Lidary ES damovilisia vydzielić Ukrainie 90 młrd jeŭra. Zamarožanyja rasijskija aktyvy vykarystoŭvacca nie buduć

Lidary Jeŭrapiejskaha sajuza padčas 16‑hadzinnaha abmierkavańnia tak i nie zmahli ŭzhadnić schiemu finansavańnia Ukrainy za košt zamarožanych u Jeŭropie rasijskich aktyvaŭ. Adnak, jak vyhladaje, bankructva Ukrainie pakul nie pahražaje: ES uchvaliŭ finansavuju padtrymku Kijeva ŭ pamiery 90 młrd jeŭra za košt pazyki, zabiaśpiečanaj biudžetam Jeŭrasajuza, piša Bi-bi-si.

«Rašeńnie ab pradastaŭleńni Ukrainie padtrymki ŭ pamiery 90 miljardaŭ jeŭra na 2026—2027 hady ŭchvalena», — napisaŭ staršynia samitu ES Antoniu Košta ŭ sacyjalnych sietkach u noč na piatnicu paśla šmathadzinnych pieramovaŭ.

Košta nie ŭdakładniŭ, adkul pastupiać hetyja srodki, adnak u prajekcie tekstu vysnoŭ samitu, ź jakim aznajomiłasia ahienctva Reuters, havorycca, što srodki buduć pryciahnutyja praz zapazyčańni na rynkach kapitału, zabiaśpiečanyja biudžetam ES.

Hetaje rašeńnie było pryniataje paśla šmathadzinnych abmierkavańniaŭ techničnych detalaŭ kredytu, zasnavanaha na zamarožanych rasijskich aktyvach. Adnak vykarystać rasijskija aktyvy jeŭrapiejskija lidary tak i nie navažylisia. Jak patłumačyli Reuters nienazvanyja dypłamaty, heta akazałasia zanadta składanym z palityčnaha punktu hledžańnia.

«My pierajšli ad vyratavańnia Ukrainy da zachavańnia tvaru — prynamsi tvaru tych, chto nastojvaŭ na vykarystańni zamarožanych aktyvaŭ», — cytuje Reuters adnaho ź jeŭrapiejskich dypłamataŭ.

Pavodle pieršapačatkovaha płana, finansavańnie Ukrainy pavinna było ažyćciaŭlacca za košt rasijskich reziervaŭ. Ukraina, jak mierkavałasia, atrymlivała častku hetych srodkaŭ u kredyt i abaviazvałasia viarnuć jaho tolki paśla taho, jak Rasija vypłacić reparacyi za ŭvarvańnie, škoda ad jakoha ŭžo aceńvajecca bolš jak u paŭtryljona dalaraŭ.

Adnak niekalki krain Sajuza z samaha pačatku vystupali suprać hetaha płana. Akramia lidaraŭ Čechii, Vienhryi i Słavakii, jakich ličać prarasijskimi, sumnievy ŭ metazhodnaści vykarystańnia zamarožanych rasijskich aktyvaŭ vykazvali Italija i, što asabliva važna, Bielhija, dzie znachodzicca depazitaryj Euroclear, u jakim zachoŭvajecca 193 młrd z 210 młrd zamarožanych u Jeŭropie srodkaŭ Kramla.

Jak piša Financial Times sa spasyłkaj na aficyjnych asob, daśviedčanych pra chod pieramovaŭ, Bielhija zapatrabavała maštabnych harantyj dla pakryćcia lubych finansavych ryzyk, źviazanych z kredytam, što i padšturchnuła inšych lidaraŭ adchilić hetyja ŭmovy.

• 2
• 0
• 2
• 1
• 0
• 0
• 0
• 0