U ZŠA apublikavali rasšyfroŭki razmoŭ, u jakich Pucin jašče ŭ 2001‑m raskazvaŭ Bušu pra toje, što Ukraina — «štučnaja dziaržava»

«Ukrainskaja praŭda» adznačyła niekatoryja vykazvańni Pucina pra Ukrainu ŭ hetych rasšyfroŭkach.

«Što nasamreč adbyłosia? Savieckaja dobraja vola SSSR źmianiła śviet, dobraachvotna. Rasija dobraachvotna addała tysiačy kvadratnych terytoryj. Heta niešta niečuvanaje. Addali Ukrainu, jakaja stahodździami była častkaj Rasii. Addali Kazachstan. Addali taksama Kaŭkaz. Heta ciažka ŭjavić, i heta zrabili partyjnyja bosy», — skazaŭ Pucin 16 červienia 2001 hoda Bušu.

U razmovie ad 6 krasavika 2008 hoda Pucin raspavioŭ Bušu pra Ukrainu jak pra «štučnuju dziaržavu» i papiaredziŭ, što ŭvachodžańnie krainy ŭ NATA» «stvoryć u doŭhaterminovaj pierśpiektyvie pole kanfliktu pamiž vami i nami, doŭhaterminovaj kanfrantacyi».

«Va Ukrainie pražyvajuć 17 młn rasijanaŭ, heta tracina nasielnictva. Ukraina — vielmi składanaja kraina. Heta nie dziaržava, jakaja ŭźnikła naturalnym čynam. Heta štučnaja kraina, stvoranaja ŭ savieckija časy. Paśla Druhoj suśvietnaj vajny Ukraina atrymała terytoryi ad Polščy, Rumynii i Vienhryi — heta bolšaja častka zachodniaj Ukrainy. U 1920‑1930 hadach Ukraina atrymała terytoryi ad Rasii — heta ŭschodniaja častka krainy. U 1956 hodzie Ukrainie pieradali Krymski paŭvostraŭ… Tam žyvuć ludzi ź vielmi roznymi pohladami. Kali pajechać u zachodniuju Ukrainu — možna znajści vioski, dzie razmaŭlajuć tolki na vienhierskaj movie i ludzi nosiać hetyja ich kapielušy. Na ŭschodzie ludzi nosiać kaściumy, halštuki i vialikija kapielušy. Bolšaść ukrainskaha nasielnictva ŭsprymaje NATO jak varožuju arhanizacyju», — pryvodzić vydańnie słovy Pucina sa stenahramy.

Ad hetaha jon pierajšoŭ da tłumačeńniaŭ, što patencyjnaje dałučeńnie Ukrainy da NATO stvoryć prablemy dla Rasii.

«Heta stvaraje pahrozu źjaŭleńnia vajskovych baz i razhortvańnia novych sistem uzbrajeńnia niepadalok ad Rasi. Heta stvaraje niavyznačanaść i pahrozy dla nas. Rasija, abapirajučysia na antynataŭskija siły va Ukrainie, budzie pracavać nad pazbaŭleńniem NATO mahčymaści pašyreńnia. Rasija ŭvieś čas budzie stvarać tam prablemy. Voś navošta heta? Navošta členstva Ukrainy ŭ NATO, jakaja karyść ad hetaha dla NATO i ZŠA? Dla hetaha moža być tolki adna pryčyna, i heta — zamacavać status Ukrainy jak častki zachodniaha śvietu, vierahodna, takaja łohika. Nie dumaju, što heta pravilnaja łohika (…) A ŭličvajučy roznahałośsi pohladaŭ adnosna siabroŭstva ŭ NATO, kraina prosta raspadziecca na kavałki. Ja zaŭsiody kazaŭ, što jość peŭnaja prazachodniaja častka i peŭnaja prarasijskaja častka», — arhumientuje Pucin, dadajučy, što palityčnaje žyćcio Ukrainy adlustroŭvaje hetyja supiarečnaści, a prazachodnija siły, jakija pryjšli da ŭłady paśla Aranžavaj revalucyi, «adrazu pasvarylisia pamiž saboj».

«Tam staić pytańnie nie pra dałučeńnie da NATO, a pra toje, kab zabiaśpiečyć samadastatkovaść Ukrainy. I taksama treba ŭzmacniać ich ekanomiku», — kazaŭ jon.

• 0
• 1
• 1
• 12
• 2
• 0
• 10
• 0