Načalnik milicyi Brahina stralaŭ u svaju žonku. Jana cudam vyžyła
Siarhiej Niaznajeŭ trapiŭ na Čornuju kartu Biełarusi za toje, što davaŭ u sudzie chłuślivyja pakazańni suprać udzielnikaŭ pratestaŭ. Ciapier jon za kratami.
Karjera pałkoŭnika Siarhieja Niaznajeva, abarvałasia niečakana, u adzin momant. Jon, načalnik Brahinskaha RAUSa, napiŭsia i streliŭ u svaju žonku Aksanu. «Pašancavała: litaralna niekalki milimietraŭ laviej — i jana b nie vyžyła», — napisaŭ błohier Ihar Łosik, jaki apynuŭsia ŭ SIZA KDB u adnoj kamiery z aryštavanym Niaznajevym.
Pa słovach Łosika, 46-hadovaha byłoha milicejskaha načalnika ŭžo asudzili. Dakładny prysud nieviadomy.
U 2020 hodzie Niaznajeŭ byŭ pieršym namieśnikam načalnika Karmianskaha RAUSa i deputatam miascovaha rajsavieta. U toj čas jaho imia dadali na Čornuju kartu Biełarusi — za toje, što davaŭ u sudzie chłuślivyja pakazańni suprać udzielnikaŭ pratestaŭ.
U lutym 2021 hoda Niaznajeŭ źjeździŭ delehatam na Usiebiełaruski narodny schod.
Lipień 2021 hoda byŭ bahaty na padziei dla hetaha milicejskaha načalnika. Spačatku jon sudziŭsia z 31‑hadovym miascovym žycharom, jaki napisaŭ na jaho niehatyŭnyja kamienty ŭ internecie. Palitviazień atrymaŭ dva hady «chimii» z nakiravańniem, a taksama pavinien byŭ zapłacić 1500 rubloŭ kampiensacyi. A praź niekalki tydniaŭ vynieśli prysud inšamu žycharu Karmy — za toje, što pryjšoŭ na pryjom da Niaznajeva i niekalki razoŭ udaryŭ jaho. 38‑hadovy mužčyna atrymaŭ za heta dva hady kałonii.
U kancy 2021 hoda milicyjanier pajšoŭ na pavyšeńnie — uznačaliŭ Brahinski RAUS. U mai 2024 hoda milicejski načalnik prapaŭ z publičnaj śfiery. Adna z apošnich zhadak pra jaho ŭ miascovaj presie — daterminovaje hałasavańnie na parłamienckich vybarach, kudy Siarhiej Niaznajeŭ razam z žonkaj pryjšoŭ adnym ź pieršych.
Heta była para, pra jakuju z honaram pisali prapahandysty. Aksana Niaznajeva navat atrymała miedal «Žoncy aficera». Jon uručajecca tym žančynam, jakija byli ŭ šlubie ź milicyjanierami ci vajskoŭcami na praciahu bolš čym 20 hadoŭ ich słužby.
«Na dumku Niaznajevych, zarokam ščaślivaha siamiejnaha žyćcia źjaŭlajecca zdolnaść canić inšaha čałavieka, jaho hodnaść, zachapleńni, unutrany śviet i žyćciovuju pazicyju, a taksama ŭmieńnie znachodzić kampramisy ŭ roznych situacyjach», — pisała homielskaja milicyja.
Niaŭmieńnie znachodzić kampramis pryviało Niaznajeva za kraty. Dakładna nie viadoma, pa jakim artykule abvinavačvali byłoha milicejskaha načalnika. Kali kiravacca praktykaj, to jaho musili sudzić za zabojstva (artykuł 139 Kryminalnaha kodeksa), ale jak za złačynstva, nie daviedzienaje da kanca. Jon chacieŭ zabić — prosta pramachnuŭsia. Adkaznaść za takuju «sprobu» takaja samaja, jak i ŭ vypadku, kali b jon realizavaŭ svoj płan da kanca. Za zabojstva ŭ Biełarusi dajuć u zaležnaści ad abstavinaŭ ad 6 hadoŭ kałonii da rasstrełu.
«Naša Niva» — bastyjon biełaruščyny
PADTRYMAĆCiapier čytajuć
Šeść faktaŭ pra Andreja Švieda — byłoha hienprakurora, jaki ciapier staŭ staršynioj Viarchoŭnaha suda4
Kamientary