U Rasii zatrymali hiendyrektara samaha bujnoha vydaviectva «Eksmo». Šmat ich knih pradajecca i ŭ Biełarusi
Hiendyrektara najbujniejšaha ŭ Rasii vydaviectva «Eksmo» Jaŭhiena Kapjeva zatrymali pa spravie ab ekstremiźmie — tak zvanaj «spravie vydaŭcoŭ», źviazanaj z publikacyjaj ramana «Leta ŭ pijanierskim halštuku». «Spravu vydaŭcoŭ» zaviali jašče ŭ mai 2025 hoda, traich abvinavačanych adpravili pad chatni aryšt, piša Bi-bi-si.
Hiendyrektara «Eksmo» Jaŭhiena Kapjeva i jašče niekalkich supracoŭnikaŭ dastavili na dopyt u śledčy kamitet u miežach spravy ab ekstremiźmie, zajaviła pres-słužba vydaviectva.
Telekanał REN TB śćviardžaje, što mieniedžmient «Eksmo» «raspracavaŭ schiemu pa raspaŭsiudžvańni ŁHBT-litaratury siarod paŭnaletnich». Kryminalnaja sprava zaviedziena pa artykule ab ekstremiźmie (nieisnujučy «mižnarodny ruch ŁHBT» u Rasii pryznany ekstremisckim u 2023 hodzie).
Jak raspaviali Ruskaj słužbie Bi-bi-si krynicy na knižnym rynku, Kapjeva zatrymali ŭ suviazi sa spravaj vydaviectvaŭ Popcorn Books i Individuum.
«Sprava vydaŭcoŭ»
Popcorn Books, padraździaleńnie Individuum (z 2023 hoda padkantrolnaje chołdynhu «Eksmo-AST»), vypuściła ŭ 2021 hodzie knihu Aleny Malisavaj i Kaciaryny Silvanavaj (sapraŭdnyja imiony — Alena Prakašava i Kaciaryna Dudko; u lutym 2023 hoda piśmieńnicy byli ŭniesieny ŭ rejestr «inaahientaŭ») «Leta ŭ pijanierskim halštuku» pra ramantyčnyja adnosiny pijaniera i važataha ŭ savieckim letnim łahiery. U 2022 hodzie ŭ vydaviectvie vyjšaŭ praciah ramana — «Ab čym maŭčyć łastaŭka».
Raman «Leta ŭ pijanierskim halštuku», vypuščany nakładam 200 tysiač asobnikaŭ u Rasii, staŭ nahodaj dla zaviadzieńnia pieršaj u krainie spravy ab «prapahandzie ŁHBT» u studzieni 2023 hoda.
U mai 2025 hoda Śledčy kamitet Rasii zavioŭ kryminalnuju spravu ab arhanizacyi dziejnaści ekstremisckaj arhanizacyi ŭ dačynieńni da niekalkich supracoŭnikaŭ Individuum. Ich abvinavacili ŭ tym, što ź listapada 2023 pa vierasień 2024 hoda jany «z karyślivych pamknieńniaŭ vydavali i pradavali knihi, jakija prapahandujuć dziejnaść ruchu ŁHBT, pryznanaha ekstremisckaj arhanizacyjaj na terytoryi Rasii».
Kiraŭnika Individuum i Popcorn Books Dźmitryja Pratapopava, byłoha dyrektara pa prodažach Paŭła Ivanova i adkaznaha za skład i raspaŭsiudžańnie litaratury Arcioma Vachlajeva sud adpraviŭ pad chatni aryšt. U lutym 2026 hoda termin aryštu praciahnuli da 13 maja.
Chołdynh «Eksmo-AST»
«Eksmo-AST» — najbujniejšy vydaviecki chołdynh u Rasii. Jaho dola na knižnym rynku aceńvajecca ŭ 70%. U vieraśni 2023 hoda (kali «Leta ŭ pijanierskim halštuku» ŭžo pryviało da spravy ab «ŁHBT-prapahandzie») «Eksmo» kupiła 51% doli ŭ kapitale Individuum.
Kali byli zatrymanyja supracoŭniki Individuum, pradstaŭniki «Eksmo» padkreślivali, što havorka idzie nie pra samo «Eksmo», a pra padkantrolnaje chołdynhu vydaviectva. «Samo «Eksmo» nijakaha dačynieńnia da ekstremizmu nie maje», — śćviardžali ŭ kampanii.
Jak stała viadoma Bi-bi-si, padčas śledstva vyśvietliłasia, što hrošy ad pradadzienych zabaronienych knih pastupali ŭ kasu «Eksmo».
Sam Kapjeŭ paśla zatrymańnia supracoŭnikaŭ Popcorn Books i Individuum na niekatory čas źjechaŭ z Rasii, ale praź niekalki miesiacaŭ viarnuŭsia, bo spadziavaŭsia, što «raz hod jaho nie čapali, to ŭsio ŭ paradku», skazała krynica.
Popcorn Books abviaściła pra zakryćcio ŭ studzieni 2026 hoda; kamanda vydaviectva zapuściła novy prajekt pad nazvaj Soda Books.
Były biełaruski milicyjanier šukaje «parodzistuju pryhažuniu». Nazyvaje siabie miljanieram, a sam sudzicca z byłoj žonkaj za alimienty21
Kamientary
I što vy mnie zrobicie?