BČ: Polskija ciahniki nie vytrymali vialikich marazoŭ. Ale mahčyma heta niapraŭda
Biełaruskaja čyhunka patłumačyła, čamu daviałosia źniać z maršrutaŭ kamfartabielnyja ciahniki polskaj kampanii PESA i zamianić ich na zvyčajnyja sastavy z łakamatyvam. Polskija dyziel-ciahniki, jak śćviardžajecca, nie zmahli pracavać u ŭmovach mocnych marazoŭ, jakija ŭstalavalisia ŭ krainie.
U BČ adznačyli, što pierad kožnym rejsam ciahniki prachodziać abaviazkovy techničny ahlad, adnak nie ŭsia technika prystasavanaja da vielmi nizkich tempieratur. Tamu ruchomy sastaŭ, vyrableny ŭ krainach Jeŭrasajuza, časova źniali ź niekatorych papularnych maršrutaŭ. Źmieny zakranuli napramki Minsk — Viciebsk i Minsk — Mahiloŭ.
«U suviazi z hetym z 5 lutaha 2026 hoda dyziel-ciahniki vytvorčaści polskaj kampanii PESA sieryi DP6 na asobnych učastkach Biełaruskaj čyhunki zamienienyja na sastavy, sfarmiravanyja z vahonaŭ łakamatyŭnaj ciahi. Heta ciahniki №704/703, №712/711 i №714/713 Minsk — Viciebsk — Minsk», — raskazali ŭ Biełaruskaj čyhuncy.
Pry hetym u BČ padkreślili, što paśla ramontu hetyja dyziel-ciahniki viernucca na raniejšyja maršruty.
Ciažka skazać, ci hetaje tłumačeńnie praŭdzivaje, bo anałahičnyja ciahniki ŭ susiednich krainach pry tych samych marazach vykarystoŭvajucca zvyčajna. Niekatoryja ekśpierty vykazvali mierkavańnie, što pryčyna — u znosie ciahnikoŭ i niemahčymaści ich ramontu praz sankcyi.
Adznačajecca taksama, što, niahledziačy na śniehapady i marazy, Biełaruskaja čyhunka pracuje ŭ zvyčajnym režymie. Z 8 studzienia pa 2 lutaha bolš za 21 tysiaču čyhunačnikaŭ zadziejničali ŭ likvidacyi nastupstvaŭ niespryjalnaha nadvorja.
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary