Stała viadoma, jak byŭ arhanizavany pryjom vyzvalenych palitviaźniaŭ adrazu ŭ troch krainach

Pa słovach Volhi Zazulinskaj, rehistracyjny centr byŭ padrychtavany zahadzia, i kamanda doŭhi čas čakała prybyćcia ludziej. Płanavałasia, što jany prybuduć u subotu ŭ Litvu, adnak situacyja niečakana źmianiłasia: ludzi apynulisia va Ukrainie. Niahledziačy na heta, udałosia chutka mabilizavacca.

Da dapamohi dałučylisia ŭkrainskija arhanizacyi, u tym liku vałanciorskaja arhanizacyja «Sustreča», jakaja mieła mahčymaść niepasredna kantaktavać ź biełaruskimi palitviaźniami na terytoryi Ukrainy. Pradstaŭnica demakratyčnych sił Biełarusi va Ukrainie Śviatłana Šacilina pajechała da ludziej i padtrymlivała ź imi suviaź na miescy.

Dziakujučy najaŭnaści kaardynacyjnych štaboŭ u Vilni i Varšavie, arhanizacyi vielmi chutka pieraaryjentavali pracu na Ukrainu. Pačalisia apieratyŭnyja zakupki ŭsiaho nieabchodnaha: mabilnych telefonaŭ, srodkaŭ hihijeny, lekaŭ i asabistych rečaŭ, jakija byli patrebnyja ludziam. 

Kali stała zrazumieła, što ludzi nakiroŭvajucca dalej u Jeŭropu, była arhanizavana ich dastaŭka ŭ rehistracyjnyja centry ŭ Varšavie i Vilni.

Upieršyniu ludziam prapanavali samastojna abrać krainu — Polšču abo Litvu. Kožnaha eks-palitviaźnia apytvali asobna. Šmat chto byŭ ź ich dezaryjentavany paśla pieražytaha: ludzi mianiali pieršapačatkovyja rašeńni, vahalisia. U vyniku 89 čałaviek zastalisia ŭ Polščy, a 20 pajechali ŭ Litvu.

U rehistracyjnych centrach pracavała vialikaja kolkaść arhanizacyj i vałancioraŭ. U Varšavie kaardynacyju štaba ŭziali na siabie Dissidentby i Centr biełaruskaj salidarnaści. Ludziej sustrakali namieśnik kiraŭnicy Abjadnanaha pierachodnaha kabinieta Pavieł Łatuška i śpikier Kaardynacyjnaj rady Arciom Bruchan. Na miescy pracavali dziasiatki vałancioraŭ, a taksama pradstaŭniki pravaabarončaha centra «Viasna», inicyjatyvy «Volnaja», PEN-centra, Biełaruskaj asacyjacyi žurnalistaŭ, «Da voli» (asacyjacyi byłych palitviaźniaŭ), inicyjatyvy «Partyzanki». Častka arhanizacyj, u tym liku Libereco, pracavała dystancyjna. U štabie taksama prysutničali pradstaŭniki Humanosh.

Usie nieabchodnyja rečy byli zahadzia zakuplenyja. Na praciahu prykładna dźviuch hadzin praviali apytańni, paśla čaho ŭsich ludziej terminova raźmiaścili ŭ hatelach. Paśla taho jak ludzi zmohuć adpačyć, pačniecca nastupny etap pracy: lehalizacyja, jurydyčnyja kansultacyi, akazańnie miedycynskaj dapamohi, u tym liku terminovaj.

Asobnaja ŭvaha budzie nadadziena ŭźjadnańniu siemjaŭ — tym, čyje rodnyja zastajucca ŭ Biełarusi. Dla mnohich heta asabliva važna, bo niekatoryja praviali ŭ turmach i kałonijach bolš za piać hadoŭ biez mahčymaści narmalnych kantaktaŭ ź blizkimi.

Usie byłyja palitviaźni znachodziacca na suviazi, i za kožnym zamacavany asabisty mientar. Heta čałaviek, jaki budzie supravadžać ich krok za krokam: ad momantu rehistracyi i da poŭnaj lehalizacyi, a taksama dapamahać zrazumieć, jak budavać žyćcio dalej u novych umovach.

U Litvie taksama byŭ zahadzia padrychtavany štab. U jaho pracy brali ŭdzieł supracoŭniki Ofisa Śviatłany Cichanoŭskaj, a sama Śviatłana Cichanoŭskaja asabista znachodziłasia tam razam z vałanciorami. Taksama prysutničali pradstaŭniki Abjadnanaha pierachodnaha kabinieta, Pravaabarončaha centra «Viasna», inicyjatyvy «Volnaja», fondu «Kraina dla žyćcia». Biełaruskija lekary, nazvu arhanizacyi jakich pakul nielha ahałošvać, akazvali miedycynskuju dapamohu na miescy. Dałučylisia i Litoŭski Čyrvony Kryž, a taksama dypłamaty roznych krain, jakija padtrymlivali ludziej u štabie.

Ludzi, jakija vyjšli na volu, mocna stomlenyja, tamu im dali mahčymaść adpačyć. Ich asnoŭnaje žadańnie — pabyć u cišyni i sam-nasam z saboj. Hetaje žadańnie było ŭličana: ludzi žyvuć asobna, nie ŭ šełtarach.

Asobnuju padziaku Volha Zazulinskaja vykazała arhanizacyi Freedom House, jakaja vielmi chutka dałučyłasia da dapamohi: jaje supracoŭniki arhanizavali žyllo i z nastupnaha dnia pačynajuć dapamahać z pytańniami lehalizacyi. 

• 7
• 0
• 0
• 1
• 0
• 0
• 0
• 2