«Хапай яе за азадак, зацягні ў туалет». У Варшаве заявілі ў пракуратуру на пікап-трэнера з Беларусі Алекса Леслі
Жыхарка Варшавы падала заяву ў пракуратуру на беларускага пікап-трэнера Алекса Леслі, які падчас заняткаў вельмі вульгарна выказваўся пра жанчын. На думку варшавянкі, ягоныя словы можна разглядаць як заклікі да сэксуальнага гвалту, піша Most.
Алекс Леслі (Аляксандр Кірылаў) вырас у Віцебску і шмат гадоў вучыць пікапу — тэхнікам спакушэння. Вядомасць ён атрымаў у 2018 годзе пасля расследавання Аляксея Навальнага пра мільярдэра Алега Дзерыпаску. Дзякуючы кнізе і інстаграму вучаніцы Леслі, таксама беларускі Насці Рыбкі Навальны высветліў, што Дзерыпаска адпачываў на яхце разам з былым віцэ-прэм'ерам расійскага ўрада Сяргеем Прыходзькам.
Раней Леслі праводзіў трэнінгі ў Маскве, дзе на яго завялі крымінальную справу і аб'явілі ў вышук па абвінавачванні ў схіленні да згвалтавання.
Пасля гэтага пікап-трэнер перанёс сваю дзейнасць у Варшаву. Выданне Gazeta Wyborcza піша, што за ўдзел у трохдзённым курсе ён бярэ 300 даляраў. Леслі абяцае, што навучыць хлопцаў закахаць у сябе дзяўчыну за некалькі хвілін і хутка схіліць яе да сэксу.
На адным з ролікаў, запісаных у Варшаве, відаць, як Алекс Леслі ў вульгарнай форме інструктуе ўдзельнікаў курса. «Хапай жанчыну за азадак, зацягні ў туалет і трахні яе», — кажа ён.
Леслі раіць дакранацца да дзяўчыны ўжо праз хвіліну пасля пачатку размовы.
Пасля аднаго з курсаў, праведзеных у Варшаве, Алекс Леслі апублікаваў фота, дзе ягоныя вучні цалуюць жанчын, з якімі пазнаёміліся падчас практычных заняткаў. Здымкі зробленыя з некаторай адлегласці і патаемна — сумнеўна, што жанчыны дазвалялі іх публікацыю.
Чытачка Gazeta Wyborczа, занепакоеная дзейнасцю Алекса Леслі, напісала заяву ў пракуратуру. На яе думку, у словах пікап-трэнера ўтрымліваюцца заклікі да сэксуальнага гвалту.
Прэс-сакратар акруговай пракуратуры ў Варшаве Пётр Скіба сказаў выданню, што ведамства прыглядаецца да дзейнасці Леслі, але абвінавачванні яму пакуль не выстаўленыя.
Алекс Леслі — не адзіны пікап-трэнер, які дзейнічае ў Варшаве. Вучні такіх трэнераў часта праходзяць «практыку» ў гандлёвым цэнтры Złote Tarasy побач з цэнтральным чыгуначным вакзалам. Нярэдка трэнеры здымаюць на відэа размовы з дзяўчатамі і публікуюць іх у якасці рэкламных і навучальных матэрыялаў. Часам у такіх матэрыялах бачныя незаблюраныя твары дзяўчат.
«Няма нічога дрэннага ў тым, каб хтосьці заводзіў размову са мной ці з іншай дзяўчынай, але запіс гэтага і публікацыя ў інтэрнэце як навучальнага матэрыялу — гэта агідна. Я чалавек, а не манекен для трэніроўкі спакушэння», — каментуе 23-гадовая Марта.
Каментары
І каржы, і пікаперы
І як іх усіх у цырк пускаюць?