Dziaŭčynu ŭdaryła tokam u minskim tralejbusie — ciapier jana lažyć u kardyjałohii
Dzijana nie čakała, što ŭ svaje 25 budzie mieć prablemy z sercam. Ale niadaŭna jana trapiła ŭ balnicu — paśla pajezdki na zvyčajnym minskim tralejbusie.
Pra svaje pryhody Dzijana raskazvaje ŭ tyktok-akaŭncie. Pavodle jaje słoŭ, usio adbyłosia 27 studzienia prykładna a 16.45.
Znachodziačysia na prypynku «Centr miłasernaści», dziaŭčyna pasprabavała zajści ŭ tralejbus №44. Jana ŭbačyła, što ŭ zadnich dźviarach tralejbusa ŭpaŭ chłopiec, ale padumała, što jon prosta pjany — ciapier dziaŭčyna dumaje, što jaho ŭdaryła tokam.
Toje, što zdaryłasia ź joj praź niekalki siekund, Dzijana apisvaje słovami «mianie litaralna prymahniciła da poručnia:
«Jak tolki ja ŭziałasia za poručań i stupiła na płatformu, mianie prosta prašybła. Heta byŭ piakielny bol. Mianie pačało treści, i ŭ hałavie tolki adna dumka — heta tok. Dalej pustata.
Aprytomnieła ja ŭžo ŭ siaredzinie sałona. Ludzi skazali, što ja strašna kryčała i niejki mužčyna litaralna adciahnuŭ mianie ad dźviarej».
Hetyja adčuvańni jana nie chutka zabudzie:
«Ciahlicy skruciła, nahu paralizavała na miescy. Kali b nie mužčyna-pasažyr, jaki mianie adciahnuŭ, nie viedaju, što b sa mnoj było».
U šokavym stanie dziaŭčyna ŭsio ž zdoleła padniacca i pajechać dalej pa svaich spravach. Ale niedzie praz hadzinu jana apynułasia doma i zrazumieła, što adčuvalnaść u nazie dahetul nie viarnułasia. Tady Dzijana vyklikała chutkuju dapamohu, i jaje špitalizavali.
Dzijana trapiła na lačeńnie ŭ minskuju balnicu №4. Tam u jaje vyjavili prablemy z sercam, apioki i traŭmu halenastopa.
U tyktoku Dzijana publikuje zdymki svajho tanomietra. Na adnym ź ich zafiksavany cisk 159/95 i puls 108, to-bok pakazčyki mocna pavyšanyja.
Biełaruska dahetul na lačeńni. Da jaje ŭžo prychodzili ŭ balnicu śledčy i milicyjanier, kab pahavaryć pra zdareńnie, i sama Dzijana nie choča pakidać hetuju historyju biez adkazaŭ. Dziaŭčyna piša ŭ kamientarach, što paśla vypiski z balnicy jana płanuje iści ŭ sud.
Vyhladaje, što joj daviadziecca lačyć paśla padziei nie tolki cieła, ale i dušu:
«Daktary sprabujuć ucichamiryć cisk i adnavić sardečny rytm žmieniami tabletak. Ciapier ja abviešanaja datčykami: siońnia pastavili SMAD, da hetaha byŭ chołter […]
Kožnuju noč ja znoŭ i znoŭ viartajusia ŭ toj momant, momant udaru tokam. Susiedka pa pałacie kaža, što ja kryču ŭ śnie i kidajusia pa łožku. Majo cieła prosta nie moža zabyć toj žach».
«Naša Niva» — bastyjon biełaruščyny
PADTRYMAĆ«Ź mianie ničoha nie voźmieš, a ludzi paciarpieli». Para piensijanieraŭ druhi hod nie moža vypisać ź minskaj kvatery šmatdzietnuju siamju emihrantaŭ
Zasnavalnica biełaruskaj IT-kampanii atrymała strašennyja traŭmy na harnałyžnym kurorcie ŭ Hruzii
Byłoha namieśnika staršyni BNF Anatola Fiodarava raźbiŭ insult prosta padčas strymu Piatruchina
Kamientary
maŭču