BNF vyłučaje ŭ prezidenty kamunalnika Kastusiova

Ale ŭnutrypartyjnaja apazicyja hetaje rašeńnie praihnaravała.

U Minsku prajšoŭ źjezd Partyi BNF. Hałoŭnaj jaho zadačaj było — vyznačycca z farmatam udziełu ŭ budučych prezidenckich vybarach.

Bolšaść delehataŭ padtrymała staršyniu partyi Alaksieja Janukieviča i prahałasavała za toje, kab nie prosta iści na vybary, ale i vystaŭlać kandydata ad partyi BNF.

U jakaści takoj asoby na biezalternatyŭnaj asnovie abrali namieśnika Janukieviča Ryhora Kastusiova. Za jaho prahałasavali 150 delehataŭ.

Heta budzie pieršym abrańniem ahulnapartyjnaha kandydata paśla vybaraŭ 1994 hoda.

Ryhor Kastusioŭ pracavaŭ kiraŭnikom kamunalnaj haspadarki Škłoŭskaha rajona i na inšych kiraŭničych pasadach nižniaha źviana, pakul jaho nie vycisnuli z pracy za jahony ŭdzieł u palityčnych kampanijach za biełaruščynu i demakratyju.

Padčas vyłučeńnia pretendentaŭ u jakaści mahčymych kandydataŭ nazyvalisia proźviščy partyjcaŭ Siarhiej Malčyka i Lavona Barščeŭskaha. Pieršy ŭziaŭ samaadvod. A piśmovuju admovu sp. Barščeŭskaha začytaŭ Alaksiej Janukievič. Chacia asobnyja siabry partyi ŭsio roŭna nastojvali na tym, kab asobu byłoha kiraŭnika partyi ŭnieśli ŭ śpisy dla hałasavańnia. «Nie viedaju, nakolki etyčna vynosić asobu na hałasavańnie ŭ jaje adsutnaść», — skazaŭ Janukievič. Chacia padkreśliŭ, što sam nie suprać hetaj kandydatury.

Na źjeździe vyznačyli, kab nie paźniej za 1 lipienia zaćvierdzić skład vybarčaha štaba adzinaha kandydata. Sam štab uznačalić Alaksiej Janukievič. Taksama pryniataje rašeńnie, pa jakim Sojm partyi moža zaklučać pahadnieńni ź inšymi kandydatami ci palityčnymi siłami ab vyznačeńni ahulnaha kandydata. Ale padkreślivajecca, što heta budzie mahčyma tolki ŭ vypadku, kali inšyja siły buduć nacyjanalna aryjentavanymi.

Razam z tym delehatami źjezdu pryniataje rašeńnie, zhodna ź jakim

siabry partyi nie mohuć supraćdziejničać vybarčaj kampanii kandydata ad partyi BNF i nie mohuć jaho krytykavać praź ŚMI.

A 

ŭ vypadku vyznačeńnia ahulnaha kandydata ź inšymi palityčnymi siłami, navat kali im stanie nie kandydatura ad BNF,

dla siabroŭ partyi nie dapuščalna ŭdzielničać u vybarčych kampanijach inšych kandydataŭ.

Častka delehataŭ z rehijonaŭ vykazałasia suprać udziełu ŭ vybarach naohuł. A niekatoryja navat prapanavali padtrymać u jakaści pretendenta na post prezidenta Alaksandra Milinkieviča. Ale takija zajavy nie znajšli šyrokaj padtrymki.

Z 205 vyłučanych delehataŭ, na źjeździe zarehistravalisia 172 čałavieki.

Źjezd praihnaravali byłyja kiraŭniki partyi Vincuk Viačorka i Lavon Barščeŭski.

Stvarajecca ŭražańnie, što Kastusioŭ — techničny kandydat. Jaho vyłučeńnie maje na mecie paspryjać pieravazie pravacentrysckaha kryła apazicyi nad levacentrysckim. U svaju čarhu, vyłučeńnie Barščeŭskaha, čaho dabivajecca «staraja hvardyja», schilić šali na karyść kanhłamieratu «Havary praŭdu», jaki aktyŭna padtrymali taksama lidery postkamunistaŭ i Abjadnanaja hramadzianskaja partyja. AHP, darečy, taksama maje vyłučyć u kandydaty nie staršyniu partyi, a namieśnika — Jarasłava Ramančuka.

• 0
• 0
• 0
• 0
• 0
• 0
• 0
• 0