У чэмпіянаце Беларусі будзе гуляць футбаліст зборнай Ямайкі, гэта самы дарагі гулец першынства краіны
Яго трансферны кошт — 3,2 млн еўра.
Чэмпіён краіны «МЛ Віцебск» падпісаў гульца зборнай Ямайкі Шамара Нікалсана.
Нікалсану 28 гадоў. Ён нарадзіўся ў сталіцы Ямайкі Кінгстане. Прафесійную кар’еру пачаў на радзіме, пасля чаго пераехаў у Еўропу. Спачатку гуляў за славенскі «Дамжале», потым у бельгійскім «Шарлеруа» (правёў за клуб 80 матчаў і забіў 11 мячоў), маскоўскім «Спартаку», французскім «Клермоне», апошні яго клуб — мексіканская «Ціхуана», які і аддае Нікалсана ў арэнду ў Беларусі.
Нікалсан правёў 62 матчы за зборную Ямайкі і забіў 11 галоў. Цяпер зборня гуляе ў плэй-оф за выхад на чэмпіянат свету і прэтэндуе на трапленне ў турнір. 27 сакавіка адбудзецца першы паўфінальны матч стыкавых матчаў супраць Новай Каледоніі. У выпадку перамогі яны ў фінале згуляюць са зборнай Дэмакратычнай Рэспублікі Конга.
Паводле звестак статыстычнага партала Transfermarkt, ён адразу стаў самым дарагім футбалістам чэмпіянату. Яго трансферная вартасць ацэньваецца ў 3,2 млн еўра. Так, у найлепшага гульца Беларусі мінулага года Валерыя Грамыкі, што перайшоў у «МЛ Віцебск» з казахстанскага «Кайрата» — 1,5 млн.
Уладальнік віцебскага клуба Арцём Лявонаў у інтэрв'ю Onliner.by расказаў, колькі будзе атрымліваць Шамар Нікалсан у камандзе.
«Некалькі тыдняў таму мне патэлефанаваў агент футбаліста і прапанаваў паслугі Шамара. Мы былі не супраць і дамовіліся пра ўмовы. Яны для нас вельмі добрыя. 90 % заробку будзе пакрываць «Ціхуана», з якой у Нікалсана дзейны кантракт. Мы будзем даплачваць каля 10 тысяч даляраў у месяц. У «Ціхуане» яго заробак каля 100 тысяч», — расказаў ён.
Лявонаў кажа, што ямайца матываваў пераход у беларускі чэмпіянат тым, што ёсць магчымасць гуляць у Лізе чэмпіёнаў: «Думаю, матывацыя менавіта ў гэтым: дайсці да асноўнага раўнда і спадабацца якому-небудзь іншаму клубу» [каб трапіць у асноўны раўнд Лігі чэмпіёнаў, трэба прайсці чатыры этапы кваліфікацыі — НН].
Магчыма, Нікалсан дэбютуе за «МЛ» у гэту нядзелю ў матчы ў адказ Кубка Беларусі супраць брэсцкага «Дынама», які пройдзе ў Віцебску.
Віталь з-пад Вілейкі, які падпаліў хату з уласнымі дзецьмі, завербаваўся ў расійскае войска. І прапаў на першым жа баявым заданні5
Каментары