U rasijskaj Iaškar-Ale biełarusa aštrafavali za paviedamleńnie «Słava Ukrainie!» ź imitacyjaj parasiačaha visku
Sud u rasijskaj respublicy Maryj Eł pryciahnuŭ da administracyjnaj adkaznaści hramadzianina Biełarusi Kiryła Vajtoviča za adpraŭku ŭ miesiendžary frazy «Słava Ukrainie!», supravadžanaj imitacyjaj parasiačaha visku. Adpaviednaja infarmacyja apublikavanaja ŭ kartatecy Iaškar-Alinskaha haradskoha suda, paviedamlaje telehram-kanał «Ostorožno, novosti!».
Zhodna z materyjałami spravy, u studzieni 2024 hoda padčas pierapiski inšy karystalnik prapanavaŭ Vajtoviču «parochkać». U adkaz padsudny napisaŭ «Słava Ukrainie!» i praimitavaŭ z dapamohaj litarnaj kambinacyi «UI UIIII» huk parasiačaha visku.
Paviedamlajecca, što na sudzie Vajtovič častkova pryznaŭ vinu i zajaviŭ pra raskajańnie, patłumačyŭšy, što vykarystaŭ łozunh, maŭlaŭ, nie dla padtrymki Ukrainy, a z metaj źniavažyć surazmoŭcu, jakoha pryniaŭ za ŭkrainca.
Sud aštrafavaŭ jaho na 1000 rubloŭ pa artykule ab demanstracyi «nacysckaj atrybutyki».
Kirył Vajtovič pierajechaŭ u Rasiju ŭ 2019 hodzie. U 2023 hodzie jaho ŭžo zatrymlivali ŭ Iaškar-Ale z płakatam na biełaruskaj movie padčas akcyi pamiaci achviar stalinskich represij. Na płakacie było napisana: «Noč paetaŭ, 29—30 kastryčnika. Viečnaja pamiać achviaram balšavickaha teroru. Žyvie viečna». Tady jaho ŭrešcie adpuścili biez vystaŭleńnia abvinavačvańniaŭ.
Kamientary