Ułady Łatvii razhladajuć mahčymaść demantažu čyhunačnych puciej, jakija viaduć u Rasiju, paviedamlaje LSM. Pra heta zajaviŭ prezident krainy Edhars Rynkievičs pa vynikach sustrečy z premjerkaj Evikaj Siliniaj.
Da kanca hoda ŭrad rychtuje acenku nastupstvaŭ takoha kroku razam z Nacyjanalnymi ŭzbrojenymi siłami. Demantaž čyhunki moža stać mieraj pa ŭmacavańni biaśpieki i abarony, adnak rašeńnie budzie prymacca tolki paśla acenki sacyjalna-ekanamičnych nastupstvaŭ i času, nieabchodnaha na raboty.
Premjerka Silinia adznačyła, što pytańnie treba abmiarkoŭvać kaardynavana ź Litvoj, Estonijaj, Finlandyjaj i Polščaj, bo dziejańni na ŭschodniaj miažy pavinny być uzhodnienyja z sajuźnikami.
Łatvijskija vajskoŭcy prapanavali razabrać rejki bližej da Rasii jak mieru kontrmabilnaści ŭ vypadku napadu. Ministerstvam transpartu, MUS i inšym strukturam daručyli acanić mahčymyja nastupstvy, kankretnych terminaŭ rabot pakul niama.
Ministr unutranych spraŭ Łatvii Rychard Kazłoŭskis adznačyŭ, što pakul čyhunka jašče vykarystoŭvajecca dla hruzapieravozak, ale ŭ vypadku pahrozy daviadziecca dziejničać nieadkładna.
Były ministr abarony Łatvii Arcis Pabryks zajaviŭ, što «rejki treba było znosić jašče ŭčora», bo Rasija moža vykarystoŭvać ich u vajennych metach i dla abychodu sankcyj. Jon paraŭnaŭ piarečańni adnosna demantažu z arhumientami Jeŭropy pra zakupku rasijskich enierharesursaŭ, nahadvajučy, što krainy Bałtyi admovilisia ad rasijskaha hazu biez katastrofy dla ekanomiki.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA16
Kamientary