U Biełarusi ŭviali novyja patrabavańni da łambardaŭ. Heta praduhledžana ŭkazam Łukašenki, jaki ŭdaskanalvaje rehulavańnie mikrafinansavaj dziejnaści, paviedamlaje Office Life.
Jak paviedamiŭ namieśnik načalnika hałoŭnaha ŭpraŭleńnia Nacbanka Mikałaj Dzik, kali pradmiet, zdadzieny ŭ łambard, byŭ nabyty, ale paśla pa jaho źviarnuŭsia ŭładalnik z patrabavańniem viarnuć majomaść, łambard budzie abaviazany kampiensavać straty sumlennamu pakupniku. Pakolki łambard niedastatkova prakantralavaŭ u svaich biznes-pracesach momant paćviardžeńnia taho, što pradmiet zakładu sapraŭdy naležaŭ čałavieku, jaki jaho zakłaŭ.
Dadatkova da łambardaŭ ustanaŭlivajucca patrabavańni da dziełavoj reputacyi kiraŭnikoŭ i bienieficyjarnych uładalnikaŭ hetaj jurydyčnaj asoby. Na dumku Nacbanka, heta budzie stymulavać biźnies da bolšaj sacyjalnaj adkaznaści.
U cełym, jak padkreślili ŭ Nacbanku, ukaz źmianiaje dziejučy padychod da vyznačeńnia mikrafinansavaj dziejnaści. Ciapier takoj dziejnaściu budzie ličycca zaklučeńnie navat adnaho mikrapazyku. Raniej patrabavałasia dva i bolš vypadki.
Apieratary sotavaj suviazi taksama atrymali prava pradastaŭlać spažyvieckija mikrapazyki ŭ pamiery da 200 bazavych vieličyń (siońnia — 8400 rubloŭ, z 1 studzienia — 9000 rubloŭ). Na takuju ž sumu atrymali prava pradastaŭlać mikrapazyki i łambardy — biez zakładu i za košt srodkaŭ apierataraŭ anłajn-pazyki. Raniej mikrapazyki byli tolki załohavymi, padkreśliŭ Mikałaj Dzik.
Akramia taho, u Nacbanku ŭdakładnili, što dakumientam zabaroniena kamiercyjnym mikrafinansavym arhanizacyjam pryciahvać u pazyku ad ułaśnikaŭ majomaści, ich zasnavalnikaŭ (udzielnikaŭ) hrašovyja srodki na kabalnych umovach, heta značyć z vypłataj pracentaŭ za karystańnie ŭ pamiery, jaki pieravyšaje ŭstanoŭleny rehulataram maksimalny ŭzrovień.
Taksama zabaroniena pradastaŭlać ułaśnikam majomaści, zasnavalnikam (udzielnikam), rabotnikam takoj arhanizacyi i Nacyjanalnaha banka pazyki na lhotnych umovach — biez vypłaty pracentaŭ za karystańnie imi abo z vypłataj pracentaŭ u pamiery nižejšym za ŭstanoŭleny Nacyjanalnym bankam maksimalny ŭzrovień.
Kamientary