Try miedali — załaty, siarebrany i bronzavy —
zavajavali biełaruskija lohkaatlety na XIII čempijanacie śvietu ŭ zakrytym pamiaškańni, jaki adbyŭsia 12—14 sakavika ŭ Dochie (Katar).
Usie ŭznaharody atrymany ŭ šturchańni jadra.
U subotu «srebra» ŭ finale mužčynskich spabornictvaŭ zavajavaŭ Andrej Michnievič (21,68 m). Na nastupny dzień u žanočym finale Nadzieja Astapčuk zaniała pieršaje miesca z rekordam čempijanatu (20,85 m), a Natalla Michnievič była treciaj (20,42 m). Pamiž imi raźmiaściłasia Valery Vili z Novaj Ziełandyi (20,49 m).
Usiaho na čempijanacie razyhrana 26 kamplektaŭ uznaharod, jakija dastalisia spartsmienam 28 krain. U pieršuju vaśmiorku miedalnaha zaliku trapili ZŠA (8, 3, 6), Efiopija (3, 0, 2), Rasija (2, 4, 3), Vialikabrytanija (2, 1, 1), Aŭstralija (2, 0, 1), Kuba (1, 3, 1), Biełaruś (1, 1, 1) i Brazilija (1, 0, 1).
Dva hady tamu na papiarednim ČS u zakrytym pamiaškańni ŭ Valensii (Ispanija) biełaruskija lohkaatlety zavajavali try siarebranyja miedali.
Kamientary