Kiraŭnica biznes-asacyjacyi AVVA faktyčna inviestavała hrošy pad admoŭny pracent. I zaklikaje da taho ž inšych

Z sakavika 2026 Maryna Hiryn padpracoŭvaje kansultantam pa finansavym płanavańni, strachavych i nazapašvalnych prahramach u kampanii Prudential. Žančyna pryznajecca, što jašče hod tamu mała što viedała pra finansavyja instrumienty — choć i ŭznačalvała biznes-asacyjacyju.

«Tady ja naohuł ničoha nie viedała ni pra strachavańnie, ni pra takija pradukty ŭ Polščy», — piša sustaršynia biznes-asacyjacyi biełarusaŭ za miažoj AVVA ŭ svaim dopisie ŭ sacsietkach.

Čytajcie taksama: Zdajecca, vyznačyłasia samaja modnaja para biełaruskaj apazicyi. Jak vam ich pačućcie stylu?

«Ja prosta šukała rašeńnie dla siabie i muža […]. Ja pačała raźbiracca, hladzieć roznyja varyjanty. I ŭ vyniku znajšła pradukt, jaki aformiła spačatku sabie, a potym i mužu», — raskazvaje Hiryn, nazyvajučy kankretnuju achoŭna-aščadnuju prahramu Jemerytura bez obaw («Piensija biez bojazi») ad kampanii Prudential. 

Hiryn śćviardžaje, što za minuły miesiac praviała kala 12 kansultacyj dla biełarusaŭ i dapamahła aformić try polisy Emerytura bez obaw. 

«Što važna razumieć: minimalnaja suma ŭvachodu ŭ hety pradukt — 165 złotych (kala $45 — NN), vašy hrošy pracujuć, heta biaśpiečnyja ŭkładańni, u siarednim heta kala 4,5% hadavych. Naprykład, letaś było kala 11%, ale, pakolki pradukt doŭhaterminovy, lepš aryjentavacca na siaredniuju dachodnaść. Vypłaty pa polisie nie abkładajucca padatkam», — nachvalvaje prahramu Hiryn i pierakonvaje, što lepš pačać raniej, a kankurenta hetamu praduktu na polskim rynku siońnia niama. 

Adnak kali vyvučyć ŭmovy prahramy, jakija zvyčajna pišucca drobnym tekstam i nie čytajucca ŭkładčykami, to akažacca, što inviestycyi 20 hadoŭ buduć davać admoŭnuju dachodnaść u bolšaści scenaroŭ — niavažna, ultrakansiervatyŭnych ci ahresiŭnych. I tolki praz 20 hadoŭ vy atrymajecie dachod.

Kali vy budziecie inviestavać pa 5 tysiač złotych štohod (ciapier heta $1350) i vyrašycie vyjści z prahramy ŭ pieršy hod — vam nie viernuć ničoha abo amal ničoha. Tamu što bolšaja častka pieršaha depazitu pojdzie na vypłatu bonusu ahientu, jaki vas pryciahnuŭ. 

Navat praź dziesiać hadoŭ, kali pa łohicy ŭ vas užo pavinna budzie być na rachunku 50 tysiač złotych ($13500 pa ciapierašnim kursie) plus pracenty — vam dobra kali viernuć 60% ad układzienaha. 

Voś tablica, jakaja pakazvaje prahnazavanaje viartańnie inviestycyj na 20‑hadavym haryzoncie. Hetaja infarmacyja adlustroŭvaje histaryčnyja raźliki samoj kampanii Prudential pa prahramie Emerytura bez obaw.

 

Čamu tak vychodzić? Kampanija biare vysokija kamisii za kiravańnie kapitałam, ahresiŭna pryciahvaje klijentaŭ, ale vielmi kansiervatyŭna kiruje srodkami i maje vializnyja pracenty za vyvad hrošaj pieršyja 20 hadoŭ paśla ŭkładańnia.

Kali zachočacie vyjści raniej, čym praz 20 hadoŭ — vam viernuć tolki častku ad vašaha depazitu, a pracenty pa im — nie vypłaciać. 

Kudy inviestuje Prudential? Pavodle aficyjnych dakumientaŭ, nie mienš za 45% kapitału ŭ kiravańni Prudential układaje ŭ polskija dziaržaŭnyja ablihacyi — heta biaśpiečnyja ŭkładańni, ale ź nievialikim pracentam dachodu. Kampanija sama nazyvaje pracent zvarotu — 3,1% hadavych. 

Inšymi słovami, układańnie ŭ Emerytura bez obaw z pazicyi ŭkładčyka — heta, chutčej, doŭhaterminovaje biaspłatnaje kredytavańnie Prudential, a nie inviestycyja. 

Adsutnaść dziaržaŭnaha padatku na vyvad kapitału — heta taksama padmanlivy bonus, kali havaryć pra pytańnie z pazicyi piensijnych nakapleńniaŭ.

Kožny čałaviek u Polščy moža adkryć hetak zvany indyvidualny piensijny rachunak (IKE), vyvad srodkaŭ ź jakoha paśla 60 hadoŭ nie abkładajecca padatkami. A kali raniej — to čałaviek płacić tolki padatak na prybytak.

Papularny sposab inviestavańnia siarod roźničnych inviestaraŭ nie tolki siarod finansava piśmiennych palakaŭ, a va ŭsim śviecie — heta inviestavańnie ŭ šyrokija indeksy (ETF) praź piensijnyja rachunki.

U takim vypadku kamisijnyja płaty minimalnyja — da 0,22% hadavych u mnohich darahich ETF (u paraŭnańni ź minimum 1,6% pa prahramie, jakuju rekłamuje Hiryn). Kiraŭničyja fondy sami prymajuć rašeńni, jakija kaštoŭnyja papiery kuplać, i vałodańnie častkaj fondu aznačaje, pa sutnaści, vałodańnie ŭsimi kaštoŭnymi papierami ŭ jaho na bałansie patrochu, što bałansuje ryzyki. 

Dla ilustracyi my skłali tabličku, jakaja pakazvaje roźnicu rostu kapitału pry inviestycyjach u šyrokija indeksy samastojna, u prahramu Emerytura bez obaw i ŭ prahramu piensijnych nakapleńniaŭ ad najbolšaha polskaha banka PKO Bank Polski. Dla raźlikaŭ uziatyja danyja siaredniaj dachodnaści ETF, dachodnaści pa prahramie «Piensijny pakiet 2050» ad PKO i danyja z dakumientacyi Prudential. 

«Z zadavalnieńniem dapamahu razabracca ŭ pradukcie, zrabić kalkulacyju i paraić lepšy varyjant, uličvajučy asablivaści kožnaha z nas. Napišycie mnie — prapanuju čas. Maja asabistaja misija, kab my žyli hodna i ŭ dabrabycie: i kab pilny pošuk hrošaj u interniecie byŭ apošnim, što my rabili», — piša Maryna Hiryn u sacsietkach.

Na zapyt «Našaj Nivy» pra kamientaryj adnosna asablivaściej vypłat dyvidendaŭ kampanijaj Prudential jana nie adkazała.

• 3
• 0
• 7
• 24
• 0
• 0
• 5
• 0