Vystava «ŚMI ŭ Biełarusi»: Letašnija haziety, Paŭličenka i žyvy aposum

Naviednikaŭ forumu zavablivajuć mulažami zbroi, ekzatyčnymi žyviołami i akrabatami.

Sioletniaja vystava «ŚMI ŭ Biełarusi» pryśviečanaja 65-hodździu Pieramohi. Heta nakłała zaŭvažny adbitak na afarmleńnie vystavačnych placovak drukavanych i elektronnych ŚMI. Mulažy zbroi časoŭ Druhoj suśvietnaj vajny, jak i hieorhijeŭskija stužki možna było bačyć i na minułych vystavach, ale sioleta navat biehły ahlad placovak stvaraje adčuvańnie spabornictva: jak raźmiaścić najbolšuju kolkaść kulamiotaŭ dy hranataŭ na mietry arandavanaj płoščy.

Siarod lideraŭ «honki ŭzbrajeńniaŭ» akazałasia placoŭka ŚMI Homielščyny. Tutejšyja vydaŭcy, akramia hetaha, zdoleli spałučyć, zdavałasia b, niespałučalnaje — mulaž pamiežnaha słupa SSSR dy ikonu. Uvohule, aficyjnaje adkryćcio «ŚMI ŭ Biełarusi» z kožnym hodam usio bolš nahadvaje karnavał: bałoniki, akrabaty, raznosčyki presy, apranutyja ŭ samy roznyja ŭzory vajskovaj, pažarnaj i milicejskaj formy.

Mnohija z haziet, što razdavali haściam vystavy, darečy, akazalisia letašnimi. Tak, karespandentu NN prapanavali pačytać «Na stražie» za kastryčnik 2009 hoda. Sioleta zadziejničali ekzatyčnych žyvioł — kali «Arhumienty i fakty» tradycyjna šukali novych čytačoŭ z dapamohaj sabaki dobraha zavodu, to pobač ź placoŭkaj teleradyjokampanii «Mir» možna było pabačyć aposuma. Adnymi z samych aktyŭnych na vystavie byli pradstaŭniki ŚMI Ministerstva ŭnutranych spraŭ. Maładyja ludzi ŭ milicejskaj formie ŭsich časoŭ i narodaŭ razdavali naviednikam haziety i buklety.

Adkryvała vystavu śpiavačka Alaksandra Hajduk. Pieśniu Valanciny Tałkunovaj «Jeśli b nie było vojny» jana vyjšła vykonvać u bliskučych tuflach na takich vysokich abcasach, što za Alaksandru mižvoli stała tryvožna.

Upieršyniu ŭ jakaści ministra infarmacyi vystupiŭ Aleh Pralaskoŭski. Hałoŭny ideołah krainy Usievaład Jančeŭski pa papiercy začytaŭ vitańnie ad Łukašenki. U pieršych šerahach VIP-haściej byli zaŭvažanyja kiraŭnica Centrvybarkama Lidzija Jarmošyna i ministr kultury Pavieł Łatuška.

Asablivaściu sioletniaj vystavy staŭ udzieł u joj Asacyjacyi vydaŭcoŭ rehijanalnaj presy «Abjadnanyja maśmiedyi». Dziakujučy hetamu, naviedniki foruma mohuć paznajomicca z bolš čym dvaccaćciu niezaležnymi vydańniami z usioj krainy — «Hazietaj Słonimskaj», Intex-press, «Volnym Hłybokim», «Infa-kurjeram», «Briestskoj hazietoj», «Hazietaj dla vas» dy inšymi.

• 0
• 0
• 0
• 0
• 0
• 0
• 0
• 0