Andrej Švied, architektar represij, pryznačany staršynioj Viarchoŭnaha suda
52‑hadovy Švied byŭ taksama adnym z aŭtaraŭ idei viartańnia da temy «hienacydu biełaruskaha naroda».
Andrej Švied pryznačany staršynioj Viarchoŭnaha suda, takoje rašeńnie pryniaŭ UNS. Raniej jon byŭ hienieralnym prakuroram.
Andrej Švied byŭ samym aktyŭnym i inicyjatyŭnym z łukašenkaŭskich siłavikoŭ. Heta pad jaho kiraŭnictvam pracuje «kamisija pa viartańni» — pryčym jon usialak staviŭ pałki ŭ koły tym, chto chacia b namiakaŭ na patreby źmianšeńnia represij. Pry im prakuratura stała hałoŭnym karnym orhanam. A sam Švied zachapiŭ Łukašenku idejaj «hienacyda biełaruskaha naroda».
Švied naradziŭsia ŭ 1973 hodzie ŭ Hłuškavičach Lelčyckaha rajona Homielskaj vobłaści. U kancy 1970‑ch hadoŭ jaho baćka zahinuŭ u aŭtamabilnaj avaryi padčas pajezdki na radzimu žonki ŭ Mahiloŭskuju vobłaść. Nieŭzabavie maci razam ź dziećmi pierajechała ŭ Lenina Horackaha rajona.
Andrej Švied skončyŭ u 1996 hodzie jurydyčny fakultet BDU. U 1996—1998 hadach pracavaŭ na roznych pasadach u orhanach prakuratury Minska.
U 1998—2006 hadach prachodziŭ słužbu na roznych pasadach u Hienprakuratury. U 1999—2003 hadach pracavaŭ staršym prakuroram adździeła Hienprakuratury pa nahladzie za rasśledavańniem kryminalnych spraŭ i vykanańniem zakonaŭ pa baraćbie z arhanizavanaj złačynnaściu i karupcyjaj.
U 2005—2006 hadach — načalnik upraŭleńnia pravavoha zabieśpiačeńnia, infarmacyi i hramadskich suviaziaŭ Hienprakuratury. Z 2006 pa 2010 hod — načalnik ekśpiertna-pravavoha adździeła Dziaržaŭnaha sakrataryjata Rady biaśpieki.
U 2010—2011 hadach pracavaŭ namieśnikam hienieralnaha prakurora. Źjaŭlaŭsia kiraŭnikom śledčaj hrupy pa spravie ab vybuchu ŭ minskim mietro ŭ 2011 hodzie.
Z 2012 pa 2013 hoda pracavaŭ pieršym namieśnikam staršyni Śledčaha kamiteta.
Z 22 krasavika 2013 hoda pa 9 vieraśnia 2020 hoda — staršynia Dziaržaŭnaha kamiteta sudovych ekśpiertyz.
9 vieraśnia 2020 hoda pryznačany hienieralnym prakuroram.
U vieraśni 2022 hoda vykazaŭsia suprać amnistyi ludziej, jakija trapili pad palityčnyja represii.
U lutym 2023 hoda ŭznačaliŭ kamisiju pa razhladzie zvarotaŭ hramadzian, jakija znachodziacca za miažoj, pa pytańniach učynienych imi pravaparušeńniaŭ.
Viarchoŭny sud z 1997 hoda ŭznačalvaŭ Valancin Sukała.
Ciapier čytajuć
Maksim Znak naviedaŭ śpiektakl «Zekamieron», pastaŭleny pa jahonaj knizie, napisanaj u SIZA4
Kamientary
Pośle etoho kaŕjera Švieda pošła v horu.