Dźmitryj z Alšan raskrytykavaŭ biarozaŭskuju tušonku. U adkaz jamu mnohaje patłumačyli
Karystalnik Threads Dźmitryj maje ŭsiaho niekalki dziasiatkaŭ padpisčykaŭ i mienš za dziesiać pastoŭ, pieravažna relihijnaha źmiestu — jon jevanhielski chryścijanin z Alšan, — jakija amal nichto nie łajkaŭ. Adnak situacyja rezka źmianiłasia, kali mužčyna apublikavaŭ krytyčny dopis usiaho na niekalki słoŭ: «Biarozaŭskaha MK nie raju, tušonka — adzin tłušč, vytvorčaść h. BIAROZA».
Kab paćvierdzić svaje słovy, jon dadaŭ niekalki fotazdymkaŭ. Post chutka sabraŭ zvyš 26 tysiač prahladaŭ. Karystalniki paśpiašalisia patłumačyć Dźmitryju, u čym jaho fatalnaja pamyłka i jakija kansiervy treba vybirać.
Najpierš ludzi źviarnuli ŭvahu na toje, što zamiest śvinoj tušonki Dźmitryj nabyŭ zusim inšy pradukt — «Śniadanak turysta».
«Zamiest taho, kab uziać kansiervy toj samaj Biarozy, dzie napisana «Śvinina tušanaja» i paznačany pracent miasa pa zakładcy, vy nabyli tanny «Śniadanak turysta», jaki i nie pretenduje na status tušonki».
Ludzi paraili Dźmitryju bolš uvažliva vyvučać infarmacyju pra skład praduktu, jaki jon nabyŭ.
«Na blašancy napisana: «masavaja dola pa zakładcy 40%». Nastupnym razam pasprabujcie pačytać, kab nie ździŭlacca».
«U nas jość kuča tušonki z zakładkaj miasa 97,5%, biarycie jaje, u składzie napisany pracent zakładki miasa. Byccam maleńkija dzieci, na takich prastakoŭ i raźličana».
Jak zaŭvažajuć daśviedčanyja ŭ hetym pytańni biełarusy, kolkaść miasa ŭ pradukcie naŭprost upłyvaje na jaho košt. Nie varta čakać, što ŭ «Śniadanku turysta» za 3—4 rubli budzie šmat miasa.
«Aŭtar, biarozaŭskaja tušonka — najlepšaja!!! Uvažliva čytaj, što biareš: kolkaść miasa pa zakładcy ŭ pracentach i kolkaść tłušču ŭ «Śniadanku turysta», vyrablenym pa TU, značna mienšaja, čym u «dastaŭskaj». I jašče: hetaja tušonka ličycca pachodnaj. Ty chacieŭ, kab za 4 rubli tam paŭkarovy ŭpakavali)))»
«Śniadanki turysta», niezaležna ad vytvorcy, kaštujuć u rajonie 2,5—3 rubloŭ. Sapraŭdnaja tušonka z zakładkaj 97—98% kaštuje 5—7 rubloŭ za blašanku. Jak kažuć, adčujcie roźnicu».
Adzin z kamientataraŭ navat apublikavaŭ fota mienavita toj tušonki vytvorčaści Biarozaŭskaha miasakambinata, jakuju varta było kuplać.
Niekatoryja karystalniki adznačyli, što nabyty pradukt «budzie dobrym z bulbaj». A voś kali chočacca pajeści mienavita miasa, «treba brać z zakładkaj zvyš 90%». Bo «śniadanak turysta — heta nie paŭnavartasnaja tušonka. Jaho treba razahravać na ahni i jeści razam z bulbaj».
Jašče adzin karystalnik padzialiŭsia padrabiaznaj instrukcyjaj:
«Brać tušonku treba nie nižej za 72% pa zakładcy!!! 72% idealna padychodzić dla makarony pa-fłocku. Ad 80% možna jeści jak miasny chaładziec. Nu a kali chočacca zrabić buterbrody z tušonkaj — biarycie 92%».
Adnak znajšlisia i tyja, kaho aburyła takaja spažyvieckaja niepiśmiennaść.
«Čarhovy čałaviek, jaki nie ŭmieje čytać. I da darosłych hadoŭ nie razumieje roźnicy pamiž dziaržstandartami i TU».
Niekatoryja paraili aŭtaru vydalić dopis, kab nie hańbicca.
«Čeł, pakul nie pozna i heta bačyli tolki 18 tysiač čałaviek. Tam try kropki ŭ kucie > vydalić publikacyju. Potym pačytaj, čym adroźnivajecca dziaržstandart ad TU, i navučysia šukać na blašancy pracent zakładki».
Sam aŭtar zastaŭsia pry svaim mierkavańni i ŭpeŭnieny ŭ svajoj praŭdzie: «Niachaj uvieś śviet bačyć, što tłušč pradajuć pa canie tušonki».
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty10
Kamientary