U ZŠA mužčyna pad vyhladam ahienta FBR sprabavaŭ vyzvalić z turmy Łuidžy Mandžone

Mužčyna pad vyhladam ahienta Fiederalnaha biuro rasśledavańniaŭ (FBR) pasprabavaŭ vyzvalić z turmy Łuidžy Mandžone, jakoha abvinavačvajuć u zabojstvie kiraŭnika strachavoj kampanii UnitedHealthcare Brajana Tompsana ŭ śniežni 2024 hoda. Zabojstva vysokapastaŭlenaha strachoŭščyka vyklikała šyrokuju dyskusiju ŭ ZŠA ab košcie miedycynskaha absłuhoŭvańnia, piša Bi-bi-si.

36‑hadovy žychar amierykanskaha štata Miniesota Mark Andersan pryjšoŭ u fiederalnuju turmu Ńju-Jorka, nazvaŭsia ahientam FBR i zajaviŭ, što ŭ jaho jość pastanova suda ab vyzvaleńni Mandžone.

Kali supracoŭniki śledčaha izalatara Metropolitan Detention Center u Bruklinie zapatrabavali pakazać dakumienty, Andersan pakazaŭ paśviedčańnie kiroŭcy štata Miniesota i zajaviŭ, što ŭzbrojeny.

Supracoŭniki abšukali jaho i znajšli ŭ jaho videlec dla barbiekiu i kruhłaje stalovaje lazo, jakoje vonkava nahadvaje nož dla picy.

Pavialičyć

Palicejskija zatrymali Andersana.

Kiraŭnik najbujniejšaj amierykanskaj kampanii ŭ halinie miedycynskaha strachavańnia — UnitedHealthcare — Brajan Tompsan byŭ zabity 4 śniežnia 2024 hoda. Stralba adbyłasia ŭ ažyŭlenaj častcy Manchetena, niedaloka ad Tajms-skvier i Centralnaha parka. Praz šeść dzion Mandžonie zatrymali i vystavili abvinavačvańni. Z taho času jon znachodzicca ŭ turmie Bruklina z 2024 hoda.

Jon nie pryznaŭ siabie vinavatym.

Zabojstva Brajana Tompsana ŭskałychnuła amierykanskaje hramadstva i prademanstravała niezadavolenaść mnohich amierykancaŭ niedastupnaściu miedycyny.

Mierkavanaha zabojcu stali nazyvać hierojem jašče da taho, jak jaho imia nazvała palicyja, a mnohija pryznalisia, što adčuli kali nie radaść, to zadavalnieńnie, kali daviedalisia pra hibiel strachoŭščyka-miljaniera.

Z momantu aryštu Mandžone pryciahnuŭ značnuju kolkaść prychilnikaŭ jak u internecie, tak i na sudovych pasiedžańniach.

Pryčyna takoj reakcyi — u najmacniejšaj niezadavolenaści (kali nie skazać jaraści) mnostva amierykancaŭ tym, jak pracujuć miedycynskija strachavyja kampanii i ŭ cełym sistema achovy zdaroŭja ŭ ZŠA. Dachody strachoŭščykaŭ rastuć — i heta na fonie mnostva admoŭ klijentam u apłacie raschodaŭ na lačeńnie.

Mandžone vystavili abvinavačvańni ŭ naŭmysnym zabojstvie jak na ŭzroŭni štata, tak i na fiederalnym uzroŭni. U štacie Ńju-Jork, dzie byŭ zabity Tompsan, śmiarotnaje pakarańnie zabaroniena, abvinavačvańnie na ŭzroŭni štata pahražaje Mandžone pažyćciovym źniavoleńniem. Adnak na fiederalnym uzroŭni za takoje złačynstva złamyśnik moža być asudžany na śmiarotnaje pakarańnie, i abvinavačańnie ŭžo zajaviła, što płanuje zapytać mienavita najvyšejšuju mieru pakarańnia.

Adbor prysiažnych pa spravie Mandžone zapłanavany na vierasień.

• 1
• 1
• 1
• 0
• 1
• 3
• 0
• 0