Suprać byłoha kamandzira śpiecnaza Uładzimira Baradača zaviali kryminalnuju spravu
Na byłoha kamandzira śpiecnaza ŭ Marjinaj Horcy Uładzimira Baradača zaviali kryminalnuju spravu i praviali pieratrus u jaho minskaj kvatery. Pra heta jon napisaŭ u fejsbuku.
«Paśla pieratrusu, praviedzienaha ŭ majoj kvatery ŭ horadzie Minsku 6 listapada 2025 hoda, ja daviedaŭsia, što suprać mianie ŭzbudžana kryminalnaja sprava. Nie razumieju, čamu pravaachoŭnyja orhany zavodziać i viaduć hetuju kryminalnuju spravu ŭ tajamnicy ad mianie. Zrabiŭ zapyt u Pieršamajskaje RUUS ab pradastaŭleńni mnie mahčymaści davać nieabchodnyja śledstvu pakazańni. U mianie niama tajamnic pierad zakonam, narodam i Ajčynaj. Čakaju adkazu», — napisaŭ Baradač.
73‑hadovy Uładzimir Baradač — były śpiecnazaviec, vieteran vajny ŭ Afhanistanie, pałkoŭnik zapasu (Łukašenka pazbaviŭ jaho hetaha zvańnia ŭ 2021 hodzie).
Z 1988 pa 1991 hod kamandavaŭ 5‑j asobnaj bryhadaj śpiecyjalnaha pryznačeńnia, jakaja dysłakavałasia ŭ Marjinaj Horcy.
Paśla raspadu SSSR staŭ aktyŭnym udzielnikam hramadskaha žyćcia. U 1992 hodzie byŭ adnym ź inicyjataraŭ stvareńnia Sajuza biełaruskich aficeraŭ i ŭdzielničaŭ u histaryčnaj cyrymonii pryniaćcia aficerami prysiahi na viernaść Biełarusi. U 1993 hodzie zvolniŭsia ŭ zapas.
Baradač udzielničaŭ u hramadskim rasśledavańni źniknieńnia byłoha ministra ŭnutranych spraŭ Juryja Zacharanki.
U 2010 hodzie byŭ vymušany pakinuć Biełaruś i atrymaŭ palityčny prytułak u Hiermanii.
Ciapier čytajuć
Pra Miełkaziorava ŭ jaho apošni dzień: «Było adčuvańnie, što jon stomleny, brakuje enierhii, rysy tvaru byli zapałyja»1
Kamientary
[Zredahavana]