«Jak ciapier z hetym žyć?» Biełarusy znajšli na dołaravaj kupiury vyjavu Žłobinskaha rajvykankama
Burnaja dyskusija z-za vyjavy na reviersie 20‑dołaravaj kupiury razharnułasia ŭ sacsietcy Threads. Uvažlivyja biełarusy razhledzieli ŭ joj ni mnoha ni mała — vyjavu Žłobinskaha rajvykankama.
Adzin z karystalnikaŭ sacsietki padzialiŭsia zdymkam, paraŭnaŭšy vyjavu na advarotnym baku kupiury ŭ 20 amierykanskich dalaraŭ i fatahrafiju budynka Žłobinskaha rajonnaha vykanaŭčaha kamiteta. Aŭtar dopisu źviarnuŭ uvahu na dziŭnaje padabienstva fasada Biełaha doma (a mienavita jon raźmieščany na amierykanskaj kupiury) z budynkam rajonnaj administracyi adnaho ź biełaruskich rajcentraŭ, piša «Telehraf».
Mnohija kamientatary pryznalisia, što dahetul takoha ŭražalnaha padabienstva nie zaŭvažali, ale, ubačyŭšy adnojčy, «razbačyć» heta ŭžo dakładna nie atrymajecca — toj ža vyrazny porcik z kałonami i frantonam, taja ž strohaja simietryja fasada i raźmiaščeńnie voknaŭ u dvuchpaviarchovym budynku. Adroźnieńni chiba što ŭ drobnych detalach bareljefaŭ i dachu.
«Jak ciapier z hetym žyć?» — zadaŭsia rytaryčnym pytańniem adzin z kamientataraŭ.
Mnohija ŭdzielniki dyskusii padyšli da pytańnia z humaram.
«Cikava, Tramp u BTI ŭzhadniŭ ramont?» — «Mahčyma. Ciapier treba na amnistyju pa samabudzie niejak paśpieć», — padtrymaŭ žart inšy, pierakłaŭšy amierykanskija padziei na biełaruskija realii.
«Vy nie dumali, što ŭ hetym zamiašana Žłobinskaja masonskaja łoža?» — pasprabavała ŭvieści dyskusiju ŭ bok teoryi zmovy adna z karystalnic sacsietki.
«Praz hod Minsk stanie stalicaj ZŠA, praviarajcie!» — zrabiŭ svoj prahnoz u tym ža styli inšy.
Zrešty, niekatoryja kamientatary vyrašyli zastavacca ŭ racyjanalnaj płoskaści, adznačyŭšy, što abodva budynki — i aficyjnaja rezidencyja prezidenta ZŠA, i budynak vykankama ŭ biełaruskaj hłybincy — prosta pabudavany ŭ adnym architekturnym styli.
«Takich rajvykankamaŭ pa ŭsim śviecie nie źličyć. Zvyčajny nieakłasicyzm», — sucha zaŭvažyŭ adzin z udzielnikaŭ dyskusii.
Sapraŭdy, abodva budynki adnosiacca da nieakłasičnaha stylu. Bieły dom byŭ raspracavany irłandskim architektaram Džejmsam Chobanam u tak zvanym paładyjanskim styli, a budynak Žłobinskaha rajvykankama vytrymany ŭ duchu savieckaha nieakłasicyzmu, abo stalinskaha ampiru, što i tłumačyć ich padabienstva.
Ciapier čytajuć
Što zdaryłasia ź Mikitam Miełkazioravym, jaki raptoŭna pamior siońnia nočču?26
Kamientary