«Chapaj jaje za azadak, zaciahni ŭ tualet». U Varšavie zajavili ŭ prakuraturu na pikap-treniera ź Biełarusi Aleksa Leśli

Aleks Leśli (Alaksandr Kiryłaŭ) vyras u Viciebsku i šmat hadoŭ vučyć pikapu — technikam spakušeńnia. Viadomaść jon atrymaŭ u 2018 hodzie paśla rasśledavańnia Alaksieja Navalnaha pra miljardera Aleha Dzierypasku. Dziakujučy knizie i instahramu vučanicy Leśli, taksama biełaruski Naści Rybki Navalny vyśvietliŭ, što Dzierypaska adpačyvaŭ na jachcie razam z byłym vice-premjeram rasijskaha ŭrada Siarhiejem Prychodźkam.

Raniej Leśli pravodziŭ treninhi ŭ Maskvie, dzie na jaho zaviali kryminalnuju spravu i abjavili ŭ vyšuk pa abvinavačvańni ŭ schileńni da zhvałtavańnia.

Paśla hetaha pikap-trenier pieranios svaju dziejnaść u Varšavu. Vydańnie Gazeta Wyborcza piša, što za ŭdzieł u trochdzionnym kursie jon biare 300 dalaraŭ. Leśli abiacaje, što navučyć chłopcaŭ zakachać u siabie dziaŭčynu za niekalki chvilin i chutka schilić jaje da seksu.

Na adnym z rolikaŭ, zapisanych u Varšavie, vidać, jak Aleks Leśli ŭ vulharnaj formie instruktuje ŭdzielnikaŭ kursa. «Chapaj žančynu za azadak, zaciahni ŭ tualet i trachni jaje», — kaža jon.

Leśli raić dakranacca da dziaŭčyny ŭžo praz chvilinu paśla pačatku razmovy.

Paśla adnaho z kursaŭ, praviedzienych u Varšavie, Aleks Leśli apublikavaŭ fota, dzie jahonyja vučni całujuć žančyn, ź jakimi paznajomilisia padčas praktyčnych zaniatkaŭ. Zdymki zroblenyja ź niekatoraj adlehłaści i patajemna — sumnieŭna, što žančyny dazvalali ich publikacyju.

Čytačka Gazeta Wyborcza, zaniepakojenaja dziejnaściu Aleksa Leśli, napisała zajavu ŭ prakuraturu. Na jaje dumku, u słovach pikap-treniera ŭtrymlivajucca zakliki da seksualnaha hvałtu.

Pres-sakratar akruhovaj prakuratury ŭ Varšavie Piotr Skiba skazaŭ vydańniu, što viedamstva pryhladajecca da dziejnaści Leśli, ale abvinavačvańni jamu pakul nie vystaŭlenyja.

Aleks Leśli — nie adziny pikap-trenier, jaki dziejničaje ŭ Varšavie. Vučni takich trenieraŭ časta prachodziać «praktyku» ŭ handlovym centry Złote Tarasy pobač z centralnym čyhunačnym vakzałam. Niaredka treniery zdymajuć na videa razmovy ź dziaŭčatami i publikujuć ich u jakaści rekłamnych i navučalnych materyjałaŭ. Časam u takich materyjałach bačnyja niezabluranyja tvary dziaŭčat.

«Niama ničoha drennaha ŭ tym, kab chtości zavodziŭ razmovu sa mnoj ci ź inšaj dziaŭčynaj, ale zapis hetaha i publikacyja ŭ internecie jak navučalnaha materyjału — heta ahidna. Ja čałaviek, a nie maniekien dla treniroŭki spakušeńnia», — kamientuje 23-hadovaja Marta.

• 1
• 0
• 3
• 5
• 0
• 1
• 2
• 0