Na Lipieckuju vobłaść upali dźvie rasijskija rakiety, jakimi bili pa Ukrainie
Miascovyja ŭłady adrazu skazali, što ŭpała tolki stupień rakietnaha kompleksu. Ale daviałosia vypraŭlacca.
Na Lipieckuju vobłaść u subotu ŭpali dźvie rakiety, jakija lacieli na harady Ukrainy, a nie stupień, jak paviedamlałasia pieršapačatkova.
U subotu rasijskija samaloty skinuli dźvie rakiety na sielskuju miascovaść nad Jaleckim rajonam i Vałoŭskim municypalitetam Lipieckaj vobłaści, pišuć «Važnyje istorii».
U sacsietkach źjaviłasia videa padzieńnia adnoj z rakiet — zvyšhukavoj kryłataj Ch-22 — źniataje na aŭtamabilny rehistratar vidavočca.
Ukrainski analityk Aeris Rimor adznačaje, što pryčynaj mahła stać niaspraŭnaść 50-hadovaj rakiety (aficyjna Ch-22 pastupili na ŭzbrajeńnie jašče ŭ 1970-ch). Akramia taho, paliva hetaj rakiety vysokataksičnaje, i dla likvidacyi nastupstvaŭ mohuć zadziejničać padraździaleńni chimičnaj abarony. Nastupstvy dla tych, chto apynuŭsia pablizu vybuchu, niepradkazalnyja.
Pryznaŭ, što na vobłaść upali mienavita rakiety, a nie stupień i rasijski vajenkar Flightbomber.
«Darečy, ja ŭvohule nie viedaju nivodnaj stupieni ad avijacyjnych rakiet, jakaja navat tearetyčna mahła b vybuchnuć ci zrabić «chłapok», — napisaŭ vajenkar.
Ułady Lipieckaj vobłaści taksama pryznali padzieńnie rakiet i paabiacali kampiensacyju žycharam.
«Pavodle ŭdakładnienaj infarmacyi ad upaŭnavažanych viedamstvaŭ, učora nad Lipieckaj vobłaściu adbyŭsia niaštatny schod dvuch avijacyjnych bojeprypasaŭ. Adzin upaŭ u Jaleckim rajonie, druhi — u Vałoŭskim municypalnym utvareńni, udalečyni ad žyłych damoŭ. Na miescy padzieńnia praciahvajuć pracavać vybuchatechniki», — adznačajecca ŭ aficyjnym paviedamleńni.
U subotu stała viadoma, što ŭ 540 damach šaści nasielenych punktaŭ z-za padzieńnia rakiet źnikli elektryčnaść i vada, a taksama ŭźnikli prablemy z suviaźziu.
Niezadoŭha da padzieńnia rakiet rasijskaja armija naniesła «hrupavy ŭdar vysokadakładnaj zbrojaj» pa Ukrainie. Udary pryjšlisia pa Pałtavie (14 zahinułych i 20 paranienych), a taksama pa Charkavie i Zaparožžy.
Ciapier čytajuć
Jakija prablemy hramadstva moh by vyrašyć Turčyn, kali b jon byŭ libierałam u centry sistemy? I ci moh by?3
Kamientary