«Spačatku było ciažka, a potym zvykaješ». Eks-hulec zbornaj Biełarusi vosiem miesiacaŭ pravioŭ u ŁPP
«My byli takoj biaspłatnaj rabočaj siłaj: jeździli pa kałhasach, pa pradpryjemstvach». Sumny finał zorki FK «Maładziečna» Michaiła Makoŭskaha, u jakoha nie atrymałasia ni ŭ kijeŭskim «Dynama», ni ŭ zbornaj Biełarusi.
Braty-bliźniaty Uładzimir i Michaił Makoŭskija ŭžo ŭ 16 hadoŭ pačali hulać za asnovu «Maładziečna» — mocnaha sieradniaka biełaruskaj vyšejšaj lihi ŭ pieršaj pałovie 90-ch, nahadvaje ich historyju «Trybuna».
Paśla pary jarkich siezonaŭ ich padpisała minskaje «Dynama» — hałoŭnaja siła biełaruskaha futboła taho času. I ŭ hetym kłubie ŭsio składvałasia dobra. Uładzimira pa vynikach 1996 hoda pryznali najlepšym futbalistam Biełarusi, Michaił taksama byŭ prykmietny.
U siaredzinie 1997 hoda bratoŭ padpisała kijeŭskaje «Dynama». Adnak va Ukrainie Makoŭskija nie zahulali. Michaił pravioŭ za asnoŭnuju kamandu tolki dva matčy, hulaŭ za «Dynama-2» i «Dynama-3». I ŭvohule ich karjera davoli imkliva pajšła na spad.
Naprykancy karjery Makoŭskija mianiali kłuby jak palčatki. Michaił hulaŭ za biełaruskija «Darydu», «Haradzieju», «Smarhoń», «Viliju». Vyjści na raniejšy ŭzrovień nie atrymałasia, chacia abodva pryciahvalisia ŭ zbornuju Biełarusi (Michaił pravioŭ 1 matč, a Uładzimir — 28 i zabiŭ 4 hały).
Paśla braty sprabavali pracavać trenierami, ale i tut nie skłałasia. Michaił Makoŭski ŭ 2018 hodzie byŭ pryznačany hałoŭnym trenieram rodnaha «Maładziečna», praŭda, prabyŭ na pasadzie ŭsiaho try dni.
Potym źjaviŭsia ŭ niećviarozym stanie na sustreču z zaŭziatarami — i jaho zvolnili. Jon raskazvaŭ, što vymušany pracavać na miasakambinacie. Praca byłomu futbalistu nie padabałasia, ale lepšaj u Maładziečnie jon znajści nie zmoh. Prablemy z ałkaholem nikudy nie źnikli.
Amal uvieś 2025 hod były hulec zbornaj pravioŭ u tak zvanym lačebna-pracoŭnym prafiłaktoryi (ŁPP).
Voś što jon kaža pra heta: «Nu tak, praŭda, pasiadzieŭ. Što ja tut novaha mahu raskazać? Jak tam spravy? Nu tak, pačytajcie, što ŭ internecie pišuć, chacia ŭ internecie ŭžo ničoha nie pišuć. Treba tam pabyvać, kab viedać, jak heta», — kaža 48‑hadovy Michaił.
Pakarańnie jon adbyvaŭ u ŁPP №8 u horadzie Ivacevičy. Raniej budynak, u jakim znachodzicca ŭstanova, vykarystoŭvaŭsia jak kałonija. U 2023 hodzie pavodle ŭkazu Łukašenki jana była pieraŭtvoranaja.
U Bresckuju vobłaść Makoŭskaha nakiravali tamu, što ŁPP Minskaj vobłaści, jaki znachodzicca ŭ Dziaržynsku, akazaŭsia pierapoŭnienym. Usiaho ŭ źniavoleńni były futbalist prabyŭ 8 miesiacaŭ, chacia pa prysudzie atrymaŭ 1 hod.
«Vyjšaŭ pa ŭmoŭna-daterminovym vyzvaleńni. Maładziečanski «Mietałurh», jaki źbirajecca vystupać u čempijanacie vobłaści pa futzale, napisaŭ harantyjny list, što ja bolš nie budu parušać zakon. Zaraz žyvu ŭ Maładziečnie, treba adnavić siły, tam [u ŁPP] maralna vielmi źniščajuć», — raskazvaje Michaił.
Svajho žylla ŭ jaho ŭ Maładziečnie niama — davodzicca zdymać. Kaliści była baćkoŭskaja kvatera, ale ź joj zdaryłasia historyja, jakaja pryviała da svarki z bratam i niekalkich hadoŭ uzajemnaha ihnaravańnia. Michaił śćviardžaje, što žyllo bieź jaho zhody pradaŭ Uładzimir. Ciapier hety kanflikt zastaŭsia ŭ minułym. Pieršy čas paśla vyzvaleńnia z ŁPP Michaił žyŭ u Minsku ŭ brata, ale potym viarnuŭsia na małuju radzimu.
Pra novuju pracu Michaił Makoŭski nie kaža ničoha, akramia taho, što jana «nie źviazanaja z futbołam». Raskazvaje, što pryčynaj traplańnia ŭ ŁPP stali try zatrymańni ŭ niećviarozym stanie na praciahu adnaho hoda.
«Vyjšaŭ na vulicu, idu mima supracoŭnikaŭ. Kažuć: padydzi siudy. Ja padyšoŭ, skazali dychnuć — dychnuŭ. Treci raz atrymlivajecca — voś i ŭsio.
Ja potym nidzie nie «śviaciŭsia». Znajšli mianie, kali ja ŭładkavaŭsia na pracu da pryvatnika: treba było pravieryć maje danyja — u RUUS adpravili. Nieŭzabavie za mnoj pryjechaŭ učastkovy», — raskazvaje Michaił.
Praces nad im byŭ chutkim — z prysudam adzin hod u ŁPP. Były futbalist padavaŭ apielacyju, ale biezvynikova.
«Ja kazaŭ, što zakadavaŭsia, žyvu z žančynaj, jość praca. Skazali, što niama pryčyn admianiać rašeńnie. Pryčynaj mahli być niejkija chvaroby abo invalidnaść».
Pra čas u ŁPP Makoŭski ŭspaminać nie choča.
«Spačatku było ciažka, a potym pryvykaješ. Ranicaj pajechaŭ, uviečary — viarnuŭsia. My byli takoj biaspłatnaj rabočaj siłaj: jeździli pa kałhasach, pa pradpryjemstvach. Častku ludziej z ŁPP nie vypuskajuć — jany na pramzonie pracujuć».
Michaił kaža, što i ŭ ŁPP sačyŭ za «Maładziečnam», jakoje viarnułasia ŭ vyšejšuju lihu paśla 21 hoda adsutnaści, ale zatrymałasia tolki na siezon.
Siońnia Michaił maryć pra viartańnie ŭ vialiki futboł.
Kamientary