У расійскай Іашкар-Але беларуса аштрафавалі за паведамленне «Слава Украіне!» з імітацыяй парасячага віску
Суд у расійскай рэспубліцы Марый Эл прыцягнуў да адміністрацыйнай адказнасці грамадзяніна Беларусі Кірыла Вайтовіча за адпраўку ў месенджары фразы «Слава Украіне!», суправаджанай імітацыяй парасячага віску. Адпаведная інфармацыя апублікаваная ў картатэцы Іашкар-Алінскага гарадскога суда, паведамляе тэлеграм-канал «Осторожно, новости!».
Згодна з матэрыяламі справы, у студзені 2024 года падчас перапіскі іншы карыстальнік прапанаваў Вайтовічу «парохкаць». У адказ падсудны напісаў «Слава Украіне!» і праімітаваў з дапамогай літарнай камбінацыі «УИ УИИИИ» гук парасячага віску.
Паведамляецца, што на судзе Вайтовіч часткова прызнаў віну і заявіў пра раскаянне, патлумачыўшы, што выкарыстаў лозунг, маўляў, не для падтрымкі Украіны, а з мэтай зняважыць суразмоўцу, якога прыняў за ўкраінца.
Суд аштрафаваў яго на 1000 рублёў па артыкуле аб дэманстрацыі «нацысцкай атрыбутыкі».
Кірыл Вайтовіч пераехаў у Расію ў 2019 годзе. У 2023 годзе яго ўжо затрымлівалі ў Іашкар-Але з плакатам на беларускай мове падчас акцыі памяці ахвяр сталінскіх рэпрэсій. На плакаце было напісана: «Ноч паэтаў, 29—30 кастрычніка. Вечная памяць ахвярам бальшавіцкага тэрору. Жыве вечна». Тады яго ўрэшце адпусцілі без выстаўлення абвінавачванняў.
Каментары