Top‑10 samych upłyvovych biełarusaŭ u Rasii

«Heta hrošy biełarusaŭ, jakija byli vymušanyja źjechać u Rasiju, ale zacikaŭlenyja ŭ źmianieńni palityčnaha ładu ŭ krainie». Tak na startavaj pres‑kanfierencyi Uładzimir Niaklajeŭ patłumačyŭ pachodžańnie srodkaŭ na praviadzieńnie kampanii «Havary praŭdu». Chto ž ź biełarusaŭ u Rasii zajmaje ŭpłyvovyja ci vysokija pasady? Pryvodzim tut śpis viadomych i małaviadomych asobaŭ. Adrazu zaścierahajem, što nie ŭsie ź ich majuć palityčnyja ci hramadskija ambicyi, nie ŭsie navat trymajuć suviaź ź Biełaruśsiu.

1. Fiederalnaj nacyjanalnaj kulturnaj aŭtanomijaj «Biełarusy Rasii» kiruje Valeryj Kazakoŭ.

Jon čynoŭnik, jaki pracuje ŭ Administracyi prezidenta Rasii, pamočnik paŭnamocnaha pradstaŭnika prezidenta Rasii ŭ Sibirskaj fiederalnaj akruzie. Kazakoŭ doŭhija hady kiruje pradstaŭnictvam Sibirskaj fiederalnaj akruhi ŭ Maskvie. Narodžany ŭ Biełarusi, jon zrabiŭ karjeru ŭ Savieckaj Armii. Kandydat sacyjałahičnych navuk, pałkoŭnik u adstaŭcy, u postsaviecki čas pracavaŭ u Radzie biaśpieki Rasii i Administracyi prezidenta. Jon adzin ź niamnohich biełarusaŭ Rasii, jaki biare ŭdzieł u dziejnaści Zhurtavańnia biełarusaŭ śvietu «Baćkaŭščyna». Na IV źjeździe Fiederalnaj nacyjanalnaj kulturnaj aŭtanomii «Biełarusy Rasii», jaki prajšoŭ 23 krasavika, stała viadoma, što biełarusy Rasii inicyjujuć stvareńnie Biełaruskaha niezaležnaha instytuta ŭ Maskvie. Što heta budzie za instytut, pakul niajasna.

2. Paśla vychadu z turmy na dva damy — pad Minskam i ŭ Maskvie — žyvie były ministr sielskaj haspadarki Vasil Lavonaŭ.

Jon raźvivaje sielskahaspadarčy biźnies u rasijskim Čarnaziemji. Mienavita jon arhanizavaŭ vybarčuju kampaniju Hančaryka ŭ 2001 hodzie. Peŭnuju palityčnuju aktyŭnaść prajaŭlaŭ da hoda 2004‑ha. Ciapier ža pakul trymajecca ŭ cieni, ale zastajecca staršyniom apiakunskaje rady biełaruska‑rasijskaha fonda «Za novuju Biełaruś».

3. Były ministr unutranych spravaŭ Uładzimir Navumaŭ viedaje ŭsio pra hučnyja spravy.

Jahonaje imia fihuravała ŭ dakładzie Purhurydesa ab źnikłych palitykach i biźniesoŭcach. Pavodle niekatorych źviestak, ad pačatku hetaha hoda Navumaŭ pracuje na pasadzie daradcy Siarhieja Čemiezava, hienieralnaha dyrektara dziaržaŭnaj karparacyi «Rastechnałohii». Hetaja struktura znachodzicca pad asabistym kantrolem Uładzimira Pucina. Jak uradženiec Smalenščyny Navumaŭ nie maje prava bałatavacca ŭ prezidenty Biełarusi. Adnak jon dobra viedaje i Łukašenku, i ŭsich vysokich čynoŭnikaŭ.

4. Uładzimir Mulak z 1996 da 2001 hoda pracavaŭ na adkaznaj pasadzie ŭ «Biełarusnafcie».

Paśla svajho vymušanaha adjezdu ź Biełarusi jon adrazu znajšoŭ pracu ŭ AAT «NK Komi TEK». Ciapier ža Mulak — siabar praŭleńnia i vice‑prezident mahutnaj naftavaj kampanii «Łukojł». Jon načalnik hałoŭnaha ŭpraŭleńnia pa zabiaśpiečańni zdabyčy nafty i hazu. «Łukojł» maje svaje intaresy ŭ Biełarusi. U pucinskaj Rasii pryvatny «Łukojł» zaniaŭ pačesnaje miesca siarod dziaržaŭnych karparacyj.

Były hienieralny dyrektar «Biełarusnafty» Valeryj Kokaraŭ u 1990‑ch pracavaŭ vice‑premjeram pa paliŭna‑enierhietyčnym kompleksie. Ciapier jon taksama pracuje ŭ struktury «Łukojła»,

ale na mienš upłyvovaj pasadzie namieśnika hienieralnaha dyrektara pa navucy i inavacyjnaj dziejnaści AAT «RITEK».

5. Były kiraŭnik Administracyi prezidenta, a da taho — kadebist (byłych, z honaram kažuć jany, nie byvaje) Urał Łatypaŭ paśla adstaŭki try hady adpracavaŭ staršyniom kansultacyjnaje rady kampanii «Łukojł‑Biełaruś».

