaho cikaviła, kali vydadziena hazeta, srodki, adkul źjaŭlajucca artykuły ŭ hazetu, chto aŭtary. Potym u prysutnaści Paŭła sabrali specyjalistaŭ, jakija razhladali, jakim čynam možna raspačynać spravu - pieršy vypadak u Žodzinie. "Illič uvieś čas kazaŭ: admoŭsia ad vydańnia hazety, tady spravu pačynać nia budziem. Potym pazvali majo-ra Kuźniacova - načalnika papiaredniaha raśśledavańnia Žodzinskaha HAUS, jaki zajaviŭ, što nia bačyć padstaŭ, kab raspačać spravu".

U apošnim numary, jaki Pavał vydaŭ užo ŭ jakaści kiraŭnika Žodzinskaha štabu Milinkieviča, była źmieščana infarmacyja pra miescy, dzie možna padpisacca za adzinaha. Aktyvizacyju milicyjantaŭ Krasoŭski źviazvaje akurat z vybarčaj kampanijaj: "Hetym chočuć paralizavać maju dziejnaść, uziać padpisku ab niavyjeździe, ciahać na dopyty".

Apuskać ruki žodzinski aktyvist nie źbirajecca, pahatoŭ što maje padtrymku adnadumcaŭ: "My planujem pravieści aktyŭnuju prezydenckuju kampaniju. Milicyja vielmi baicca ahałoski. Hazetu čytali, było navat 15 padpisčykaŭ. Mianie jak vydaŭca viedajuć". Čytajuć hazetu navat u milicyi. "Byŭ vypadak, kali my raskidvali pa skryniach "Naziralnika" i narvalisia na milicyjanta. Jon pahladzieŭ karykatury, paśmiajaŭsia, uziaŭ u nas niekalki asobnikaŭ hazety", - kaža Pavał.

Ciapier Krasoŭski maje rabić "Naziralnika" ŭ 10 varyjantach - asobnyja varyjanty (pa 299 asobnikaŭ) na kožnuju haradzkuju vybarčuju akruhu. Kožny vypusk budzie mieć redaktara i vydaŭca. "299 asobnikaŭ dastatkova, kab achapić vialikuju častku vybarcaŭ u akruzie, dzie jość prykładna pa 600 kvateraŭ. U kožnym numary budzie adnolkavaja haradzkaja infarmacyja, ale adroznaja pa hetaj akruzie: niedzie vady niama, niedzie z aciapleńniem prablemy..."

Na kuchni žodzinskaha vybarčaha štabu abstanoŭka spartanskaja: plita, nizki stolik, kanapa. Ab nohi trecca kotka Frosia. Na pytańnie pra mahčymuju emihracyju Pavał adkazvaje kateharyčna: "Za miažu ja nie źbirajusia. Ja razmaŭlaŭ z emihrantami ŭ Polščy, bačyŭsia ŭ Varšavie z žurnalistkaj Volhaj Kłaskoŭskaj. Jana trymajecca, ale ja nie chacieŭ by trapić u takuju składanuju žyćciovuju sytuacyju".

• 0
• 0
• 0
• 0
• 0
• 0
• 0
• 0