Z 2008 hoda Urał Łatypaŭ uznačaliŭ TAA «Dyrekt Mieniedžmient» — kiraŭničuju strukturu AAT «MTZ «Rubin», adnaho z najbujniejšych deviełapieraŭ rasijskaj stalicy, jaki naležyć vychadcu ź Minska Alaksandru Milaŭskamu. U toj ža kampanii peŭny čas pracavaŭ były premjer‑ministr Biełarusi (da 2001 hoda) Uładzimir Jarmošyn. Ciapier u joj ža pracuje były hałoŭny architektar Minska Alaksandr Čadovič. Jon zajmaje vysokuju pasadu vice‑prezidenta AAT MTZ «Rubin» pa architektury.

6. Paśpiachovy biźnies u Rasii maje Viktar Łahviniec.

U pieršyja hady kiravańnia Łukašenki jon byŭ blizki da kiraŭnika krainy praź jahony tahačasny kašel — Ivana Ciciankova. Vałodaŭ kampanijaj «Konta‑hrup», pakul nie raskułačyli. Tady ŭciok u Rasiju. Majomaść byłoha hienieralnaha dyrektara «Kałmnafty» (Kałmykija) nie multymiljonnaja, ale jość.

Chadzili čutki, što Łahviniec moh finansavać minułuju prezidenckuju kampaniju Alaksandra Kazulina, — prosta kab nasalić svajmu byłomu patronu. Praŭda, nijakich paćvierdžańniaŭ hetamu nie było.

Mała chto viedaje, što Viktar Łahviniec -- trajuradny brat Alesia Łahvinca, pamočnika Alaksandra Milinkieviča. Alesieŭ baćka Viktara chryściŭ. Braty nie padtrymlivajuć blizkaj suviazi, ale sustrakajucca na Radunicu.

7. Były kiraŭnik spravami prezidenta Ivan Ciciankoŭ u svoj čas padmiaŭ pad siabie vialiki biźnies u Biełarusi, ale, sa słovaŭ Łukašenki, «zarvaŭsia». Byŭ adpraŭleny ŭ adstaŭku. Uciok u Maskvu, a paśla prakłaŭ tudy darohu mnohim biełaruskim vysokapastaŭlenym emihrantam.

U 2000 hodzie jon zaniaŭ pasadu načalnika ŭpraŭleńnia łahistyki ŭ kancernie «Itera», daččynaj struktury «Hazproma». U 2001 hodzie Ciciankova źviazvali z kampanijaj Uładzimira Hančaryka. Žonka Ciciankova navat nadrukavała adkryty list Łukašenku, u jakim chrystom‑boham maliła nie čapać syna — jon, maŭlaŭ, za baćku nie adkazny.

U «Itery» Ciciankoŭ adrabiŭ hod, a paśla staŭ raźvivać ułasny biźnies.

8. Leanid Jeryn, jaki kiravaŭ biełaruskim KDB da 2004 hoda, znajšoŭ siabie ŭ bujnoj rasijskaj dziaržkarparacyi. Jon zajmaje pasadu daradcy pry prezidencie AAT «Rasijskaja čyhunka» Uładzimiru Jakuninu.

Maskva jamu nie čužaja. Jon tam pracavaŭ u FSB pierad svaim pierajezdam u Biełaruś, dzie jaho adrazu pryhreŭ Łukašenka. A ŭ Minsk Jeryn davoli časta lotaje ŭ adviedki.

9. U Maskvie ž znajšoŭ pracu papiarednik Jeryna na pasadzie staršyni KDB Uładzimir Mackievič.

Cikava, što pa pieršaj śpiecyjalnaści jon zajmaŭsia «chimičnaj technałohijaj pierapracoŭki nafty i hazu». U 1970—1973 hadach pracavaŭ inžynieram‑technołaham na Mazyrskim naftapierapracoŭčym zavodzie. A tady ŭžo pajšoŭ u savieckuju śpiecsłužbu. U adstaŭku Mackievič byŭ adpraŭleny paśla taho, jak śledčyja KDB pačali rasśledavać spravu ab palityčnych vykradańniach. 8 hadoŭ Mackievič uznačalvaŭ biełaruskuju dypmisiju ŭ Białhradzie. I ni słova nie skazaŭ adnosna tych hučnych spravaŭ. U svoj čas jon pieranios rak, apieravali jaho ŭ Niamieččynie, jon dahetul nazirajecca ŭ daktaroŭ i aktyŭnaj dziejnaściu nie zajmajecca.

10. Pa svajoj «pieršaj śpiecyjalnaści» ŭładkavaŭsia ŭ Maskvie były ŭsiomahutny načalnik Biełaruskaj čyhunki Viktar Rachmańko.

U Biełarusi jon straciŭ svaju pasadu praz karupcyjnuju spravu ŭ 2001 hodzie. Rachmańko daŭno zajmaje adkaznuju pasadu ŭ «Hazpromie». Jon — načalnik upraŭleńnia transpartu Departamienta inviestycyjaŭ i budaŭnictva.

Udziačnaść za źviestki — sajtu zautra.by

* * *

Asoby ź dziaržaŭnych struktur abo nabližanych da Pucina kampanij

Valeryj Kazakoŭ
Uładzimir Navumaŭ
Uładzimir Mulak
Alaksandr Milaŭski
Urał Łatypaŭ
Leanid Jeryn
Viktar Rachmańko

Ułaśniki samastojnych biznesaŭ

Viktar Łahviniec
Vasil Lavonaŭ
Ivan Ciciankoŭ

• 0
• 0
• 0
• 0
• 0
• 0
• 0
• 0